Read Mayangna 2 Reyes 12 Bible Online

2 Reyes 12 - Mayangna bible

2 Reyes 12

¹Jehú king kana kurih tiaskaubu kat adika dini kalahna; Jerusalén yakat kurih 40 king kana dai. Nanangni ayangni laih Sibia, Beerseba kaupak dai.

²Joás di yamna balna kidika Dawan minikpa yakat barangni manah dai, kat sumalyang Joiada yaklauwi sumalna dai bahang.

³Kaput kaunah dawan dauh pāni balna kidika yayakwas bangdai, bahang tawan nuhni balna laih bang sakripais, dawak walapni bik bubuswa dai.

⁴Ma askat, Joás yaklauwi sumalyang balna yakat diyulna: —Manna, Dawan ūni yakat minitdis kalanin dini duahaiwa kidika bitik uduhtanama, dawak muih balna launin duduwa balna kidika bitik, dawakat witingna alas kulninna kau minit dis dini Dawan ūni kau duahaiwa kidika bitik. Lalah laihwi maintalyang balna yakat yultanang manawakat makat yulnin ūni daukalna balna kidika yamtanauh.

⁶Joás king kana kurih 23 laihna kat, bik sumalyang balna baisa prias ūni kidika pis lalakwasdai.

⁷Kaput laih Joás yaklauwi diyulwak aina dai sumalyang Joiada, dawak sumalyang ūk balna bik, bahang aput diyulna: —¿Amput dawak Papang ūni kidika pis laktas manah? Warmani kaupak baisa lalah dutas awanama, lalah duwi maintalyang balna tingnina kaupak; wais duwa sakkat uiwi dana atninki, Papang ūni pislakna atnin.

⁸Sumalyang balna bik aput yamni kukulna dai, baisa lalah dunin awas muih kaupak dawak bik, Papang ūni pislaknin kidika witingna salahnina yakat atnin awas.

⁹Kaput laih sumalyang Joiada yaklauwi lalah punin dini as duwi putnin yakat lahwi sakripais busnin pāni yaihnit tingpal nining yakat lakna dai, Dawan ūni kau muih kakawa nining yakat, dawakat makat yulnin ūni kiwi kawa kau sumalyang balna maintatalwa dai kidika yakat, Dawan ūni lalahni duwi uiwa kidika yakat manah dadawa dai.

¹⁰Tatalwak lalah punin kidika bang-ilwak, king yaihnit kau ulyang kidika, dawak sumalyang nunuhni kalpakwi uiwi Dawan ūni kau lalah sak kidika kikilwa dai; usnit kat di ūni kau pupuwa dai,

¹¹dawak ampus kidika kulwi tatalna usnit kat, Dawan ūni yamyang tanituna balna yakat diayawa dai tat kau ū yamyang balna yakat minitna launa atninna.

¹²Simint kau ū yamyang balna, kipala sahyang balna ū yamnin, bahang kidika kau pan dawak kipala sahna lababanni kidika bakanna atnin prinias ūni pislaknin, lalah kidika yakat manah disnin.

¹³Kidika lalahni Dawan ūni yakat duwi uiwa dai kidika kau duwi lalah sunitak, awas pinin dini balna, sutak nunuhni, trumpit dawak gol dini dawak lalah dini ūk ūk yayamwa dai,

¹⁴wark kalahyang balna taninatuna yakat diayawa dai, kidika kau Dawan ūni pislakna atnin yulni.

¹⁵Kaput lalah diayawa kidika diyulwi dakakawas dai ampus diswa kidika, muih minitna lauwi, kat witingna kidika lakat dai bahang.

¹⁶Waralaih yamni, muih dutni yulni minitdis kalanin lalahni kidika makat yulnin ūni yakat duwi uiwas dai, kat kidika laih sumalyang balna dinina dai bahang.

¹⁷Kidika mani balna yakat, Siria kingni Hazael, Gat[20] nining yakat kalbauwi dakyakna, usnit kat Jerusalén nining yakat kiuna.

¹⁸Kaunah, Judá kingni, Joás witing di maisihni dis balna dai kidika duna; king Josafat, Joram, Ocozías, tatuna kau Judá kingni balna di maisihni dis duduwa balna dai kidika bitik dawak witing duwa dai kidika bik, baisa minit yakat Papang ūni kau gol sakdai kidika, dawak king ūni kau duwa dai kidika bitik uduhwi kalsihna dai Hazael yakat, kaput dawak Jerusalén nining kau kalbauwas dana dai.

¹⁹Joás yulni umani ūk balna kidika laih Judá kingni balna yulnina uhulna wauhnitaya yakat ulna ki.

²⁰Kalbauyang muihni balna taninatuna balna duwa dai kidika yaklauwi, niningkau yaklalauna kaput laih ipapamna Sila kau ū nuhni sak yakat ihina.

²¹Kaput laih Simeat walanibis Josacar, dawak Somer walanibis Jozabad witingna yaklauwi ihina, dawak dauwakat David tawanni nuhni yakat nununa. Usnit kat witing pāni yakat walanibis Amasías king kana.