Read Mayangna 2 Reyes 11 Bible Online

2 Reyes 11 - Mayangna bible

2 Reyes 11

¹Ocozías nanangni Atalia dakana witing walanibis dauna kidika, dawak kiwi king walanibis balna bitik imukna.

²Kaunah, Ocozías wirahni yal, king Joram walanibis yal, Josaba, witing yaklauwi, Ocozías walanibis Joás kidika malpamna dai king walanibis ūk balna kidika ihiwak talwi, payahwa pāni as kau yal muihbin maintalwa muihni karak, kaput bahang iwas dadana.

³Dawak, Joás yakmaldana sakdai kurih tiaskauas yal maintalwa muihni karak, Dawan ūni yakat. Kidika mani balna yakat Atalía king kana dai kidika sauni yakat.

⁴Kurih tiaskaubu laihwa kat, Joiada yaklauwi, kalbauyang balna taninatuna, cereteo muihni balna dawak kalbauyang muihni balna bik yulwi duaiwi Dawan ūni yakat dawak kakana, witing sakdai yakat. Kidika yakat Papang ayangni kau pramis yayamna, dawakat king walanibis tatuna Joás kidika yakwi niningnakana.

⁵Usnitkat dipakna: “Adika manna yamtanama: sahwi yakna bās mana kidika king ūni yakat maintalnama, yakurupdinin mani[17] balna yakta.

⁶Dawak sahyakna bās ūk kidika laih Shur dūrni yakat bangkarang, dawak sahyakna bās, as balna kidika laih, maintalyang balna ūnina dūrni tanit nining yakat bangkarang. Kaput manna biri biri[18] tahatanama king ūni maintalnama kidika.

⁷Waralaih yamni, uduhna yakurupdinin mani[19] yakat maintalna kalalahwa kidika laih, makat yulnin ūni yakat maintatalna karang, king yaihnit yakat.

⁸Manna king yaihnit yakat awaihdaktanama ki, manna bitik kau tingmana yakat kalbaunin dini dutanama ki, dawak wais kat kalparna bang kidika munah awaihwi bayaknin kulwarang kat, dauna karang. Manna king minikdanamana karang, angkat, angkat kiwarang bik.”

⁹Kalbauyang tanituna balna kidika, sumalyang Joiada yulna kaput yayamna dai. Tunan muihni balna bitik laih, alnina balna taninatuna kakana dai, yak-urupdinin mani kat kawi maintatalwa yaka bik kaput yayamna dai, mahka dawi kalalahwa kidika bik, sumalyang Joiada yakat uiwi isning papakwa dai.

¹⁰Aput laih sumalyang yaklauwi kalbauyang tanituna muihni balna yakat langsa dawak tanitna daknin, king David dini balna dai kidika diana dai, kidika dini balna laih Dawan ūni yakat bangdai.

¹¹Maintalyang muihni balna panina duduna, makatyulnin ūni tingnipal niningkaupak wadahni niningyakat, dawak sakripais busnin pāni awaih kidika biri, witingna kalbaunin dini tingnina yakat duduwādai, king nanitdakna atnin.

¹²Kaput laih Joiada king walanibis kidika yakna dai, dawi king panin pakna, dawak witing minit yakat di walapni utuhwi king āna dai. Usnit kat bitik tingnina tiswi sarahwi yuyulna “¡King sangka ki!”

¹³Atalía dakana, maintalyang muihni balna dawak muih balna kidika yuyulwak parasni, bahang Dawan ūni yakat kiuna, muih balna bitik bangdai yakat.

¹⁴Yakat talna dai king sakkat, yaklauna ū rahni nuhni yaihnit yakat. Yaihnit yakat bangdai tunan muihni balna dawak unbaunin kat paswi yakisdinin muihni balna kidika bik, dawak muih balna kidika alasna manah dai trumpit bik pupuhna. Dawakat Atalía parakni iswi biswi sarahna: —¡Kidika laih alas! ¡Kidika laih alas!

¹⁵Sumalyang Joiada yaklauwi dipakna kalbauyang balna tanituna balna yakat: —¡Akaupak laihta yaktanauh, dawak usnit uiwi kaput yamwarang kat, kuhbil kau itanama! Sumalyang yaklauwi Dawan ūni pasyakat inin awas atna bahang,

¹⁶laihwi aras balna kakawa tani munah king ūni yakat yakwi ihina dai.

¹⁷Usnitkat Joiada yaklauwi pramis yamna, Dawan, king, dawak tawan muihni balna karak, witingna kidika Dawan tawanni as atnin, dawakat, king dawi tawan muihni balna karak bik.

¹⁸Kidika usnit kat Baal kau minitna yuyulwa ūni yakat uiwi wayani sakdai kidika bitik laih tuklalakna, sakripais busnin pāni wiswi babahna dawak daniwan dauh kidika bik. Dawak Baal sumalniyang Matán laih, dinimak dadakna dai sakripais busnin pāni balna muhnit yakat. Kidika kaupak sumalyang yaklauwi muih main talnin ana dai Dawan ūni yakat;

¹⁹kidika kaupak, kalbauyang balna taninatuna, maintalyang muihni balna dawak muih bitik king minikdawi uina, Dawan ūni kaupak, king uni kat, uiwi kakana maintatalwa dūrni munah. Joás tronni yakat yalahna.

²⁰Dawak muih bitik laih alasna duduna. Atalia kidika king ūni yakat isparah kau ihina dai bahang, tawan nuhni kidika isning lakna dai.

²¹Joás kurih tiaskaubu duwa kat king kana dai,