Read Mayangna 2 Reyes 21 Bible Online

2 Reyes 21 - Mayangna bible

2 Reyes 21

¹Manasés witing king kana kat kurih 12 duwa dai, dawak Jerusalén yakat kurih 55 king kana dai. Nanangni ayangni laih Hepsiba dai.

²Kaunah witing di yamna balna kidika laih Dawan minikpa yakat dutni manah dai, bahang Dawan yaklau nisan balna dutni yayamwakat Israel balna muhnina kaupak kang'yakmukna dai kidika witing bik sihm kaput dutni yamna dai:

³witing papangni Ezequías yaklau Papang yakat kukulwas muihni balna panina daukalpamna dai kidika laihwi dulauwi yamna dai; dawan dauh Baal yakat sakripais buswi kalanin pāni balna yamwi kalana dawak Asera wayani bik as yamna dai, sihm Israel kingni Acab yamna dai kapat; baisa kidika minityakat kisang yalani balna yakat minit yulwi dawak prinias bik yamna dai,

⁴dawak Dawan ūni yakat sakripais busnin pāni balna yamna dai, kidika pāni laih Dawan witing ayangni pāni karangki ti yulna dai Jerusalén yakat.

⁵Dawan ūni watakni balna bu kidika yakat sakripais busnin pāni balna yamwi kisang yalani balna bitik yakat sakripais yamna dai.

⁶Baisa kidika minit yakat walanibis ahal[29] balna kidika sakripais busna dai, spirit balna yakat ilp yulna dai, baisa kaikalahwas dini kidika yakwi yulwa dai, dawak spirit lani kidika dawi puisin lani balna kidika laihwi wisamni yamna dai. Di yamna balna kidika Papang minikpa yakat dutni manah dai, bahang Dawan laih kulnin daukalwi witing niningyakat yaklauna dai.

⁷Asera wayani bik as Dawan ūni yakat ana dai, kidika yulni Dawan yaklau Devid yakat dawak walanibis Salomón yakat bik diyulna dai: “Adika makat yulnin ūni Israel sulani balna bitik paskaupak waltik yaknayang adika Jerusalén akat, yang ayangki kidika ban kaput atnin yalahwarang.

⁸Israel muihni balna witingna muihninabararak balna yakat sau dianayang kidika kaupak wattik dikang'yaktas awaki ki, yang lawik yamnin diyulnayang kidika bitik dawak yang diki yamyang Moses disumalna kidika bitik laihwi yayamwarang kat.”

⁹Kaunah witingna laih yul dakakawas dai. Nawatkauh laih Manasés yaklau tanitna kawak baisa dutni yayamna dai nisan uk balna Dawan yaklau Israel balna muhnina yakat didaukalmukna dai kidika karak dawakat.

¹⁰Kaput bahang, Dawan witing dini yamyang prapit balna munah yulbauwi aput yulna dai:

¹¹“Manasés laih dutni mahni yamna kidika yulni dawak witing dutni baisa nuhni yamna kidika amorreo muihni balna witing tanitkauh bangdai kidika karak dawakat, witing yamwakat Judá muihni balna di wayani yakat minitna yulwi dutni yayamna kidika yulni,

¹²yang Israel Papangni Dawan yang adika, lawik yultayang: Dutni wauhnin nuhni as duaiki ki Jerusalén dawak Judá minit yakat, angdika muihni dakawarang kidika laih tapanina dalawarang ki.

¹³Jerusalén kidika laih sihm Samaria dawak Acab sulani balna yakat diyamnayang kaput kalyamki ki; klin kalyamki ki, sihm di lakwi kasnin dini as suhwi abuksakwa kapat.

¹⁴Yang tawanki uk muihni balna kidika laih, diruhmtik datik witingna niningnakauh yaklalauwa muihni balna tingnina yakat āki ki, witingna yaklau dinina balna bitik malwi dawak didakyakna atninna yulni.

¹⁵Kat witingna di yayamna balna kidika laih yang mikpa yakat dutni manah bahang, dawak bik yang kulnik daukalwi aina witingna muihninabararak balna Egipto kaupak kalalahna mani kaupak warmani kat.”

¹⁶Manasés witing yaklau yamwakat Judá muihni balna dutni yayamna kidika dawak Dawan minikpa yakat di dudutni yamna kidika minityakat, dutni yayamwas muihni balna ānina mahni palni utuhwi bahngna dai Jerusalén sutni nakas kaupak sutni uk kat.

¹⁷Manasés witing yulni umani balna kidika, di yamna balna bitik kidika dawak dutni yamna balna kidika bik, Judá kingni balna yaihnitna kau wauhtaya ulyang balna kidika wauhnitaya yakat ulna sak ki.

¹⁸Dauna mani kat, witing ūni yaihnit kau dipulu dahna bang kidika yakat ahana dai, Uza dinipulu balna bang kidika yakat. Usnit kat witing pāni yakat walanibis al Amón king kana dai.

¹⁹Amón laih king kana kat kurih 22 duwa dai, dawak Jerusalén yakat kurih bu king kana dai. Witing nanangni ayangni laih Mesulemet dai, dawak kidika laih Jotba kaupak Hazur walanibis yal dai.

²⁰Kaunah witing di yamwa balna kidika laih dutni manah dai Dawan minikpa yakat, sihm papangni Manasés yamwa dai kapat,

²¹bahang sihm kidika dudutni balna yakat usnit uiwi di wayani balna papangni minit yulna dai kidika yakat prinias yamwi minit yulna dai.

²²Kaput yamwi Dawan yakat dinitkahna, muihnibararak balna Papangnina yakat, dawak witing kulnin lani kat bik di balna kidika yamwas dai.

²³Amón yaihnit kau kalbauyang muihni balna duwa kidika witingna aslah kalahwi niningkauh yaklauwi witing ūni yakat ipapamna dai.

²⁴Kaunah tawan muihni balna kidika laih king Amón niningkauh yaklalauna muihni balna kidika yakat ihina dai, witing pāni yakat walanibis al Josías kidika king ahana dai.

²⁵Amón yulni umani balna kidika dawak di yamna balna kidika bik, Judá kingni balna yaihnitna kau wauhtaya ulyang balna kidika wauhnitaya yakat ulna sak ki.

²⁶Witing sauni ū Uza dinipulu balna dahna bang kidika yakat āpapamna dai. Usnit kat witing pāni yakat walanibis al Josías king kana dai.