Read Mayangna 2 Reyes 19 Bible Online

2 Reyes 19 - Mayangna bible

2 Reyes 19

¹King Ezequías, adika yulni dakana kat prakni iswi bisna, dawak asna utuhni kat kāna, dalani wauhwa kidika yulni, usnit kat Dawan ūni yakat kiuna.

²Kaput dawak sihna Eliaquim king ūni maintalyang dai kidika, Sebna yul balna kalahwak ulyang muihni, dawak sumalyang nunuhni tanit muih bararak balna karak, asna utuhni kāwi uina dalani wawauhwa yulni, prapit Amoz walanibis Isaías yakat talna atnin,

³dawak king yulni balna kidika kalyulna atnin: “Warmani dalani as dudi, wah dawak sau yakat bukna as, sihm muih yal as muih bin duwarang kat parasni dis dana kapat.

⁴Yamni karang man Papangma Dawan dakana dai kat, Asiria kingni yaklauwi tunan muihni yaklauwi sihwak kaiwi yulna kidika, Papang sangka yakat usna kidika, yamni karang Papangma Dawan witing silp dakana kidika wah diawarang kat. Mamatyulta baisa watna bang adika yulnina.”

⁵King Ezequías dini yamyang balna dai kidika Isaías yakat talna uina,

⁶Isaías yaklauwi diyulna kingnina yakat uiwi kalyulna atnin aput: “Dawan yulwi: ‘Yamaduduwinih, yang niking kauh yul balna yuyulna kidika, Asiria kingni warauni balna yaklauwi

⁷Talah, yang lawik yul as kalsihtingkat dakawi nawatwi sauni yakat kiuna karang, dawak yamtingkat witing sauni yakat ihina karang.’ ”

⁸Asirio tunan muihni dai kidika dakana, Asiria kingni dai kidika Laquis tawanni nuhni kaupak kalahwi kiuna. Kaput laih Jerusalén kaupak kalahwi kiuna dawak Asiria kingni dai kidika Libna niningyakat kalbauwasakkat kiwi kalpakna.

⁹Kidika yakat dakana, Etiopía kingni Tirhaca kidika witing nining yakat kalahwi kiuna kalbauna atnin. Watwi muih sihna Judá kingni Ezequías yakat kalyulna atnin:

¹⁰“Mana Papangma witing yakat rahm kalkultaman kidika mayulwi Jerusalén kidika yang paraski dinit yakat bukwas karang ki; kauna datang alas mayulnin- awas ki witing kidika.

¹¹Man dakanaman, Asiria kingni balna yayamna kidika sau ūk balna niningna yakat daukalnin kukulna kidika. ¿Mana lāwama kultamanh?

¹²¿Dawan balna kidika yaklauwi laihwi yayakna dai katpah muihkina bararak balna yaklauwi tawan uk balna yakat daukakalna dai kidika: Gozán tawanni, Harán, Resef dawak Bet-edén kau yalalahwa muihni balna Telasar kau yalalahwa dai yakat?

¹³¿Hamat, Arfad, Sefarvaim, Hena dawak Iva kingni balna dai kidika angkat bangyah?”

¹⁴Muih wauhtaya duwi aina dai kidika duna Ezequías, dawak yulwi talna. Usnit kat makat yulnin ūni yakat kiuna dawak, wauhnitaya dai kidika Dawan muhni yakat rina,

¹⁵witing aput minit yulna: “Dawan, Israel Papangni, querubines minitna yakat yalahnam pāni dutaman kidika, man manah Papangman sau kingni balna bitik minitna yakat; man yamnaman makau kisang dawak, sau kidika.

¹⁶Dawan yamni yadakah. Mamakpa sahmuta talah Dawan. Dakah Senaquerib adika yulni balna yasihna kidika, yulni balna kidika laih man namangyakat manah ki, Papang sangka man kidika.

¹⁷Rahmki, Dawan, Asiria kingni balna yaklauwi sau muihni balna bitik iwi dis yayamna dawak saunina bik daukakalna,

¹⁸dawak daninawan balna bik kuhkau bubusna, kat rahm kidika laih Papang balna-awas dai bahang, kidika balna laih pan dawak kipala kau witingna laihwi yayamna dai bahang. Kidika bahang daukakalna dai.

¹⁹Waradika laih Papangkina Dawan, mailaihta yakta kidika parasni kaupak, kaput laih sau kingni balna bitik amanglalana karang man manah Dawan man ūk diski.”

²⁰Isaías yaklauwi yul sihna Ezequías yakat kalyulna atnin: “Dawan Israel Papangni aput yulwi: ‘Yang kau mamat yulnaman kidika dakana yang, Asiria kingni Senaquerib yulna kidika yulni.’ ”

²¹Adika yulni balna Dawan yulna, Asiria kingni yulni: “Sayan tawanni nuhni kidika yal siraubin kapat namangkari, Senaquerib. Jerusalén kidika sarahni yulwi tunan labahn labahn mawi, man mahka data yawangkat.

²²¿Wais nining yakat usnamahn? ¿Wais nining yakat yulma parasni yulta dawak mamakpa bik parasni kaltalnamahn? ¡Israel Papangni maisihni dis nining yakat!

²³Muih sihnaman munah Dawan niningkauh usnaman. Yulnaman: ‘Kar mahni dutayang kidika kau asang tuna balna yakat ilwanayang, Líbano tuna kau maluihni yakat ilwanayang. Suhunni tanit nanaini kidika daknayang, dawak awasni tanit yaksasihn balna kidika. Asangni tuna tanit maluihni yakat ilwanayang, asangnipas balna kidika dipulu dahna pāni kapat kidika.

²⁴Talasyang sauni yakat kuhrting was kalahwak dinayang, yang kalkipas ataktayang kidika kau Egipto wasni balna bik buhlakna atakting kat.’

²⁵¿Kaunah man amanglatasmahn yang Dawan yang kidika, wais yaklauwi yamnayah adika dini balna bitik? Sara mani kau yamnin kulnasakdai, bahang waralaih yamna; kidika bahang man tawan nunuhni pararasni balna kidika daukaltaman, bahta uduhtaman.

²⁶Muihni balna kidika, parasnina dis, yamaduduwi dawak asalni bik kukulwi, sihm asangpas kau dibasta sangni kapat ki, dawak u tuna kau dibasta ukuswa kapat ki, bahang kidika balna laih makilwa niningkaupak wing kaiwa kidika yaklauwi busna ki.[28]

²⁷Man kalitiktaman kidika bitik matalayang dawak yamtaman balna kidika bitik; amanglatayang nikingkauh kulnam daukalnaman kidika.

²⁸Kulnam daukalna kidika dawak kulnam dutni kidika bik amanglatayang bahang, nangmatak yakat di tuyulni as āwitki ki, dawak tamapas yakat aras ahawa dini kidika āki ki, dawak mayamting kat aiwanaman tāni munah nawatta yawama.”

²⁹Kaput laih Isaías yaklauwi Ezequías yakat kalyulna: “Adika laih sainni as karang di balna kalahwarang kidika: adika kurihni dawak kurih ūk yakat bik di kastanama ki, plawar minik witing silp kalahwa kidika, kauna kurih bās laihwa yakat laih dahta yaktanama ki, wain yamak bik yamtanama ki dawak kidika minik kalahwak kastanama ki.

³⁰Judá kau dauwas yaklalawarang balna kidika laih dibasta pan kapat karang ki: rikni laihwarang dawak minik bik yakwarang ki,

³¹buas laih Jerusalén yakat wawatwarang ki; Sayan asangni yakat dauwas yaklalana balna kidika bangkarang ki. Adika laih Dawan parasni nuhni duwa kidika witing dalani lani daihni duwa kidika kau yamna karang ki.

³²“Asiria kingni yulni, Dawan aput yulwi: ‘Jerusalén yakat kawas karang ki, sibang as bik ruhmwas karang ki, nanit daknin kau duwi kiwi kalbauwas karang ki, dawak yaihnit yakat sau uhwi du'kilkiwas karang.

³³Kaina tāni munah nawatwi kiwarang ki; adika tawanni nuhni akat kawas karang ki. Yang, Dawan yang adika, yultayang.

³⁴Adika tawanni nuhni yang tanit dakki ki, dawak laihtik yakki ki, warauki Devid yakat kultayang yulni, dawak yang alas muihki akat bik.’ ”

³⁵Dawan innisal Asirio balna ūnina labanni yakat kiwi muih 185,000 ina dai; payahlawak bitik laih dadauna dai.

³⁶Kaput laih Asiria kingni Senaquerib witing mahka yaklauwi Nínive yakat kiuna dai.

³⁷Ma as kat, witing daniwan Nisroc kau minit yulwa ūni yakat kiuna minityulwa sakkat, witing walanibis Adramelec dawak Sarezer witingna uiwi ihina, usnit kat Ararat sauni yakat kiri uina. Kidika kaupak walanibis Esarhadón kidika king kāna witing pāni yakat.