Read Mayangna 1 Reyes 9 Bible Online

1 Reyes 9 - Mayangna bible

1 Reyes 9

¹Salomón witing Dawan ūni, king ūni, dawak witing ais yamnin kulna balna kidika bitik yamwidana usnit kat,

²watwi bu yakat, Dawan kidika lāih kalahwa dai witing yakat, Gabaón yakat lāih kalahna dai kapat,

³dawak kalyulna: “Man mamatyulnaman, dawak yang kalki dinit yakat bukta yulnaman kidika bik dakanayang, dawak adika ūni man yamnaman kidika, yang ayangki kidika yakat ban kaput atnin yulni, yang diki yamnayang. Yang ban kaput maintala awaki dawak bik kulnik yakat ban sakkarang.

⁴Waralaih yamni ki: Yang muhki tani yakat man yamni awamakat, man papangma Devid yamna kaput, witing kulnin barangni, dutni as bik yamwas, dawak yang lawik yamnin paknayang balna kidika bitik yamna, dawak lāki balna yakat dakawi yamna,

⁵dawak yang lawik man king āwaman kidika ban kaput atnin yakat āki, Israel pasyakat, man papangma Devid yakat pramis yamnayang dai kaput, yang kalyulnayang dai, witing sulani as bik dis awas karang Israel tronni yakat kilna atnin.

⁶Kaunah man dawak walamabis balna bik yang kaupak naikau alahwanama kat, yang laki balna mananayang kidika kaput yamtas awanama kat, dawak dawan dauh yakau ayangni nuhni yamtanama kat,

⁷yang lawik daktik yakna awaki, Israel sau kalanayang kidika kaupak, yang muhki tani kaupak yakpamki ū yang diki yaknayang kidika, dawak Israel kidika laih nisan balna pasyakat sarahni diyuyulna karang.

⁸Dawak makat yulnin ūni adika laih ū as bahwi uhdana kapat[15] kalna karang, dawak muih bitik, kidika pāni munah bayayakwarang kidika taldas dini as kapat tatalwarang, dawak sarahni bik yuyulna karang, kaput bik laih witing yulwi dakakawarang Dawan kidika amput dawak adika muihni balna yakat kaput yamnayah, dawak makatyulnin ūni kidika bik.

⁹Dawak nangnitnalalana karang, kidika laih Papangnina Dawan yaklauwi muihnina bararak balna kau yakwi di duaina dai kidika Egipto kaupak, kidika ruhmwi dawi dawan dauh balna yakat ayangni nuhni yayamna bahang kaput ki; kidika yayamna yulni Dawan yaklauwi dutni kidika dawak witing minitna yakat kiuna.”

¹⁰Kurih 20 bayakna dai, Salomón witing Dawan ūni yamna dawak king ūni yamna dai kidika kaupak,

¹¹Tiro kingni Hiram yaklauwi Salomón yakat suhun panan kalana dai, awas panan, dawak gol ampus dukih kalawa yakat. Dawak king Salomón yaklauwi laih Hiram yakat kalana dai tawan nunuhni 20, Galilea sauni pīsni kidika kaupak.

¹²Kaunah Hiram witing kiwi talna kat, tawan nunuhni kalana balna kidika, witing dukih laih kalawasdai,

¹³dawak yulna: “¿Ais satni tawanni nunuhni balna yah, yang akat yanaman kidika, yang wirahki?” Kidika bahang, kidik sauni pīsni yakat tawan nunuhni bangdai kidika laih ayangni pakna Cabul,[16] kidika ayangni laih warmani kat ban kaput duwi.

¹⁴Hiram yaklauwi Salomón yakat gol kalsihna dai kidika laih kilo 3,960 dai.

¹⁵King Salomón yaklauwi muih balna yakat taihwi pakwak wark yayamna kidika Dawan ūni yayamna, king ūni yayamna, sau uhwi ilwi babanghna, Jerusalén tawanni nuhni daklana kidika yayamna, dawak kidika minit yakat Hazor, Meguido dawak Gezer tawanni nunuhni balna bik laihwi dulauwi yayamna kidika laih aput ki:

¹⁶Egipto kingni fero, witing kiwi kawi, Gezer tawanni nuhni kidika kalbauwi dakyakwi duna, usnit kat buspamna, dawak cananeo muihni balna bangdai kidika bitik laih imukna dai, dawak kidika usnit kat witing walanibis yal yakat kalana dai, Salomón yalni yakat.

¹⁷Kaput bahang Salomón yaklauwi watwi laihwi dulauwi yamna dai Gezer, Bet-horón parah niningkauh kidika,

¹⁸Baalat dawak Tamar, Judá kauhnimak wanilang yakat.

¹⁹Dawak baisa minit yakat tawan nunuhni balna bitik watwi laihwi dulauwi yamna dai, di minik pupuwa pāni balna dai kidika, kaput bik laih kalbaunin kārni balna ahawa pāni, dawak aras balna panina, kaput bik laih Jerusalén yakat ais yamnin kulna balna kidika bitik laih yamna dai, Líbano yakat bik, dawak witing tingni yakat sau duwa kidika bitik pasyakat bik.

²⁰Amorreo, hitita, ferezeo, heveo dawak jebuseo balna kidika bitik laih yakat wawatna dai, kidika balna laih Israel muihni balna awasdai,

²¹yuldarang kat, witingna sulanina balna kau wawatna dai kidika, witingna usnitna yakat, dawak kidika saunina yakat, bahang kidika balna laih Israel balna yaklauwi sip bitik imukwas dadana dai, kaput bahang Salomón yaklauwi wark pararasni balna yakat pakwak wark yayamna dai, bahang kaput laih warmani kat.

²²Kaunah Israel balna yakat laih as bik pakwasdai muihni dini yamyang as kapat atnin, kaunah pakna dai kidika laih kalbauyang muihni as atnin, kalbauyang balna taninatuna satni balna kapat, kar kau kilwi kalbauyang balna taninatuna.

²³Dawak Salomón witing wark yamyang balna taninatuna duwadai kidika laih 550 dai, bahang witingna yaklauwi tunan duduwa wark balna kidika yayamwadai.

²⁴Fero walanibis yal kidika laih Salomón witing king ūni pakna dai yakat yaklana dai, kat witing dini pakna dai bahang. Dawak bik Salomón yaklauwi sau uhwi bang-ilnin kidika yamna dai.

²⁵Kurih bās laihwa bitik yakat, Salomón witing Papang karak watwi yamni kalahnin sakripais buswa kidika dawak sakripais karauni kauna buswa kidika bik yamwadai, sakripais busnin pāni as Dawan yakat yamwi kalana dai kidika minit yakat, dawak kaput bik laih walapni bik buswadai Dawan muhni tani yakat. Kaput laih makat yulnin ūni kidika yamwi danadai.

²⁶Salomón witing kuma kuring bik yamna Ezión-geber yakat, kidika laih Elat karak libitni ki Kuma Pauni kung yakat, dawak Edom sauni yakat.

²⁷Hiram witing tunan muihni balna duwa dai kidika kuma kuring kau sihna dai, kuma lan palni muihni balna karak, kidika laih Salomón tunan duwa balna karak libitwi sihna dai,

²⁸dawak Ofir yakat uiwi kakana, bahang kidika yakat gol kilo tausin 14 kapat duduna, dawak Salomón yakat uiwi kalalana.