Read Mayangna 2 Reyes 15 Bible Online

2 Reyes 15 - Mayangna bible

2 Reyes 15

¹Israel kingni Jeroboam king kana kurih 27 kat, Amasías walanibis Azarías king kana dai Judá yakat.

²King kana yakat witing kurih 16 duwa dai, dawakat Jerusalén yakat manh kurih 52 king kana dai. Nanangni ayangni laih Jecolías, Jerusalén kaupak dai.

³Azarías yamna balna kidika Dawan minikpa yakat barangni dai, witing papangni, Amasías yamna balna dai kapat.

⁴Kaput dai kaunah, Papang kau kulwas muihni balna sakripais bubuswa pāni balna kidika yakmukwas dai, bahang muih balna kidika ban kidika pāni balna yakat sakripais, dawak walapni bik bubuswa dai.

⁵Dawan yaklauwi king yakat wah kalana, muihni bitik pilau manah kalahna dauna kat, kaput bahang king witingna kaupak naikau yakpapamna dai, warkni balna bik yamwas dai, dawak witing walanibis Jotam king kana dai.

⁶Azarías yulni yamni balna kidika, di yamna balna bitik kidika, Judá kingni balna wauhnitaya yakat ulna ki.

⁷Azarías dauna mani kat, witing muihnibararak balna karak Devid tawanni nuhni yakat nununa dai. Usnit kat witing walanibis Jotam king kana dai.

⁸Judá kingni, Azarías king kana 38 kat, Zacarías walanibis Jeroboam king kana dai Israel yakat, dawakat Samaria yakat waiku tiaskauas king kana.

⁹Kaunah di yamna balna kidika Dawan minikpa yakat dutni manah dai, muhnilau kau yayamna dai kapat, Nabat walanibis Jeroboam dutni yamwak Israel balna bik yakat talwi dutni yayamna kidika dutni kaupak dawi kalahwas dai.

¹⁰Waralaih Jabes walanibis Salum, niningkau yaklauna witing yakat, Ibleam pāni yakat[22] kaput laih ipamna dai, usnit kat pāni yakat king kana.

¹¹Zacarías yulni umani balna kidika laih, Israel kingni balna wauhnitaya yakat ulna ki.

¹²Dawan yaklauwi Jehú yakat kalyulna kaput kalahna, bahang kalyulna kidika laih: “Man sulama balna kidika Israel kingni yalahnin pāni yakat yalalahna karang, sulama arungka tilahwi kiuna kat praisni.”

¹³Salum, Jabes walanibis, king kana, Judá kingni Uzías king kana kurih 39 yakat. Kaunah waiku aslah Samaria yakat king kana dai.

¹⁴Kat Gadi walanibis Manahem Tirsa kaupak Samaria yakat kiwi, Salum niningkau kalbauwi, ipamwi usnit kat pāni yakat king kana dai.

¹⁵Salum yulni yamni balna kidika, dawak Zacarías niningkau yaklauna kidika, Israel kingni balna wauhnitaya yakat ulna.

¹⁶Kaput laih Manahem yaklauwi Tifsa kidika daukalpamna dai,[23] dawi di bang dai kidika bitik duna sauni paskau Tirsa kaupak, dawak bik yayal muih karuk balna kidika bitik banina pitna dai, kaput yamna dai kat dūr apahwas dadana dai bahang.

¹⁷Judá kingni, Azarías king kana kurih 39 kat, Gadi walanibis, Manahem king kana dai Israel yakat, dawak Samaria yakat kurih salap king kana dai.

¹⁸Kaunah di yamna balna kidika Dawan minikpa yakat dutni manah dai, Nabat walanibis Jeroboam dutni yamwak Israel balna talwi dutni yayamna, kidika kaupak dawi kalahwas dai. Witing mani balna dai yakat,

¹⁹Asiria kingni, Pul[24] yaklauwi kalbauna, Manahem yaklauwi lalah kilo tausin 33 kalana, witing kingkawa sauni kidika tanit parasni yamna atnin yulni.

²⁰Asiria kingni yakat lalah nuhni kaput lauwi kalanin yulni, Manahem yaklauwi lalah duyang muihni balna yakat pakna dai launa atnin kilo papusbah lalah. Kaput laih Asiria kingni mahka nawatwi kiuna dai sauni kau, baisa watwas dai kidika sauni yakat.

²¹Manahem yulni umani balna kidika, dawak di yamna balna bitik kidika Israel kingni balna wauhninataya yakat ulna.

²²Dauwak usnitkat, witing pāni yakat walanibis Pekaía king kana dai.

²³Judá kingni Azarías king kana kurih 15 yakat, Manahem walanibis Pekaía king kana dai Israel yakat, Samaria yakat manah kurih bu king kana dai.

²⁴Kaunah di yamna balna kidika Dawan minikpa yakat dutni manah dai, Nabat walanibis Jeroboam dutni yamwak Israel balna talwi dutni yayamna, kidika kaupak dawi kalahwas dai.

²⁵Kaunah kalbauyang balna taninatuna as ayangni Peka, Remalías walanibis, witing niningkauh yaklauna Galaad kaupak ahal 50 duwi, kaput laih king ūni palni yakat[25] kalbauwi ipamna, usnit kat pāni yakat witing king kana.

²⁶Pekaía yulni yamni balna kidika ulna Israel kingni balna wauhnitaya yakat.

²⁷Judá kingni, Azarías king kana kurih 52 yakat, Remalías walanibis Peka king kana Israel sauni yakat, Samaria pāni yakat manah kurih 20 king kana dai.

²⁸Kaunah di yamna balna kidika Dawan minikpa yakat dutni manah dai, Nabat walanibis Jeroboam dutni yamwak Israel balna talwi dutni yayamna, kidika kaupak dawi kalahwas dai.

²⁹Peka witing Israel kingni mani balna dai yakat, Asiria kingni Tiglat-pileser kiwi dakyakwi duna, Ijón, Abel-bet-maaca, Janoa, Cedes, Hazor, Galaad, Galilea dawak Neftalí sauni kidika bitik, muihni balna bitik laihwi warau tingni yakat dukiuna dai Asiria yakat.

³⁰Kaput laih, Ela walanibis Oseas, Peka niningkauh yaklauna, Remalías, walanibis, dawi ipamna. Kaput yamwi pāni yakat witing king kana, Uzías walanibis Jotam king kana kurih 20 yakat kaput kalahna.

³¹Peka yulni umani balna kidika, dawak di yamna balna bitik kidika, Israel kingni balna wauhnitaya yakat ulna.

³²Remalías walanibis Peka king kana kurih bu kat Uzías walanibis Jotam king kana dai Judá yakat.

³³Kurih 25 duwa kat king kana dai, Jerusalén yakat kurih 16 king kana. Nanangni ayangni laih Jerusa, Sadoc walanibis yal.

³⁴Jotam di yamna balna kidika Dawan minikpa yakat yamni dai, witing papangni Uzías yamna dai kapat.

³⁵Dawan ūni dūrni nuhni kidika yamna dai. Kaput kaunah, dawan dauh pāni balna laih yakmukwas dai, bahang kidika pāni balna yakat ban sakripais buswi, dawak bik walapni bik bubuswa dai.

³⁶Jotam yulni yamni balna kidika ulna ki Judá kingni balna wauhnitaya yakat.

³⁷Kaunah kidika mani balna yakat Dawan yaklauwi sihna dai Judá yakat, Siria kingni Rezín dawak Remalías walanibis Peka bik.

³⁸Jotam dauna mani kat, witing muihnibararak balna karak nununa dai Devid tawanni nuhni yakat. Usnit kat witing pāni yakat walanibis Acaz king kana.