Read Mayangna 2 Reyes 13 Bible Online

2 Reyes 13 - Mayangna bible

2 Reyes 13

¹Ocozías walanibis Joás king kana, kurih 23 kat, Joacaz walanibis Jehú, king kana dai Israel yak, Samaria yakat manah kurih 17 sak dai.

²Kaunah di yamna balna kidika Dawan minikpa yakat dutni manah dai. Nabot walanibis, Jeroboam dutni yamwak Israel balna bitik yakat talwi yayamna dai kidika, sihm kidika dutni kidika yamna dai, kidika kapat dawi yaklawas dai.

³Kaput dai bahang Dawan kulnin daukalna dai Israel balna niningna kauh, dawak ma mahni laih, Siria kingni Hazael tingni yakat diana dai, dawak walanibis Ben-adad tingni dinit yakat bik.

⁴Kaput laih Joacaz minit yulna Dawan kau, dawak Dawan dakana, kat talna dai Siria kingni kidika ampus Israel balna yakat dutni di yamwa kidika.

⁵Dawakat Dawan yaklauwi Israel balna yakat dilaihwi yaknin muih as dina dai, kaput laih Israel balna kidika Siria parasni dinit kaupak dakwi kalalahna, dawakat watwi kulninna aslah yalalahna dai, muhnilau dai kapat.

⁶Kaput kaunah, Jeroboam sulani balna dutni yayamna kaupak dawi kalalahwas dai, bahang ban dutni yayamna dai Asera kidika Samaria yakat ban sak dai.

⁷Joacaz laih kalbauyang muihni balna 50 manah duwa dai aras kilyang balna, dawak kalbaunin kārni salap, dawak minit yakat kalbauyang ūk duwa dai tausin salap, kidika manah duwa dai Siria kingni yaklauwi bitik iwi dismukna dai bahang.

⁸Joacaz yulni yamni balna dawak di yamna balna dai kidika bitik laih Israel kingni balna wauhninataya yakat ulna ki.

⁹Dauna mani kat, Samaria yakat nununa dai. Usnit kat witing walanibis Joacaz king kana dai, pāni yakat.

¹⁰Judá kingni Joás, king kana kurih 37 kat, Joacaz walanibis Joás king kana dai Israel minit yakat dawakat Samaria minit yakat kurih 16 king kana dai.

¹¹Kaunah di yamna balna kidika bitik Dawan minikpa yakat dutni manah dai, Nabot walanibis Jeroboam dutni yamwak Israel balna yakat talwi usnit uhuina dai kidika, sihm witing kaput ban yamna dai.

¹²Joás yulni umani balna kidika, dawak di yamna balna kidika, amput Judá kingni Amasías niningkau kalbauna dai kidika ulna ki Israel balna kingnina wauhninataya yakat.

¹³Joás dauwakat Samaria yakat nununa, Israel kingni balna karak aslah. Usnit kat pāni yakat Jeroboam king kana.

¹⁴Eliseo siknis kalahna kat daunin manah dai, dawak Israel kingni Joás, kiwi kaltalwi wakaihwi kaidi aput yulna: —¡Yang papangki, yang papangki, Israel niningyakat kalbauyang muihni parasni as kapat man dai kidika!

¹⁵Eliseo yaklauwi kalyulna: —Las as duta dawak sibang bik buas dutah. King las as dawak sibang buas duna.

¹⁶Kaput dawak Eliseo yaklauwi kalyulna: —Mahka sibang as āta ruhmtah. Mahka king kidika yamwakat, Eliseo tingni kidika king tingni minit yakat ilna.

¹⁷Dawi kalyulna: —Ma kilwa kau windar kidi apahta. King yaklauwi apahna, dawak Eliseo yaklauwi pakna: —Waradika, ¡ruhta! King witing ruhna sibang dai kidika. Dawakat Eliseo yulni parasni yulwi yulna: —¡Laihwi yakyang sinibang Dawan kaupak! ¡Sibang laihwi yakyang Siria niningkauh! ¡Man minit bayakma Siria nining yakat Afec pāni yak, dawakat dahn yamma witingna balna kidika!

¹⁸Usnit kat king yakat kalyulna: —Sibang balna dutah. Dudawak, Eliseo yaklauwi pakna: —Waralaih sau yakat bautah. King dai kidika wat bās sau yakat bauna.

¹⁹Dawakat prapit dai kidika king nining yakat anwi aput kalyulna: —Man sau yakat wat singka, kidika awaskat wat tiaskauas baunaman dai kalaih, sirio balna yakat minitna bayakta dismuknam dai; kaunah waralaih wat bās manah minit bayakma ki.

²⁰Eliseo dauwak nununa. Dawakat kurih bitik kau moabita muihni balna dimalyang kalahwi saunina yakat uiwi dai bahang,

²¹ma as kat Israel balna al as dauna kat nuwabangdai, dawak tatalwak, kidika dimalyang balna uiwak, muih dauna dai kidika Eliseo sauni ū pasyakat ruhm'āpamwi kikirana. Dawak muih dauna dai kidika Eliseo muihni yayahni balna karak libitwakat al dai kidika sangka kalwi kalni kau yaklauna.

²²Hazael, Siria kingni, Israel yakat taihwi duna Joacaz sangka mani balna dai yakat.

²³Kaunah Dawan yaklauwi miniknakun ditalna, pramis yamna dai kidika kau kulwi Abraham, Isaac dawak Jacob kau, pramis yamna dai kidika, witingna yakat wiryaklawi ditalna, dismuknin kulwas dai, dawak ruhmwi danin bik kulwas dai witing muhni tani kaupak. Dawakat warmani kaput yamwas ki.

²⁴Hazael, Siria kingni dauna kat, witing pāni yakat walanibis Ben-adad king kana dai.

²⁵Kaput laih Joás, Joacaz walanibis dakyakna dai Ben-adad parasni duwa kidika, dawakat tawan nunuhni, witing papangni Joacaz tingni kaupak dakyakna dai kidika, watwi biriwi dakyakna dai. Dawakat Joás yaklauwi Ben-adad wat bās kalbauwi minit bayakna dai dawakat Israel tawanni nunuhni balna dai kidika watwi duna dai.