Read Mayangna 2 Reyes 17 Bible Online

2 Reyes 17 - Mayangna bible

2 Reyes 17

¹Judá kingni Acaz, king kana kurih 12 kat, Ela walanibis Oseas king kana Israel yakat, dawak, Samaria yakat kurih tiaskauarungka king kana dai.

²Kaunah di yamna balna kidika Dawan minikpa yakat dutni manah dai, kaunah dutni palni bik awas dai muhnilau kau dai kapat Israel yakat.

³Asiria kingni Salmanasar Oseas niningkauh kalbauna, dawak witing dini yamyang kalna.

⁴Kaunah Salmanasar amanglana witing niningkau yaklauwa sak dai kidika Oseas, dawak muih bu as sihna dai Egipto kingni So yakat, dawak bik kurih bani lalah kalawas dai. Kaput dawak Salmanasar yaklauwi pakna Oseas kidika laihwi silak kau ana atnin.

⁵Usnit kat sauni bitik kidika dakyakna dai dawak Samaria nining yakat kiwi kalbauna, bahang kaput laih kurih bās kalbauna.

⁶Witni kat, Oseas king kana kurih tiaskauarungka yakat, Asiria kingni Samaria yakat kawi duna, dawak Israel balna kidika warau tingni yakat laihwi dukiwi Halah pāni yakat dana, Habor sauni pas yakat, Gozán wasni yakat, kidika laih medo balna tawanni nuhni dai.

⁷Adika kaput kalahna dai kat Israel balna yaklau Papangnina Dawan niningkauh dutni yayamna dai bahang, Egipto kaupak diyakna, fero tingni kaupak, Egipto kingni, dawan dauh yakat minitna yuyulna dai

⁸dawakat sau ūk muihni balna yayamwa kidika usnitna uiwi yayamna, bahang kidika muihni balna Dawan yaklauwi ruhmwi dana dai Israel balna munina tani yakat, Israel kingni balna lanina dai kaput.

⁹Kidika minit yakat, Papangnina Dawan niningkauh yul dutni yuyulna dai Israel balna, dawak Papang yakat kukulwas balna panina holi bik yayamna dai tawan nunuhni balna bitik kau, dawak makau kilwi talnin pāni balna yakat dawak tawanni pararasni balna yakat bik sihm yayamna dai.

¹⁰Kipala maisihni dis bik dulalauna dai Asera wayani asang ubulni bitik kau dawak pan nunuhni dinit kau bik,

¹¹sau ūk muihni balna yayamwa dai kidika, dawak Dawan dutni talwi, Israel balna muhnina tani kaupak ruhmwi dana dai kidika, walapni buswi, dutni yayamna kaput yamwi Dawan kulnin daukakalna.

¹²Dawan dauh yakat minitna yuyulna, bahang Dawan yaklauwi yamnin awas diyulna dai.

¹³Prapit balna munah Dawan yaklauwi Israel balna yakat diyulna dai, ta dutni kaupak dawi kalahwi, witing lā sumalna dai kidika muihnina bararak balna kau, kidika lani kat yamna atnin, bahang kidika laih dini yamyang prapit balna munah pakwak yuyulna dai.

¹⁴Kaunah witingna yul dakakawas dai, tapanina dadasni muihnina bararak balna kapat dai, Papangnina Dawan yakat rahm kalkukulwas dai.

¹⁵Lani balna dauh kukulna, dawak pramis yamna dai kidika bik muihnina bararak balna mani kau, dawak lā balna diana dai kidika bik dauh kukulna. Baisa minit yakat dawan dauh balna usnit uhuina dai, bahang kidika yulni praisnina bik disna, yaihnitna kau sau ūk balna yayamwa yakat talwi usnitna uhuina, bahang kidika dini Dawan yaklauwi yamnin awas diyulna dai.

¹⁶Papangnina Dawan lani balna bitik ruhmwi dadana dai, turuh almuk wayani bu yayamna dai bras kau buswi dawak Asera wayani as, dawak baisa minit yakat makau yala balna dawak Baal kau bik minitna yuyulna.

¹⁷Walaninabis ahal, yayal bik bubusna dai, dawak aminwi talnin bik lankakalwa dai, tanit kau di kaiwi kalahwarang dini, dawakat Papang minikpa yakat di dutni manah yayamna, kaput yamwi Dawan kulnin daukakalna.

¹⁸Kaput laih Dawan kulnin daukalwak witing kaupak ruhmwi dana, kaunah Judá sulani manah laih dana dai.

¹⁹Kaput kaunah Judá bik Papangni Dawan lani kat yamwas dai, nawatkauh laih Israel balna lanina ahana yakat yayamna dai.

²⁰Dawan yaklau Israel sulani balna bitik ruhmwi dana dai, dawak dimalyang balna tingnina yakat āna, witing muhni tani kaupak ruhm'yakmukna.

²¹David sulani balna kidika dakwi yakna dai Israel kaupak, dawakat Israel balna Nabat walanibis Jeroboam yakat kingnina ahana, dawak witing yaklauwi yamwak Israel balna kidika baisa Dawan kaupak naikau alahuina dawi uba dutni yayamna.

²²Kaput laih balna dutni Jeroboam dutni yamna kidika bitik, dawak dawas ban yayamna dai.

²³Witni kat Dawan kidika Israel kaupak dawi kalahna, dini yamyang prapit balna munah yulna dai kaput, dawakat kaput laih Israel kidika warau tingni yakat duwi uina Asiria yakat, yakat ban bangki warmani kat.

²⁴Asiria kingni yaklauwi muih duwi kiuna, Babilon, Cuta, Hamat, dawak Sefarvaim kaupak bik, duwi kiwi Samaria tawanni nunuhni balna yakat dana, Israel balna panina yakat. Kaput dawak Samaria sauni kidika kawi duduna dai dawak tawannina nunuhni balna yakat yalalahna dai.

²⁵Kaunah adika muihni balna Dawan yakat prinias yamwas dawi watwi panina duduna mani kat, Dawan yaklau kidika pāni yakat layan sihwak, layan balna yaklauwi witingna kaupak buas yakat kakasna dai.

²⁶Asiria kingni yakat uiwi diyulna: “Muih balna Samaria tawanni nunuhni yakat duyawanaman kidika, panina duna atnin, witingna amanglalawas ki, kidika sauni daniwan kidika, bahang kidika daniwan yaklauwi layan sihwak muih balna kidika di kakaswi.”

²⁷Kaput dawakat Asiria kingni pakna: “Sumalyang laihta duainamana kidika sihtanang kat uiwi, kidika sauni daniwan lani balna sumamalwang.”

²⁸Kaput laih sumalyang as Samaria kaupak laihwi duahaina dai kidika, Betel yakat kiwi pāni duna, kaput laih Dawan kau minitna yulnin disumalna dai.

²⁹Sau ūk balna kidika bitik silp, silp daninawan yayamna panina kat ki, dawak maisihni dis pāni balna asang ubulni tuna kau, Samaria muihni balna yayamna dai yakat ahana dai.

³⁰Babilon muihni balna witingna silp yayamna dai Sucot-benot wayani as, Cuta muihni balna laih, Nergal pāni kaupak as yayamna, Hamat muihni balna laih, Asima kaupak as yayamna dai.

³¹Ava muihni balna, Nibhaz wayani as dawak Tartac wayani as yayamna dai, Sefarvaim muihni balna laih walaninabis bubusna dai sakripais, witingna daninawan dauh Adramelec dawak Anamelec kau.

³²Kidika minit yakat Dawan kau minitna yuyulwa dai, kaunah witingna paskaupak sumalyang balna buas ahana dai, dawan dauh balna panina yakat di yamnin.

³³Dawan yakat prinias yayamna dai karang bik, ban daninawan dauh yakat bik, minitna yuyulwa dai kidika lani balna laih pa ūk lāni kaupak lan kakalna dai, dilaihwi duwi uina muihni balna lanina.

³⁴Warmani balna bik sihm yayamwi, tanit mani kau yayamwa dai kapat, Dawan kau minitna yuyulwaski, lani balna kat bik yayamwaski, lani balna sumalna dai kidika Dawan, Jacob sulani balna kau, bahang adika balna laih ayangni pakna dai Israel.

³⁵Dawan pramis as yamna kat witingna karak, aput yamnin diyulna dai: “Dawan dauh balna yakat mamatna yuyulwinih, dawak bik sakripais bik diayawinih.

³⁶Yang akat prikias yamtanauh, manna Papangmana Dawan yang akat, Egipto kaupak paraski nuhni kau mana yaknayang kidika. Yang akat manah mamatna yulmana ki, dawak sakripais bik yang akat manah yanamna ki.

³⁷Baisa minit yakat, lā balna yakat yamtanauh, lā balna ultik mananayang yakat, dawak dawan dauh yakat mamatna yuyulwinih.

³⁸Damatna kahnin awaski pramis yamnayang kidika, manna karak, dawan dauh yakat mamatna yuyulwinih.

³⁹Yang akat manah, Papangmana Dawan yang akat, dawak yang lakwik waihmanala parasni kaupak malaihtik yakki.”

⁴⁰Kaput kaunah kidika muihni balna yul dakakawas dai, nawatkauh laih muhnilau yayamwa dai kidika ban yayamna dai, Dawan kau prinias yayamwa pasyakat, dawak daninawan dauh yakat minitna yuyulwa dai. Sulanina balna bik sihm kaput yayamna dai, muihnina bararak balna yayamna dai kaput, warmani kat ban yayamwi.