Read Mayangna 2 Reyes 10 Bible Online

2 Reyes 10 - Mayangna bible

2 Reyes 10

¹Acab walabis ahal 70 duwadai Samaria yakat, kaput laih wauhtaya as ulwi sihna, tawan nuhni[14] tunan muihni balna yakat, muihbararak balna, dawak Acab walanibis balna maintalyang balna, aput diyulna dai:

²“Manna kingmana walanibis balna dutaman bahang aniras balna bik, kalbaunin kārni balna, kalbaunin dini balna, bahang adika wauhnitaya dutanama kat,

³kingmana walanibis angdika tanit sip kidika papangni trunni yakat kalatanang yalahwarang, bahang kingmana ūni kidika nanitdakta kalbautanauh.”

⁴Adika yulni dakawi uba yamaduduwi yuyulna: “King bu witing niningyakat sip awas dadana kat, ¿mayang amput sipmawarangyah?”

⁵King ūni maintalyang muihni, tawan nuhni kabamintni, muih bararak balna dawakat Acab walanibis maintalayang balna witingna bitik yaklauwi Jehú yakat yul sisihna: “Yangna laih man ais yulma yakat dakik yamtanaki, bahang yangna sip king ātasyangna. Man amput yamni talaman yakauh yamtah.”

⁶Watbu wauhtaya sihna Jehú yaklauwi, bahang aput diyulna: “Manna kaput yang karak mana kat, dawak yulki daka yamnin kultamana kat, kingmana walanibis balna tunani kidika bitik duta, yahan mani aiwa yatalnauh Jezreel akat.” King walanibis ahal 70 kidika, tawan nuhni paskau muih nunuhni balna mumuhna bahang witingna karak dai.

⁷Kaput laih adika wauhnitaya duduna kat, ahal 70 dai kidika laihwi ihina; usnit kat tunanina balna kidika uslun kau puwi Jezreel yakat sisihna.

⁸Yul duwi kiuna dai kidika kiwi kawi, Jehú yakat kalyulna: —King walanibis balna tunanina dai duahaina. Jehú yaklauwi pakna: —Tawan nuhni kaiwi kawa yakat bu uduhta dabangtanauh yahan manikat.

⁹Payahwakat Jehú kalahwi, tawan muihni balna yakat diyulna: —Adika dini manna yakat laih di as dismana; yang lakwik dakiwan niningkauh lakwik inayang, kaunah ¿wais inayah adika balna bitik?

¹⁰Yamni dakanauh, Dawan Acab sulani balna niningnakauh yulna kidika as bik bayakwas karangki, bitik laih dakana karangki. Dawan witing dini yamyang Elías yakat pakwak yulna balna kidika bitik, witing alas yamna.

¹¹Dawak Jehú yaklauwi īna Jezreel, Acab sulani balna, ahalni balna nunuhni dikulna dai kidika dawak kaltalyang yayamni duwadai kidika dawak sumalniyang balna dai kidika bik imukna dai. As bik sangka dawas dai.

¹²Usnit kat Samaria yakat kiuna, dawak ta bamak yakat sīp maintalyang balna panina Bet-equed yakat kiwi kalahna dai.

¹³Bahang yakat Judá kingni Ocozías wirahni balna bangdai. Dawak Jehú diyulwi dakana: —¿Manna waismanah? Witingna nangnitlalana: —Yangna laih Ocozías wirahni yangna, bahang king walanibis balna, dawak, king yalni walanibis balna bik talna aiwana yangna.

¹⁴Jehú yaklauwi, witing usnit uiyang balna yakat pakna: —Laihtanauh sangka. Kaput laih Jehú usnit uiyang muihni balna yaklauwi sangka lalaihna, dawi Bet-equed yaihnit yakat pakudungni as kukuhrna sak dai was dinin bahang kidika yaihnit yakat duwi uiwi dininamak dadakna dai. Ahal 42 kidika as bik sangka dadawas dai.

¹⁵Jehú yakaupak mahka kiuna, dawak Recab walanibis Jonadab karak kalpapakna kaltalna kaiwalikkat, Jehú yaklauwi kalparaswi, dawi kalyulna: —¿Man kulnam kidika yamni yah yang niking yakat, yang kulnik yamni kapat man namang yakat? Jonadab kalyulna: —Kapat ki. —Kaput kat tingma yatah kalatna —Jehú yaklauwi. Jonadab tingni kalawak, Jehú yaklauwi witing kārni yakat mur'ilna.

¹⁶Dawi kalyulna: —Mikdatah, dawak talma yang Dawan minit antayang kidika. Kaput laih, kārni yakat ilwi dukiuna.

¹⁷Dawak Jehú Samaria yakat kiwi kawi Acab sulani balna bangdai kidika bitik imukna. Bitik laih imukna dai, Dawan Elías yakat pakwak yulna dai kaput.

¹⁸Usnit kat, Jehú muih bitik uduhwi diyulna: —Acab laih binilah Baal kau prinias yamna dai, kaunah yang laih Baal yakat prinias mahni yamkiki.

¹⁹Kaput bahang, prapit, ayangni tanit nuhni yamyang balna dawak Baal sumalniyang balna bik yultang aiwang, as bik watnin awaski, sakripais nuhni as yamkiki Baal yakat. Bahang wais kaiwas karang kat dauna karang. Jehú yaklauwi adika alasni yamna dai, Baal kau minitna yuyulwa bala kidika ina atnin yulni.

²⁰Kaput bahang dipakna dai yulna atnin Baal kau alasna nuhni as yamwa kidika, bahang kaput yamna dai.

²¹Usnitkat, Israel bitik kau muih sihwak yulwi awawaihna, dawak Baal kau minitna yulyang balna dai kidika, minitna yuyulwa ūni yakat uiwi kakana. As bik kaiwas awas dai, bahang makatyuyulwa ūni kidika bunghdana dai.

²²Jehú kalyulna, asna apakyang muihni yakat, alasna yakat kanin parakni balna yakwi diana atnin Baal kau minitna yuyulwa muihni balna bitik yakat; dawakat kaput yamna dai asna apakyang muihni.

²³Jehú dawi Jonadab karak kawi uina Baal prinias ūni yakat dawak Jehú yaklauwi diyulna Baal kau minitna yulyang muihni balna yakat: —Manna pasyakat, Dawan kau minityulwa muihni as bik dis atninki, Baal yakat minitna yuyulwa muihni manah atnin ki.

²⁴Baal kau minitna yulyang muihni balna bitik prininaias ūni yakat kakana, sakripais busna atnin. Dawakat Jehú yaklauwi ahni yakat ahal 80, dabangwi, aput diyulna: —Wais kat, ahal tingmana yakat anayang kidika kikirang kat, sangmanaka kau lautanama.

²⁵Jehú sakripais buswi dawi, dipakna ahnikau ahal dana balna yakat: —¡Awa imuktanauh! ¡As bik kiri yaklanin awaski! Jehú alni balna yaklauwi bitik laih isparah kau ihina, dawi usnitkat yakaupak ruhmyayakna. Usnitkat prinias ūni paskau, maisihni dis pāni[15] yakat kakana,

²⁶dawakat pan sarani daninawan dini kukulna dai kidika yakwi busna.

²⁷Baal kau sakripais busnin pāni,[16] dawak prininaias ūni bitik tuklalakna, bahang ba ruhmnin pāni as yayamna, warmani kat.

²⁸Kaput laih Jehú yaklauwi, Israel kau Baal yakat minitna yuyulwa kidika bitik yakmukna dai.

²⁹Kaput kaunah, Nabat walanibis Jeroboam dutni yamwak Israel balna bik dutni yayamna dai kidika dadawas dai, Dan dawak Betel kau turuh wayani gol kau yayamna raudai kidika yakat ban minitna yuyulwa dai.

³⁰Dawan yaklauwi Jehú yakat kalyulna: “Yang niking yakat yamni yamnaman bahang, dawak mikpa yakat barangni man dawak Acab sulani balna niningnakauh ais yamnik kulnayang dai kidika kaput yamnaman bahang, man sulama balna kidika Israel kingni yalahnin pāni yakat yalalahna karang, sulama arungka tilahwi kiuna kat.”

³¹Kaput dai kaunah, Jehú kulwi kalbauwas dai Dawan yulni kat yamna atnin, Jeroboam dutni yamwak Israel balna bik yakat talwi yayamna kidika kaupak Jehú bik dakwi kalahwas dai.

³²Kidika mani balna yakat, Dawan yaklau Israel balna saunina kidika apis dakyakna dai. Hazael yaklauwi Israel balna niningna yakat yaklauna:

³³makilwa niningkau saunina kiwi watwa Jordán kaupak, Galaad, Gad, Rubén dawak Manasés, kidika balna saunina bitik, dawak Aroer kaupak, Arnón wasni yaihnit kau kidika, dawak Galaad, Basán kidika balna bitik bahana dai.

³⁴Jehú yulni umani balna, dawak di yamna balna kidika, Israel kingni balna yulnina uhulna wauhnitaya kidika yakat ulna ki.

³⁵Dawak Samaria yakat nununa, dawak pāni yak walanibis Joacaz king kana dai.

³⁶Jehú Israel yakat king kana dai kurih 25, Samaria tawanni nuhni yakat.