Read Mayangna 2 Reyes 18 Bible Online

2 Reyes 18 - Mayangna bible

2 Reyes 18

¹Ela walanibis Oseas king kana Israel yakat kurih bās kat, Acaz walanibis Ezequías Judá yakat king kana.

²Kurih 25 duwa dai king kana yakat, Jerusalén yakat manh kurih 29 king kana. Nanangni ayangni laih Abi, Zacarías walanibis yal.

³Ezequías yamna balna kidika Dawan minikpa yakat barangni dai, tatuna kau Devid yamna dai kapat.

⁴Witing yaklauwi dawan dauh balna panina yakmukna dai, kipala maisihni dis kidika bahwi dis yamna dai, Asera wayani bik bahna, dawak Moisés bil wayani bras kau yamna dai kidika bik bahna dai, kat Israel balna kidika yakat walapni bubuswa dai, dawak ayangni papakna Nehustán.

⁵Ezequías laih Israel Papangni Dawan yakat yamni kalkulna dai. Judá kingni balna pasyakat, tanit mani kau, dawak usnit kauh bik disdai witing kapat ūk.

⁶Dawan yulni kat dakawi yamna, dawakat bik dawi kalahwas dai witing kaupak, Dawan lani Moisés kau kalana dai kidika yakat yamna dai.

⁷Kidika bahang Dawan witing karak dai, di yamwa bitik kidika yamni manah dai. Ezequías, Asiria kingni niningkauh yaklauna, dawak bik, dawak kaltaihwi duwas dai.

⁸Baisa minit yakat filisteo muihni balna bik minitna bayakna Gaza sauni kiwi watwa kat, makau kilwi tatalwa pāni balna kaupak tawan nunuhni pararasni balna kat.

⁹Ezequías king kana kurih arungka kat, Ela walanibis Oseas laih king kana kurih tiaskaubu dai, Israel kingni, Salmanasar Asiria kingni Samaria tawanni nuhni yakat awaihdakwi kalbauna.

¹⁰Dawak kurih bās kalbauwi dakyakwi kawi duna. Kidika yakat Ezequías king kana kurih tiaskauas dai, dawak Oseas Israel yakat king kana kurih tiaskauarungka dai Samaria dakyakwi duna mani dai yakat.

¹¹Asiria kingni yaklauwi Israel kidika laihwi dukiuna dai Asiria yakat, dawi Halah pāni yakat dukiwi dana dai, Habor sauni pasyakat, dawak Gozán wasni yak, medo balna tawannina nunuhni balna yakat.

¹²Adika kaput kalahna, kat Papangnina Dawan yakat yulni dakawas dadana dai bahang, nawatnikauh laih pramis bayakwi yayamna, yul dakakawas dai Dawan dini yamyang Moisés yulni.

¹³Ezequías king kana kurih 14 kat, Senaquerib Asiria kingni, Judá tawanni nunuhni balna bitik yakat kalbauwi dakyakna.

¹⁴Kaput dawak Ezequías, Judá kingni, muih sihna Asiria kingni yakat, Laquis yakat sakdai, aput kalyulna dai: “Dutni as yamna yang. Yang sauki kaupak data alahwa, ampus minit lautik manik yayulma kat maki.” Kaput laih, Asiria kingni, Ezequías, Judá kingni yakat pakna kalana atnin, lalah tausin tiaskauarungka kilo, dawak, gol kilo 990.

¹⁵Kaput laih Ezequías yaklauwi kalana, Dawan ūni kau lalah ampus bangdai kidika bitik, dawak king ūni kau dai yakat bik.

¹⁶Sihm kidika mani balna yakat, Ezequías yaklauwi, Dawan ūni dūrni kau gol ana dai kidika yakwi Asiria kingni yakat kalana.

¹⁷Usnit kat Asiria kingni yaklauwi, king Ezequías yakat kalsihna kalbauyang balna taninatuna nuhni as, dawak king dini yamyang tanituna nuhni as, dawak kalbauyang tanituna nuhni ūk bik libitwi sihna, kalbauyang muihni pararasni balna taninatuna yakat, adika balna laih Laquis kaupak uina dai Jerusalén yakat, dawak witingna uiwi wawatna was laihwa pāni ma tani niningkauh yakat, ta as asna susuhwa pāni kau kiwa tāni yakat.

¹⁸Usnit kat king yakat kalyuyulna kiuna atnin, dawak Eliaquim laih, Hilcías walanibis, king ūni yakat tunan dai, dawak Sebna laih yul ulyang muihni dai, dawak Asaf walanibis Joa laih king yaihnit yakat ulyang muihni dai, bahang witingna laih kalahwi uina dai kalpakna atninna witingna karak.

¹⁹Kidika yakat, asirio muihni kalbauyang balna taninatuna yaklauwi aput diyulna: —Ezequías yakat adika king yulni kalyultanauh, Asiria kingni: ‘¿Ais kidika man kulnam yakat kaput kultamanh di as mayamwas karang?

²⁰¿Man kultamahn yul yaksihn kidika, sihm kapatyah kalbaunin parasni karak? ¿Ais yakat man sip kaldaka yang nikingkauh lawamahn?

²¹Talayang Egipto ilpma kawa yakat kultaman. Yamniki, Egipto laih suku pitna yayahni kapatki, kidika yakat wais taihwarang kat tingni yakat pawi ahllawarang ki. Kidika ki Egipto kingni, wais witing yakat kulwa kidika muihni.

²²Dawak manna yatwarang kat: Yangna laih Papangkina Dawan yakat yamni kalkultayangna, ¿Ezequías yaklauwi, kidika Papang kau minit yulnin pāni balna yakmukwas dai katpah, Judá muihni balna dawak Jerusalén muihni balna yakat dipakwas daih Jerusalén yakat manah uiwi minitnayulnin?

²³Asiria kingni karak pramis as yamta: yang aras tausin bu maki, dawak kilnin muihni balna laih man walta yakma.

²⁴Man sip awasman, asirio muihni as bik kalyamtang yamaduwi kirinin, ¿dawakat tahataman Egipto kaupak yakna atnam aras dawak muih bik?

²⁵Baisa minit yakat, ¿man kultamanh yang aiwanayang adika sauni nining yakat kalbautik daukalpamnik Dawan sak kidika kultas datik? ¡Witing yaklauwi yapakna adika pāni daukalpamna atnik!’

²⁶Eliaquim, Sebna dawak Joa nangnitlalana asirio muihni yakat: —Kalma dinit yakat bukdi yuldi, arameo yulni kau yulyanabautanauh, kat yangna amanglatayangna. Manna hibru yulni kau yulyanababauwinih, kat daklana makau kilna bangkidika bitik dakakawi.

²⁷Kaunah asirio kalbauyang taninatuna kidika yulna: —Kingmana yakat bik dawak manna yakat bik Asiria kingni sihwaski manayulna atnin; daklana makau muih bang yakat sihna diyulna atnin, kat witingna bik manna kapat, silp bamana kastanama, dawak usumana bik ditanama.

²⁸Kalbauyang balna taninatuna kidika kalni kau yaklauwi, parasni sarahwi yulna hibru yulni kau: —Yamni dakanauh, Asiria kingni nuhni kidika yaklauwi manayulwa kidika:

²⁹‘Datanangkat Ezequías yaklauwi alas manayulnin awaski; witing sip manalaihwi yakwas karang’

³⁰Ezequías witing kulnamna laihnin kulwarang kat manayulwarang aput Dawan yakat rahm kultanauh: ‘Rahm palni laih Dawan yaklauwi mailaihwi yakwarang, witing dawakat adika tawanni nuhni Asiria kingni tingni yakat bukwas karang’,

³¹yulni dakakawinih. Asiria kingni yasihna manna yakat manayulna atnin, kulnin aslah lani duna atnin witing karak, bahang data buktanauh, kaput laih manna bitik wainmana yamak minik balna yakwa kidika kastanama, dawak animana damni bik, kaput bik laih manna silp wasmana kau ditanama.

³²Usnit kat sau ukkau manaduyawaki, manna saumana apat kat, sau as plawar minik dawakat wain yamak bik duwa kidika pāni kat, kaput laih plawar busna yamtanama, dawak wain bik yamtanama, sau as disala dawak, amak bik duwa kidika. Kaput laih yamni sangka awanama dawak dautas awanama. Ezequías yakat laih yulni dakakawinih, Dawan yaklauwi manalaihwi yaknin yulni yulwa kidika laih dauh manah ki.

³³¿Tawan ūk daniwan balna kidika sip laihwi yakna dai katpah Asiria kingni tingni kaupak?

³⁴¿Hamat dawak Arfad witingna daninawan balna kidika angkat bangyah? ¿Sefarvaim, Hena dawak Iva daniwan balna kidika angkat bangyah? ¿Samaria kidika Asiria parasni kidika kaupak dakwi yaknin sipdai katpah?

³⁵¿Kidika dawan balna bitik pasyakat, angdika sipdaih tawanni muihni balna kidika laihwi yakna atnin Asiria kingni tingni kaupak? ¿Manna amput dawak kaput kultamana, Dawan Jerusalén kidika laihwi yakwarang?

³⁶Witingna ap dadana dai, di as bik yuyulwas dai, kat king kidika yaklauwi diyulna dai di as bik yulnin-awas.

³⁷Eliaquim king ūni maintalyang dai kidika kulnin bukna, Sebna yul balna ulyang dai kidika, kaput bik laih Joa witing king yaihnit yakat ulyang sakdai kidika bik, witingna praknina bibisna, dawak king Ezequías yakat uina kalyulna atnin Asiria tanituna yulna kidika.