Read Mayangna 2 Reyes 1 Bible Online

2 Reyes 1 - Mayangna bible

2 Reyes 1

¹Acab dauwak usnit kat, Moab Israel nining yakat yaklauna.

²Ocozías niningkauh laih ūni kaupak windar munah bukwi, kasak dalani duna dai, Samaria yakat. Kaput dawak muih sihna dai, Ecrón daniwan dauh, Baal-zebub yakat kalyulwi dakana atnin witing kidika kalyamwarang pa.

³Kaunah Dawan innisal yaklauwi Elías Tisbe kaupak yakat kalyulna: “Samaria kingni muih sihwa kidika balna yakat yawa kalpakta, dawakat diyulta dakah, Israel yakat Papang dis kat pa, Ecrón daniwan Baal-zebub yakat kalyulwi dakanin bahang.

⁴Dawak bik diyulta, yang Dawan yang kat Ocozías yak yultayang: ‘Pama kaupak lauwas awamaki, dauma ki.’ ” Elías kiwi kaput yamna dai.

⁵Ahal balna nawatwi king yakat uiwak diyulwi dakana: —¿Ais yamta nawatta aiwamanah?

⁶Witingna nangnitlalana: —Al as takinapas yakat kalahwi yanayulna king yanasihna yakat nawattik yawinikna, dawakat kalyulnikna: ‘Dawan aput yulwi: ¿Israel yakat Papang dis kat pa, Ecrón daniwan Baal-zebub yakat yulta dakaman bahang? Kidika yamna man bahang pama kaupak lauwas awamaki, nawatkauh laih daumaki.’

⁷King yulwi dakana: —¿Al ampat kat tamana pasyakat kalahwi adika yulni manayulna yah?

⁸—Al as witing asnina kawa kidika, suruhmnin duwa kidika butuni manah dai, dawakat banimak kau sitwa kidika di utak dai —kaput kalyuyulna. —¡Kidika laih Elías, Tisbe kaupak kidika! —king kaput yulna.

⁹Dawak usnit kat, kalbauyang balna tanina tuna as sihna, kalbauyang muihni balna 50 karak libitwi. Witingna ui'kakawak, Elías laih asang nuhni as tuna yakat yalahna sak dai. Dawakat kalbauyang balna taninatuna kidika yulna: —¡Prapit, king mapakwi kidika kaupak lakwanam!

¹⁰Elías yaklauwi nangnitlana: —Agha yang laih prapit, makau kisang kaupak kuhpau kai'bukwi mabuswarang man dawakat, kalbauyang balna 50 dutalikman kidika balna bik. Minitni yakat makaupak kuhpau bukwi dibusyamna dai.

¹¹King yaklauwi kalbauyang balna taninatuna ūk yakwi sihna, kalbauyang andat papusbah karak libitwi, dawakat kiwi Elías yakat kalyulna: —¡Prapit, king mayulwi kidika kaupak lakwanam warminitni!

¹²Elías yaklauwi nangnitlana: —Agha yang laih prapit, makau kisang kidika kaupak kuhpau bukwi mabuswarang, man dawak kalbauyang balna andat papusbah dutalikman kidika balna bik. Kidika minitni yakat, makau kisang kidika kaupak kuhpau bukwi dibusyamna.

¹³Usnitkat king yaklauwi kalbauyang balna taninatuna ūk sihna dai, uman yakat bās dai kalbauyang balna andat papusbah karak libitwi. Kaunah kalbauyang balna taninatuna kidika kilwi kiuna Elías sakyakat, dawak Elías muhni yakat limbabahwi yulna: —Kalma dinit yakat buktik yultayang prapit, yang sangkika kidika kultah, dawak dima yamyang andat papusbah balna kidika bik.

¹⁴Kat muhnilau laih makau kisang kidika kaupak kuhpau bukwi, kalbauyang balna taninatuna bu dai kidika dibusyamna dai alnina balna dai ki bitik. Yang laih man kalma dinit yakat buktik mayultayang bahang mikun yatalah.

¹⁵Kaput dawak, Dawan innisal yaklauwi Elías yakat pakna: —Witing karak yawah, yamaduwinih. Elías yaklauwi kalbauyang balna taninatuna yakarak kalpakwi kiuna dai king talna atnin.

¹⁶Dawakat kalyulna: —Dawan aput yulwi: ‘Ecrón daniwan dauh, Baal-Zebub yakat muih sihnaman dai bahang yulwi dakana atnin, Israel yakat Papang diskapat kalyulwi dakana atnin, kidika yamnaman bahang pama kaupak lauwas awamaki, dauma ki.’

¹⁷Rahm kaput laih, Ocozías dauna, Dawan yulna dai kaput, Elías yakat pakwak. Ocozías laih walabis disdai bahang, witing pāni yakat wirahni[1] king kana dai, Joram. Adika kalahna dai, Josafat walanibis Joram Judá yakat king kana kurih bu laihna dai yakat.

¹⁸Ocozías yulni umani balna, dawak di yamna balna kidika laih Israel kingni balna yulnina uhulna wauhnitaya yakat ulna ki.