Read Mayangna 2 Reyes 22 Bible Online

2 Reyes 22 - Mayangna bible

2 Reyes 22

¹Josías witing king kana kat kurih tiaskaubās duwa dai, dawak Jerusalén yakat kurih 31 king kana dai. Nanangnina ayangni laih Jedida dai, Boscat kaupak Adaía kidika walanibis yal dai.

²Josías di yamna balna kidika laih barangni manah dai Dawan minikpa yakat, bahang witing muihnibarak Devid ais yamna kat kaput yamna dai, kidika kaupak pirini yakat di as bik kalahwas dai.

³Josías king kana kaupak kurih 18 laihna yakat, king witing yaihnitkau wauhtaya ulyang muihni Azalía walanibis dawak Mesulam mani Safán kidika Dawan ūni yakat sihna dai. Aput kalyulna dai:

⁴—Sumalyang nuhni Hilcías yakat yawa kaltalah, dawak kalyultang kat Dawan ūni yakat muih balna lalah duwi uiwakat dūr maintalyang balna ududuhna kidika uduhwang,

⁵dawak Dawan ūni yakat wark minit talyang muihni balna yakat diawakat witingna yaklau makat yulnin ūni yamyang muihni balna yakat minitna lauwi diayawang,

⁶yuldarang kat, tat kau ū yamyang balna, wark tunan duyang balna dawak simint kau ū yamyang balna yakat bik, dawak tat, kipala sahna balna kidika kauna bakakanwakat makat yulnin ūni kidika yamna atnin yulni.

⁷Lalah diawarang kidika bik usnit kat diyulwi dakanin awaski kaltima, kat witingna laih di balna yayamwa bitik kidika barangni ki.

⁸Sumalyang nuhni Hilcías witing Dawan ūni yakat Lā wauhnitaya yakna dai kidika yulni king yaihnitkau wauhtaya ulyang muihni Safán yakat kalyulna dai; dawak wauhtaya kidika kalawakat Safán yulwi talna dai.

⁹Usnit Safán yaklau kidika yulni kidika king yakat kiwi kalyulna dai, aput kalyulna: —King man dima yamyang balna yaklau makat yulnin ūni yakat lalah bangdai kidika buswi dawi Dawan ūni yamnin warkni yakat minit talyang muihni balna yakat diayana.

¹⁰Safán yaklau king yakat kalyulna dai sumalyang Hilcías yaklau wauhtaya as kalana dai kidika, dawak Safán witing king yakat yulwi talwi kalana dai.

¹¹King witing lā wauhtaya yakat yul balna yulwa kidika dakawi, prakni balna kidika iswi bisna dai,

¹²usnit kat Hilcías yakat, Safán walanibis Ahicam, Micaías walanibis Acbor, wauhtaya ulyang Safán, dawak Asaías king yaihnit kau kalbauyang muihni duwa kidika balna yakat yamnin dipakna dai:

¹³—Manna yawa Dawan yakat yulta dakanauh yang yulki, tawan muihni balna dawak Judá muihni balna bitik yulnina, adika wauhnitaya yayakna adika yulni; Dawan laih kulnin daukalna sak kapat ki mayang maniking yakat, kat mayang mamuihkibararak balna laih adika wauhnitaya yulwa yakat dakakawas dawak bik kidika ulna balna yakat[30] laihwi yayamwas dai kidika yulni.

¹⁴Hilcías, Ahicam, Acbor, Safán dawak Asaías kauna witingna prapit yal Hulda yakat talna uina dai, makat yulnin ūni asnina balna apakyang muihni Harhas mani dawak Ticva walanibis Salum yalni kidika yakat. Hulda laih Jerusalén tawanni paskau sau sahyakna bu kidika yakat yalahwa dai, dawak yul kalbabauna mani kat,

¹⁵yal kidika yaklau nangnitnalana: —Adika ki Israel Papangni Dawan biriwi yul sihna kidika: ‘Yang akat yayulta dakana atnamna yulni manasihna muihni yakat kalyultanauh,

¹⁶yang Dawan yang adika lawik yultayang: Dalani wauhnin nuhni as duaiki ki adika pāni minit yakat dawak yalalahwa muihni balna minitna yakat bik, Judá kingni wauhtaya yakat yulwi talwakat amput yulna balna kat kaput.

¹⁷Bahang yaruhmwi dawi dawan uk balna yakat busnin walapni yamni kidika bubusna, witingna dutni yamwi yang kulnik daukalwīnah; kidika yulni kidika pāni niningyakat yang kulnik daukalnayang adika sip laihwatwas karangki.

¹⁸Bahang Judá kingni yaklau Dawan yakat yulta dakana atnamna manasihna kidika yakat kalyultanauh, Israel Papangni Dawan yaklau aput yulwi: Man yul balna kidika yakat tapama lakta dakanaman yulni,

¹⁹dawak adika pāni muihni balna niningna yakat didaukalmuktik ladituhki yulni kidika yultingkat daka kulnam dulauta yang yakat wirlawanaman bahang, dawak prakma balna ista bista yang muhki yakat aidanaman kidika yulni, yang bik madakanayang. Yang Papang yang adika mayultayang.

²⁰Kaput bahang, kulnam aslah duta dauta man muihmabararak balna karak kalpaknam kidika maki ki, dawak man laih adika pāni minit yakat dalani wauhnin duaiki kidika talas awamaki.’ King witing muih sihna balna kidika laih nawatwi uiwi king yakat biriwi sihna yulni kidika kalyuyulna dai.