Read Mayangna 1 Reyes 8 Bible Online

1 Reyes 8 - Mayangna bible

1 Reyes 8

¹Kaput laih Salomón witing muhni yakat Israel muihni bararak balna kidika uduhna dai Jerusalén yakat, sulani balna tanituna bitik uduhna kaput bik laih Israel balna pasyakat muih nunuhni dikulna kidika balna bik uduhna, Dawan baksni kidika duwi kiuna atnin Sayan pāni kaupak Devid tawanni nuhni yakat.

²Alasna nuhni kulna mani yakat, Etanim wainiku kidika laih kurih kāwa kaupak waiku tiaskaubu yakat ki, bahang kidika yakat king Salomón Israel muihni balna bitik karak kaluduhna dai.

³Israel muihnibararak balna kidika bitik kalududuhna dai, dawak sumalyang balna laih lā baksni kidika lalaihna,

⁴dawak duwi uina Papang karak kalpaknin ūni labanni karak libitwi, dawak bik kidika pasyakat di dunin dini Papang dini balna bangdai kidika bitik duwi uina dai, bahang dini balna kidika laih libait dawak sumalyang balna witingna duwi uina dai.

⁵King Salomón kidika Israel muihni balna bitik karak kaluduhna dai, witingna kidika lā baksni muhnit tani yakat sakripais yamwa bangdai, sīp kau, turuh ahalmuk kau bik, witingna kidika mahni palni dai sip awasdai kulwi talna atnin.

⁶Kidika usnit kat sumalyang balna kidika Dawan lani baksni kidika duwi uina dai, makatyulnin ūnipas yakat, holi pāni yakat, lawani duyang balna kidika lawanina dinit yakat,

⁷kidika balna laih lawanina kidika ririh duduwadai lā baksni sakkidika pāni minityakat, kaput laih lā baksni dawak panan uhrlawi dulalauwa dini kidika bitik laih mumukwadai.

⁸Kaunah pan uhrlana balna kidika nanaini dai bahang sutni kidika uhrbayakdai, holi pāni kaupak holi palni pāni kidika muhnitkat, kaunah kidika laih sip talwasdai ahni kaupak; dawak kaput laih watnadai warmani kat.

⁹Kidika baksni pasyakat di ūk disdai kaunah Moses yaklauwi kipala lababanni bu āna dai kidika manah bangdai, Horeb yakat, Dawan yaklauwi pramis yamna tatni balna dai kidika, Egipto kaupak yakna usnit kat.

¹⁰Holi pāni kaupak sumalyang balna kalalahna kat, Dawan ūni kidika mukus manah bunghdana dai,

¹¹dawak mukus bunghdana kidika yulni sumalyang balna kidika sip-awasdai kidika yakat watwi makatyulna kidika yamna atnin, kat Dawan alasnina yaksihni kidika makatyulnin ūni yakat bunghdana dai bahang.

¹²Kaput laih Salomón yulna: “Man, Dawan, yulnaman yalahtaman puksani yakat.

¹³Kaunah yang as yamtik manayang makatyulnin ūni, yakat yalahna atnam, pa as man yakat ban kaput yalahta atnam.”

¹⁴Usnit kat king witing nawatwi wiryaklana, Israel muihni yaklauna bangkidika muhnina yakat, dawak blisdiyamna

¹⁵aput yulwi: “Dawan, israel Papangni kidika ayangni nuhni yamna karang, yang papangki Devid yakat pramis yamna dai kaput yamna kidika, bahang aput kalyulna dai:

¹⁶‘Egipto kaupak yaknayang dai kidika kaupak yang tawanki Israel kidika, yang tawan nuhni as bik waltik yaktik dutasyang dai, Israel sulani balna as bik paskaupak, kidika yakat makatyulnin ūni as yamna atnin, dawak kaput laih yang ayangki kidika ban yakat yalahnin. Kaunah yang waltik yaktik dunayang dai Devid kidika, yang tawanki Israel yakat tanituna kana atnin.’

¹⁷Dawak yang papangki Devid laih makatyulnin ūni as yamkihdai, Dawan ayangni nuhni kau, Israel Papangni kidika.

¹⁸Kaput kaunah, Dawan yaklauwi kalyulna: ‘Yamni yamtaman, makatyulnin ūni as yamta yanin kultaman kidika;

¹⁹kaunah man laih ūni kidika paktas awama ki, man walamabis duma kidika pakna karang. Witing yaklauwi makatyulnin ūni kidika pakwi yana karang.’

²⁰“Yamniki, Dawan laih pranimis kat yamna. Witing yulna kaput, yang papangki Devid pāni kidika dunayang, dawak Israel tronni yakat yalahnayang, dawak Dawan yakat makatyulnin ūni kidika yamtik kalanayang, Israel Papangni yakat.

²¹Baisa minit yakat, pa as yaktik kalanayang pramis lani baksni kidika pāni, Dawan yaklau mamuihkibararak balna yakat pramis yamna dai kidika Egipto kaupak yakna dai mani.”

²²Kidika usnit kat, Salomón witing Dawan kau sakripais buswa pāni muhnit yakat yaklauna, Israel balna bitik muhnina yakat, dawak tingni kidika ma yakat dulauwi,

²³parasni yulna: “Dawan, Israel Papangni: makau kisang yakat dawak sau yakat bik Papang as diski man kapat, man pramamis kat yamtaman, dawak kulnam dalani lani dutaman kidika bik lāih yakta niningkataman angdika muihni witing isning bitik man dima yamwa kidika;

²⁴yang papangki Devid man dimayamyang dai yakat pramis yamnaman dai yakat yamnaman, kaput laih yulnaman dai kidika dawak yamtada kidika karak libittaman warmani.

²⁵Kaput bahang Dawan, israel Papangni, man dima yamyang Devid, yang papangki kau pramis yamnaman dai kidika yakat yamtah: witing sulani as bik dis awas karang, dawak man ilpma kau Israel tronni yakat kilna karang, witing walanibis balna kidika man muhma yakat di balna yamni yayamwarang sihm witing di yayamni balna yamwadai kaput.

²⁶Kaput bahang, Israel Papangni, man pramis kalyamnaman dai kidika kaput yamtang yang papangki Devid, man dima yamyang dai yakat.

²⁷“Kaunah, ¿kaput rahmyah, Papang kidika sau minit yakat yalahna atnin? Makau kisang nuhni bitik sip-awas kidika witing kana atnin, ¡ampus sip-awasyah adika makatyulnin ūni yamtik manayang adika man dima!

²⁸Kaput kaunah, Dawan dawak yang Papangki, yang man kalma dinit yakat buktik yultayang kidika dakah; man dima yamyang warmani parasni man kau minit yulwa kidika dakah.

²⁹Man talaman kidika dawinih, pukta madah bik, adika makatyulnin ūni akat man sak-awamaki atnaman kidika. Akat man dima yamyang man kau minityulwa kidika dakah.

³⁰Kalma dinit yakat buktik yultayang kidika dakah, dawak man tawanma Israel karak bik adika niningyakat kalpaktik mikitnayultanaki kidika. Dakah makau kisang yakat, man yalahtaman pāni kaupak, dawak dutkina datang diswang.

³¹“Muih as witing wanaihni niningkauh dutni yamwarang kat, dawak makatyulnin ūni paskau sakripais busnin pāni muhnit yakat papakwak man ayangma kau yakwi yulwarang kat,

³²man makau kisang kaupak daka yamma; la kat yamma man dima yamyang balna yakat. Dutni yamna muihni kidika pāt yakat ruhmma, kalatangkat wah kidika witing minit yakat bukwarang dutni yamna kidika yulni, dawak dutni yamwas muihni niningyakat bik la kat yamma, witing lani amput yamnin yakat.

³³“Man tawanma Israel kidika waihnila yaklauwi minit bayakwarang kat, man namang yakat dutni yamna kidika yulni, kaunah witingna watwi man yakat aiwi ayangma nuhni yayamwarang kat, dawak witingna man kalma dinit yakat bukwi minitna yuyulwarang kat adika ūni akat,

³⁴man makau kisang kaupak didakama, dutnina datang diswarang, dawak bik yamtangkat witingna panina yakat aina karang, witingna muihnina bararak balna kau dianaman dai kidika.

³⁵“Ma buhni kalwarang kat dawak was lauwas karang kat, tawan kidika man namang yakat dutni yamna kidika yulni, kidika usnit kat witingna adika niningyakat minitna yulwi, dawak ayangma nuhni yayamwarang kat, dawak witingna dutni yayamna kidika kaupak kulninna wirlalawarang kat, wah duduwada kidika yulni,

³⁶man makau kisang kaupak didakama dawak man dima yamyang dutni kidika datang diswarang, dawak man tawanma Israel kidika bik, dawak ta yamni usnit uiwi kiunin kidika niningnakama. Kaput laih was sihnaman, man tawanma muihni balna yakat adika sauni dianaman kidika minityakat.

³⁷“Adika sauni akat yuhlakwarang, kidika awaskat siknis kaiwarang, kidika awaskat daihni kidika yulni pan balna kidika buhlawarang, kidika awaskat pan yakat pantapa laihwarang, sisin satni balna iawarang, pisa balna kapat; waihla kidika aiwi tawankina nuhni akat awaihdakwi nikingnakauh yanakalbabauwarang, kidika awasbik di dutni ūk kaiwarang siknis balna satni,

³⁸kaput laih man dakah muih bitik aiwi minitna yulwi man kalma dinit yakat bubukwarang kidika, tawan muihni balna bitik aiwarang bik, witingna niningna yakat dutni kiuna kidika dawak dalani wawauhwa kidika yulni witingna minitna yulwi tingnina yuyuwarang kat adika makatyulnin ūni niningyakat. Man makau kisang kaupak didakama, yalahtaman pāni kaupak, kaput laih dutni disnin kidika diama; dawak man kidika pasyakat āwa minit diama ampus warknina yayamna praisni kat, kat man manah talaman bahang muih al kulnin kidika dawak yamnin kulwa kidika bik.

³⁹

⁴⁰Kaput laih man ayangma nunuhni yayamna karang witingna adika sauni akat yalalahwa kidika, yangna muihkinabararak kau dianaman dai kidika.

⁴¹“Tringsar muihni as karang bik, man tawanma muihni-awas kidika, man yulma sau as naikaupak kaiwarang kat

⁴²dawak man yakat minityulwarang kat adika makat yulnin ūni niningyakat, (kat ayangma nuhni kidika dawak parasma nuhni dutaman kidika bik lāih dakama bahang)

⁴³man makau kisang kaupak dakama, yalahtaman pāni kaupak, dawak man yakat di mayulwa kidika bitik kalama, kaput laih sau akat nisan balna bitik laih amangmalalawarang dawak ayangma nuhni yayamwarang, man tawanma Israel yamwa kaput, dawak bik amanglalawarang man ayangma kidika laih yulna ki adika makatyulnin ūni yang lawik yamtik manayang akat.

⁴⁴“Man tawanma kidika waihla niningkauh kalbauna kalahwi kiwarang kat, angkat man lawa sihma kat, witing minit yulwarangkat man tawan nuhni as walta yaknaman niningyakat dawak bik, makat yulnin ūni as man yakat yamtik manayang niningyakat bik,

⁴⁵man makau kisang kaupak dakama minit yulwa kidika, dawak bik kalma dinit yakat bukwi yulwa kidika bik, dawak witing yulni kidika nanitdakma.

⁴⁶“Dawak man namangyakat dutni yayamwarang kat, kaunah muih as bik diski dutni yamwas awas kidika, man witingna niningna yakat kulnam daukalta waihla tingni yakat atangkat taihnin lani yakat bubukwarang, dawak witingna saunina yakat duwi uiwarang naikaupa, kidika awaskat ulis karangpa,

⁴⁷laihwi duwi uina pāni kidika kaupak nawatwi aiwi man kalma dinit yakat bukwi, witingna dutni yayamna kidika amanglalawarang,

⁴⁸dawak witingna sulnina dawak isningna bitik man yakat nawatwi aiwarang kat waihninala balna saunina yakat laihwi duwi uina taihnin lani yakat, bahang kidika kaupak, adika sauni man lawa muihninabararak balna kau dianaman dai, dawak tawan nuhni as man walta yaknaman kidika yakat man yak makatyulnin ūni as yamtik manayang kidika nining akauh muhwi minitna yuyulwarang,

⁴⁹dawak man dakama minitna yuyulwa kidika makau kisang kaupak, kidika pāni yakat yalahtaman kidika kaupak, dawak witingna yulnina kidika nanitnadakma.

⁵⁰Man tawanma namangkauh dutni yamna kidika, dutnina datang diswarang, namangkauh dutni yayamna balna bitik. Minikun talnin kidika kalatah, angdika muihni kat pāni kaupak yakwi duwi uina kidika yakat.

⁵¹Kat man tawanma bahang man dima; dawak man lawa Egipto kaupak yaknaman, di buswi aharwa pāni daihni kidika kapat kaupak.

⁵²“Man dima yamyang balna minitna yuyulwa kidika dakah, dawak man tawanma Israel kalma dinit yakat bukwi yulwa kidika bik. ¡Yanadakah Papang man yakat yultayangna kidika!

⁵³Kat Dawan man laih, dima palni kulta yaknaman bahang, sau akat tawan balna paskaupak, man dima yamyang Moses munah yulnaman dai kaput, yangna muihkina bararak balna Egipto kaupak yaknaman dai yakat.”

⁵⁴Salomón witing minit yulna kidika dawak bik Dawan kalni dinit yakat bukwi yulna kidika, bahang witing laih sakripais busnin pāni muhnitani yakat limbabah dawi kisang yakat tingni dulau dawi minit yulna kidika dahn dawak,

⁵⁵yaklauwi Israel muihni balna bitik yakat blisin diana dai, yulni parasni kau yulwi:

⁵⁶“¡Dawan ayangni kidika nuhni yamna karang, witing tawanni Israel yakat kulnin aslah lani kalana kidika yulni, witing amput pramis yamna balna yamna kaput! Bahang witing dini yamyang Moses munah di balna yayamni pramis kalyamna kidika bitik palni yamna as bik dawas.

⁵⁷“Dawak waradika laih Dawan mayang maPapangki laih mayang karak karang, mayang mamuihki bararak balna karak dai kapat. Witing maidawas kawang,

⁵⁸nawatkauh laih mayang maising kidika witing yakat dukiwang, dawak kaput laih di bitik yakat witing kulnin lani yamdarang, dawak kaput bik laih lāni balna bitik mayang mamuihki bararak balna yakat dipakna dai kidika yamna atnin.

⁵⁹Adika dini balna bitik maPapangki Dawan yakat yulnayang, witing yakat kaput madah pukta yakat bik sakkarang kidika yulni balna, kaput laih witing dini yamyang balna dawak tawanni balna yakat la barangni kat yamna karang, amput yamnin duwa yakat praisni,

⁶⁰dawak kaput laih sau akat nisan balna kidika bitik amanglana atninna Dawan laih Papang, dawak ūk diski witing kapat.

⁶¹Kaput bahang manna kidika kulnamna barangni alas dis atnin maPapangki Dawan karak, dawak bik witing lāni balna kat yamtanauh, warmani yamda apat.”

⁶²Kidika usnit kat, king dawak Israel muihni balna bitik laih witingna Dawan yakat sakripais bubusna.

⁶³Salomón laih Dawan yakat sakripais busna dai Papang karak watwi yamni kalahnin sakripais busnin kidika, turuh ahalmuk tausin 22, dawak sīp laih tausin 120. Kaput laih king dawi israel muihni balna karak Dawan ūni kidika Papang dini yayakna dai.

⁶⁴Sihm kidika mani, king witing blisyamna dai Dawan ūni muhnit papus kau watak pakkidika, kat kidika yakat sakripais karauni kauna buswa kidika yamna dai bahang, minitdis kalanin dini plawar minik kidika bik, dawak Papang karak watwi yamni kalahnin di salani sakripais buswa kidika bik yamna dai, kat sakripais busnin pāni bras kau yamna kidika Dawan muhni tani yakat pakdai kidika laih dibin dai bahang sakripais karauni kauna buswa kidika laih sip-awas dai bahang yamnin, plawar minik minitdis kalawa kidika dawak, di salani kau sakripais buswa kidika Papang karak watwi yamni kalahnin yulni.

⁶⁵Kidika mani, Salomón dawak Israel muihni balna bitik, dawak muih mahni palni aslah kalahna dai kidika Hamat pāni kidika kaupak Egipto wasnibin murwatus kidika kat, witing ū labanni alasnina[13] kidika yayamna dai, Mapapangki Dawan ayangni nuhni kidika kau, dawak baisa minit yakat ma tiaskauas as alasna yayamna dai; dawak bitik kat, ma 14 laih alasna yayamna dai.

⁶⁶Kidika mani kaupak payahlawak[14] mahka tawan muihni balna yakat diparaswadai uina atnin, dawak tawan muihni balna kidika king yakat ayangni nuhni dulalauna, dawak mahka ūnina kau uina, isningnalak, Dawan yaklauwi, witing dini yamyang Devid yakat yamni kalyamna dai kidika yulni, dawak witing tawanni Israel yakat bik.