Read Mayangna 2 Reyes 2 Bible Online

2 Reyes 2 - Mayangna bible

2 Reyes 2

¹Dawan yaklauwi Elías kidika wing as kaiwi mayak duwi kil'kiunin mani kaikana dai yakat, Elías dawi Eliseo karak Gilgal kaupak kalalahna dai.

²Dawakat Elías yaklauwi Eliseo yakat kalyulna: —Akat wattah, kat Dawan yaklauwi Betel yakat yasihna bahang. Kaunah Eliseo yaklauwi kalyulna: —Dawan ayangni kau yaktik yultayang, dawak man ayangma kau bik, alas madatas awakiki. Kaput laih albupak Betel yakat uina dai.

³Kaunah Betel yakat prapit balna yalalahwa dai kidika kalahwi Eliseo karak kalpapakwak, kalyuyulna: —¿Amanglatamahn warmani sumalmayang kidika Dawan yaklauwi madakyakwarang kidika? —Agha, uman amanglatayang —Eliseo yaklauwi yulna—, kaunah manna yul as bik yuyulwinih.

⁴Usnit kat Elías yaklauwi Eliseo yakat kalyulna: —Akat wattah, kat Dawan yaklauwi Jericó yakat yasihwi. Eliseo yaklauwi nangnitlana: —Dawan ayangni kau yaktik yultayang, dakah man ayangma kau bik, alas madatas awakiki. Kaput laih albupak Jericó yakat uina dai.

⁵Kaunah, Jericó kau prapit balna yalalahwa dai kidika, Eliseo tanipas yakat kalahwi, kalpakwi, kalyuyulna: —¿Amanglatamahn warmani sumalmayang kidika Dawan yaklauwi madakyakwarang kidika? —Agha, uman amanglatayang— Eliseo yaklauwi diyulna—, kaunah manna yul as bik yuyulwinih.

⁶Usnit kat Elías yaklauwi kalyulna: —Akat wattah, kat Dawan yaklauwi Jordán yakat yasihwi. Kaunah Eliseo yaklauwi nangnitlana: —Dawan ayangni kau yaktik mayultayang, dawak man ayangma kau bik, alas madatas awakiki. Kaput laih albupak uina.

⁷Kaunah prapit andat papusbah, kalahwi dilaihwawatna dai, apis nailuih, witingna muhnitna yakat; Elías dawi Eliseo karak laih Jordán wasnikung yakat uiwi wawatna.

⁸Elías suruhmnin duwa yakau wirwi laih duwi was yakat wiswakat, was kidika laih pirini nakas nakas dakkalalahna dai, dawak witing albupak dakyaklalana dai sihm sau buhni manah kapat.

⁹Dakyaklalawakat, Elías kalyulna, Eliseo yakat: —Yayultah ais dukih mawih man yaihmat kaupak yadu'yakwas tanitkauh. Eliseo nangnitlana: —Ismang muihni kidika bu libitna praisni kat dukih yawi.[2]

¹⁰—Uba bulah awasyah yayultaman kidika —Elías kalyulna—. Kaunah man yaihmat kaupak yaduwi yakwak yatalma karang kat, mana awaki. Kaput awas karang kat matas awaki ki.

¹¹Dawakat witingna yulbauwīnah uiwatulukat, sirihni palni kuhpau kārni as dawak kuhpau aniras balna bik kalahwi didakyakna dai, dawak Elías makau kisang yakat kilwi kiuna wing purwi wauhwa kapat as kau.

¹²Kidika dini Eliseo talna mani kat, sarahwi aput yulna: “¡Yang papangki, yang papangki, Israel niningyakat kalbaunin muihni parasni as kapat man dai kidika!”[3] Usnit kat, watwi talwas dana dai Elías yakat. Bahang Eliseo prakni kidika duwi bu biswi yakna dai.

¹³Usnitkat, Elías suruhmnin dawak bukna dai kidika, dulauwi, dawi nawatwi Jordán wasni kung yakat kiwi watna.

¹⁴Bahang minitni yakat, suruhmnin dini yakau was yakat wiswi, yulna: “¿Elías Papangni Dawan kidika, angkat sakyah?” Was yakat wisna kidika sahwi kalahna dai dawakat, Eliseo yakut dakyaklana dai.

¹⁵Jericó pranipit balna, muhnit yakat bangdai kidika talwi yuyulna: “¡Elías isningmuih dai kidika, Eliseo muihni yakat duwi!” Witing nining yakat uiwi muhnitani yakat limbabahwi

¹⁶kalyuyulna: —Talah, yangna pasyakat, dima yamyang balna muih 50 bangki, kulninna dadasni yamaduduswas, datang kat uiwi sumalmayang wawalwang, Papang spiritni yaklauwi apakna pa, kidika awaskat asang kau uiwi ruhmlakna pa, kidika awaskat asang sar as kau uiwi lakna pa. Kaunah witing yaklauwi yulna: —Dikah, manna muih as bik sisihwinih.

¹⁷Kaunah witingna yaklauwi wat, wat yuyulwak, witni kat dawakat muih andat papusbah kulninna dadasni balna dai, kidika sisihna dai, kaput laih ma bās wawalna Elías yakna atnin, kaunah yakwas dadana.

¹⁸Jericó yakat nawatwi aiwak, Eliseo bik yakat watna sak kaunah, di yulna: —Yang lawik manayulnayang dai yawanamna awas.

¹⁹Tawan nuhni muihni balna yaklauwi Eliseo yakat kalyuyulna: —Talah tawan nuhni adika pa yamni duwi kaunah, wasni kidika laih dutni, dawakat sauni bik di minik kalahwaski.[4]

²⁰—Sutak wisam as duaiyatanauh, kuma puta —Eliseo diyulna. Sunitak uiwi kalalawak,

²¹Eliseo wastuna yakat yaklakkiwi, kuma ruhmwi āwi, yulna: —Dawan aput yulwi: ‘Wasni kidika yang klin yamnayang, muih as bik dadauwas karangki, dawakat sau bik di minik yakwas awas karangki.’[5]

²²Kidika kaupak dawakat wasni kidika yamni kalna dai, Eliseo yulna kaput.

²³Kidika kaupak Eliseo Betel yakat kiuna. Ta munah kilkiwak, wawahma buas tanipas yakat kalahwi sarahni kalyuyulna witing yakat. Aput sarahwi kalyuyulna: “¡Tun salai, ilwah! ¡Tun salai, ilwah!”

²⁴Eliseo wiryaklawi ditalwi, ladituhna dai Dawan ayangni kau yakwi. Kidika minitni yakat asangpas kaupak dangkatakalbas bu kalahwi wawahma 42 dai kidika imumukna dai.

²⁵Usnitkat Eliseo, Carmelo asangni yakat kiwi dawi yakaupak Samaria yakat kiuna.