Read Mayangna 2 Reyes 20 Bible Online

2 Reyes 20 - Mayangna bible

2 Reyes 20

¹Kidika mani yakat, Ezequías laih siknis palni bukna dai, dawak Amoz walanibis al prapit Isaías yaklau kiwi kaltalwi aput kalyulna dai: —Dawan yaklau yulwi: ‘Man walamabis balna yakat witni yulni kidika disumaltah, kat man laih watta yamni alahwas dauma bahang.’

²Ezequías laih muhni kidika tat daklana kidika yakat muhdawi aput Dawan yakat minit yulna dai:

³“Dawan yang man yakat mayultik kalma dinit buktayang, man kulta dakah ampus barangni dawak alas dis man muhma yakat yamni talaman kidika kat yamnayang kidika.” Dawak dalani dakawi kaidana dai.

⁴Dawak Isaías laih baisa king watakni kidika yakat kalahwas kat, Dawan yaklau Isaías yakat kiwi aput kalyulna:

⁵“Nawatta yawa yang tawanki tanituna Ezequías yakat kalyultah: ‘Dawan, man muihmabarak Devid Papangni yaklau yulwi: Man mamatyulnaman kidika dakanayang dawak mamakwas kidika bik talnayang. Bahang muihma nuhni kidika yamni mayamki ki, dawak ma bas bayakwakat Dawan ūni yakat yawanam sip karang.

⁶Sangmaka kidika baisa kurih 15 maki ki. Man dawak Israel muihni balna kidika bik laihtik yakki ki Asiria kingni tingni kaupak. Adika tawanni nuhni adika yang tingki dinit yakat atik duki ki, yang diki yamyang Devid dawak yang yulki kauna.’ ”

⁷Isaías yaklau muih sihwakat ani damni minik kuruhwi duahaiwakat king muihni angkat dutni kat kidika yakat lakwi sisitwakat yamni kalahna dai.

⁸Bahang Ezequías yaklau Isaías yakat kalyulwi dakana dai: —¿Ais sainni kau amanglakiyah Dawan yaklau yamni yayamwakat ma bas bayakwakat Dawan ūni yakat yawinik sip karang kidika?

⁹Isaías yaklau nangnitlana: —Dawan yaklau adika sainni mawarangki witing pranimis mayamna kidika kat yamwarang kidika talna atnam yulni: ¿Dukih mawih ma sanni ana kidika ta kilitna salap tanit yakat kiuna atnin kidik awaskat dangnit yakauh yaklana atnin?

¹⁰Dawak Ezequías yaklau nangnitlana: —Ma sanni ana kidika tanit yakauh kiunin laih isi ki. Di as dadasni kidika laih dangnit yakauh kiunin kidika.

¹¹Bahang prapit Isaías yaklau Dawan yakat ilp yulna dai, dawak Dawan yaklau yamwakat Acaz ma talwa dini ta kilitna salap yakat ma sanni ana dai kidika dangnit yakauh kiuna dai.

¹²Kidika mani balna yakat, Babilon kingni Baladán walanibis king Merodac-Baladán witing dakana dai Ezequías siknis dai kidika, dawak yul duwi uiyang balna tingnina munah wauhtaya ulna as dawak minit kalkulwas dini as kalsihna dai.

¹³Ezequías laih yuldibauwi dawak lalahni baksni, lalah, gol, kahnin dini walalapni balna, disala yamni, kalbaunin dini balna puwa pāni kidika dawak di punin uk balna bang kidika bitik niningna kana dai. Witing ūni yakat dawak king kawa sauni yakat ais bangdai kidika bitik palni niningna kana dai.

¹⁴Bahang prapit Isaías laih king Ezequías yakat kaltalna kiuna dai dawak kalyulwi dakana: —¿Angkaupak ainayah kidika ahalni balna dawak ais mayuyulna yah? Ezequías yaklau nangnitlana: —Babilon sauni naikaupak palni aina.

¹⁵Isaías yaklau kalyulwi dakana: —¿Dawak ūma yakat ais tatalnayah? Ezequías yaklau nangnitlana: —Ūki pasyakat ais bangkidika bitik tatalna. Di putayang pāni balna yakat ais bangkidika bitik niningnakanayang.

¹⁶Bahang Isaías yaklau Ezequías yakat kalyulna: —Dawan yulni adika dakah:

¹⁷‘Ma balna kaiwarang ki man ūma pasyakat ais balna bang kidika bitik dawak man muihmabararak balna warmani kat ais ududuhna kidika bitik Babilon yakat duwi uina karang ki. Akat laih di as bik watwas karangki.

¹⁸Baisa kidika minit yakat man sulama balna kaupak buas Babilon yakat duwi uiwi, sumanina minik yayakwakat king ūni yakat king dini yayamwarang ki.’

¹⁹Ezequías witing sangnika yakat kulnin aslah lani dawak yamni karang kulwīnah, Isaías yakat nangnitlana: —Dawan kaupak yul duaita yanaman kidika laih yamni ki.

²⁰Ezequías witing yulni umani balna dawak kalbauwi minit yakna tanit yayamni balna kidika, dawak amput was laihnin pāni dawak tawan nuhni yakat was murwi kiunin tani yamna kidika laih Judá kingni balna yaihnitna kau wauhtaya ulyang balna wauhninataya yakat uhulna.

²¹Ezequías dauna mani kat, pāni yakat witing walanibis Manasés king kana dai.