Read Mayangna 2 Reyes 16 Bible Online

2 Reyes 16 - Mayangna bible

2 Reyes 16

¹Remalías walanibis Peka king kana kurih 17 kat, Judá kingni Joram walanibis Acaz king kana.

²Kurih muihasluih laihna dai king kana yakat, Jerusalén yakat kurih 16 king kana; di yamna balna kidika Papangni Dawan minikpa yakat barangni awas dai, muihnibarak David yamna dai kapat.

³Nawatnikauh laih Israel kingni balna yayamna kaput witing bik usnitna uina dai, witing walanibis bik sakripais busna dai, sau ūk muihni balna dutni yayamwak Dawan yaklauwi, Israel balna muhnina kaupak kangwi yakmukna dai kidika.

⁴Baisa kidika minit yakat, dawan dauh pāni yakat sakripais buswi dawakat walapni bik busna dai asang ububulni dawakat, pan nunuhni dinit yakat bik.

⁵Kidika mani balna dai yakat, Siria kingni Rezín, dawak Israel kingni Remalías walanibis Peka, witingna Jerusalén niningyakat uina dai kalbauna atnin. Dawak awaih dadakna Acaz yakat, kaunah sip kawi duwas dadana tawan nuhni kidika.

⁶Kaput dawak Edom kingni,[26] witing Elat tawanni nuhni kidika laihwi duna Edom dinit atnin; dawakat Edom muihni balna uiwi kawi Elat kaupak kangwi yakmumukna Judá muihni balna, kaput laih kidika pāni yakat watwi yalalahna warmani kat.

⁷Kaput dawak Acaz yaklauwi muih sihna Asiria kingni Tiglat-pileser kalyulna atnin witing yulni kidika: “Adika dima yamyang laih walamabis kapat ki. Kaput bahang aiwa yalaihta yakta Siria kingni dawak, Israel kingni tingni munah, witingna nikingkauh kalbabauwi.”

⁸Acaz duna, lalah dawak gol Dawan ūni kau bang dai kidika, dawak king ūni kau bang dai kidika bitik duwi sihna dai Asiria kingni yakat, minit dis kalanin as.

⁹Yulwa yakat dakawi, muih uduhwi kaiwi Damasco niningkauh kalbauwi dakyakna, usnit kat muihni balna dai kidika kang'yakmukna Kir yakat, dawi Rezín kidika ipamna dai.

¹⁰King Acaz Damasco yakat kiuna Asiria kingni Tiglat-pileser karak kalpaknin, bahang talna dai sakripais busnin pāni pakkat. Dawakat sumalyang Urías yakat sihna busnin pāni amput yamnin kidika wayani kau yamwi sihna dai.

¹¹Dawakat Urías witing wayani yamna yakat talwi yamna kaput yamna dai king Acaz Damasco kaupak kalsihna dai kaput, yamwi dahn dana pakdai king Acaz Damasco kaupak kaina kat.

¹²King Damasco yakat kiwi talna sakripais busnin pāni amput yamna dai kidika, yaihnit yakat kiwi pāni yakat sakripais busna dai.

¹³Diminik balna bik sihm kaput busna dai, dawakat sakripais buswa pāni yakat wain bik utuhna dai, dawak sakripais busnin dini ani kau rasna dai.

¹⁴Sakripais busnin pāni bras kau yamna kat, Dawan ūni muhnit kau pakdai kidika, Acaz yaklauwi pa ūk lapamna, sakripais busnin pāni tingpal niningkauh, kat sakripais busnin pāni wisam dawakat Dawan ūni karak walsah yakat pakdai bahang.

¹⁵Usnit kat sumalyang Urías yakat kalyulna mapiris yakat sakripais busna atnin tinglau kau, dawak ma ulahu yakat laih di minik balna kidika busna atnin, king sakripais buswa kidika dawak, minit dis dini di minik kalawa kidika. Kaput bik sakripais dawak, minit dis di minik duwi uiwa kidik, baisa minit yakat wain, bahang tawan bitik laih kaput yayamwarang. Dawak bik kalyulna sakripais buswa dini kidika ani kau duwi rasna atnin pāni minit yakat. Kaunah sakripais busnin pāni bras kau yamna kidika laih Dawan kau diyulwi dakanin manah karang.

¹⁶Sumalyang Urías, king Acaz kalyulna kaput yamna dai.

¹⁷Usnitkat king Acaz yaklauwi rahni balna dai kidika dakmukna dai, dawi was laihnin dini sakdai kidika, turuh bras kau yamna minit kau lakpamna, dawi kipala minit yakat ilsakna.

¹⁸Dawak Asiria kingni karak yamni atnin yulni, Dawan ūni kaupak yakpamna dai, yakurupdinin mani,[27] pa as pakdai kidika, dawak dūr ahnikau king pāni pakdai kidika bik.

¹⁹Acaz yulni umani balna kidika laih ulna ki Judá kingni balna wauhnitaya yakat.

²⁰Dauna mani kat, witing muihnibararak balna karak nununa dai Devid tawanni nuhni yakat. Usnit kat pāni yakat walanibis Ezequías king kana.