Read Mayangna 2 Reyes 14 Bible Online

2 Reyes 14 - Mayangna bible

2 Reyes 14

¹Joacaz walanibis, Joás king kana kurih bu yakat, Joás walanibis Amasías, Judá yakat king kana.

²Amasías kurih 25 laihna kat king kana Jerusalén yakat, kurih 29. Nanangni ayangni laih Joadán, Jerusalén kaupak dai.

³Amasías di yama balna kidika barangni manah dai Dawan minikpa yakat, kaunah David muihni bararak balna kapat laih awas dai. Kaunah sihm papangni Joás yamna kaput yamna dai,

⁴dawak Papang yakat kukulwas balna panina holi kidika yakmukwas dai, bahang tawan muihni balna kidika, kidika yakat ban sakripais dawak busnin walapni bik bubuswi.

⁵Amasías witing parasni yamni duna kat papangni ihina balna kidika bitik imukna dai.

⁶Kaunah kidika balna walaninabis laih iwasdai, kat Moses lani balna yakat ulna kidika Dawan yaklauwi aput pakna dai: “Papangnina balna kidika sip daunin yakat wirlawas karang walaninabis balna yayamna kidika yulni, dawak walaninabis balna yayamna kidika bik papangnina yakat wirlawas karang, kaunah muih bitik laih silp dutni yamna kidika yulni dauna karang.”

⁷Amasías yaklauwi Edomita muihni balna tausin salap īna dai, Kuma Sauni Langni yakat, dawakat Sela kidika kalbauwi dakyakwi duwi, ayangni pakna Jocteel, warmani kat kidika ayangni ban duwi.

⁸Usnitkat yul sihna, Joacaz walanibis Joás Israel kingni yakat, aput kalyulna: “Aiwah, biri biri mamuhki kaltaldarang.”

⁹Kaunah Joás yaklauwi biriwi aput yul kalsihna: “Pan wakal kidika yaklauwi Líbano suhunni yakat kalyulna: ‘Man walambis yal kidika walakibis al yakat kalatah kaput laih witing yalni karang’. Kaunah kidika yakat di anyang as yakut bayakwi wakal kidika taihwi labanpamna.

¹⁰Yang amanglanik ki man lawa edomita balna yakat kalbauta minitna bayaknaman kidika, dawak kidika yulni man manah kapat kaldakaman. Yamni palni, man manah kapat kaldakah; kaunah baisa yamni ki ūma yakat wattah. ¿Ais yulni man silp dutma dawak Judá dutni kidika yakat bik usnin kultaman?”

¹¹Kaput kaunah, Amasías yaklauwi yulni kulwasdai. Kaput laih Joás kidika kalahwi kiuna Amasías niningyakat kalbauna atnin yulni, Bet-semes yakat, kidika pāni laih Judá sauni yakat pakki.

¹²Bahang Judá laih Israel yaklauwi minit bayakna dai, dawak as as kalahwi ūnina kau uina dai.

¹³Israel kingni Joás yaklauwi Bet-Semes yakat Judá kingni Amasías kidika laihwi Jerusalén yakat duwi kiuna, dawak Jerusalén daklana yakat sulihni as yamna, naini laih metro 180, Efraín dūrni kaupak dawak dūrni ūk kidika sipintang yakat.

¹⁴Baisa minityakat, gol lalah balna dawakat Dawan ūni kau di balna bangdai kidika, dawak king ūni kau di bangdai kidika bitik duna dai. Usnitkat muih bik buas laihwi dawi Samaria yakat nawatwi kiuna.

¹⁵Joás yulni umani balna dawak di yamna balna kidika, wār kalbauna kidika Amasías karak, Judá kingni, kidika Israel kingni balna wauhninataya yakat ulna.

¹⁶Dauwakat Samaria yakat nununa Israel kingni balna karak aslah. Usnitkat pāni yakat walanibis Jeroboam king kana dai.

¹⁷Amasías, Joás walanibis, Judá kingni, Joás dauwak usnitkau kurih 15 sangka dai, Joás laih Joacaz walanibis Israel kingni.

¹⁸Amasías yulni umani balna kidika laih, ulna ki Judá kingni balna wauhnitaya yakat.

¹⁹Jerusalén yakat Amasías niningkau yaklalauna dai yakpamna atnin, dawak kalahwi kirana dai Laquis yakat; kaunah uiwi uina dai kidika tawanni nuhni kat laihwi ihina dai.

²⁰Usnitkat laihwi aras minitkau ilwi Jerusalén kat nununa dai David tawanni nuhni yakat.

²¹Kaput laih Judá muih balna bitik Azarías yakat laihwi king ahana, papangni Amasías pāni yakat. Kidika mani Azarías kurih 16 duwa dai.

²²Dawak witing yaklauwi Elat tawanni nuhni kidika yamna, papangni dauwak usnit kauh, dawak dakyakna dai Judá dini atnin.

²³Judá kingni, Joás walanibis Amasías king kana kurih 15 yakat, Jeroboam, Joás Israel kingni kidika walanibis, Israel yakat king kana dai, dawakat Samaria kurih 41 king kana.

²⁴Kaunah di yamna balna kidika Dawan minikpa yakat dutni manah dai, kat Nabat walanibis Jeroboam dutni yamna balna kidika kaupak dawi kalahwas dai.

²⁵Jeroboam watwi Israel sauni kidika lainni dakwi duna, Hamat kaupak Arabá kumani kat, Dawan Israel Papang yulna dai kaput, witing warauni Jonás munah, Amitai Gat-hefer pranipit walanibis.

²⁶Kat Dawan amanglama dai Israel tapalhni wauhna kidika, muih as bik kiri yaklauwas dai, dawakat Israel kidika muih as bik tingnisut laihwasdai.

²⁷Bahang Joás walanibis Jeroboam munah laihwi yakna dai, bahang witing baisa barangni kulwas dai adika sauni kaupak Israel ayangni kidika uswi yakpamna atnin.

²⁸Kaput laih Jeroboam yulni umani balna, witing kalbauwi Hamat dawak Damasco dakyakna kidika Israel sauni[21] atnin, kidika balna bitik kidika Israel kingni balna yulnina uhulna wauhnitaya yakat ulna ki.

²⁹Jeroboam dauwak Israel kingni balna karak aslah nununa. Usnit kat pāni yakat witing walanibis Zacarías king kana.