Read Mayangna 2 Reyes 23 Bible Online

2 Reyes 23 - Mayangna bible

2 Reyes 23

¹Bahang king yaklau Judá dawak Jerusalén muihnibararak balna bitik yakat diyulwakat uiwi witing karak kalududuhna dai.

²Usnit kat king, Judá ahalni balna bitik, Jerusalén muihni balna, sumalyang balna, prapit balna dawak nisan dibin kaupak nuhni kat kidika witingna Dawan ūni yakat uina dai. Kidika yakat king witing parasni yulwi talwi diana dai kalpakwi la yayamna wauhnitaya Dawan ūni yakat pakkat yayakna dai kidika yakat ais yulwa kidika.

³Usnit kat king witing ū rahni yaihnit yakat yaklauwi Dawan muhni yakat pramis kalahna dai, barangni dawak alas lani dis karak witing lani balna dawak kalpakwi la yayamna wauhnitaya yakat ais ulna bang kidika kaput laihwi yamna atnin. Dawak tawan muihni balna bitik bik pramis kidika kaput yamninna yuyulna dai.

⁴Bahang king yaklau sumalyang nuhni Hilcías, sumalyang uk duwa kidika yakat dawak dūr maintalyang balna yakat yamnin dipakna dai, Dawan ūni kidika kaupak dawan dauh Baal, Asera dawak kisang kau yala balna yakat prinias yamwi dunin dini balna kidika yakna atnin, dawak Jerusalén kaupak naikau di dahnin pāni balna Cedrón yakat uiwi busmukna dai, usnit kat wanan balna kidika laih Betel yakat duwi kiuna dai.

⁵Usnit kat Judá kingni balna yaklau Judá tawanni nuhni yakat dawak Jerusalén yaihnit balna yakat Papang yakat kulwas muihni balna panina duduwa dai kidika yakat sumalyang balna walapni yamni busnin bubuswadai kidika Baal yakat, dawak dawan dauh ma, waiku dawak kisang yalani ūk ūk balna yakat walapni yamni busnin warkni diayana dai kidika kaupak bik didakyakna dai.

⁶Jerusalén kaupak naikau yakpamna dai Asera wayani Dawan ūni yakat sakdai kidika, dawak Cedrón wasni kung yakat buswi wanan yamwi muih mahni nunuwa pāni kidika minit yakat wauhna dai.

⁷Muih ahal aslah kalpakwi dutni yayamwa ūni kidika bik tuk'lakpamna dai, kidika laih Dawan ūni yakat sihm prias kapat lan kakalwādai, kidika pāni yakat muih yayal balna kidika dawan dauh Asera kalmukwa asnina nuhni kidika bibiwadai.

⁸Usnit kat Judá tawanni nunuhni balna sumalninayang balna bitik yakat uinin diyulna dai, dawak Papang yakat kukulwas panina balna kidika bitik dutni yammukna dai, Geba kaupak Beerseba kat, kidika pāni yakat sumalyang balna walapni yamni bubuswa dai kidika, dawak spirit dutni balna yakat sakripais buswi kalalawa pāni balna kidika bik tuk'lakmukna dai tawan nuhni kabamintni Josué dūrni yakat bang dai kidika, tawan nuhni kiwi kawa wadah niningkauh.

⁹Kaunah dawan dauh balna yakat minitna yuyulwa pāni sumalniyang balna kidika laih Jerusalén kau Dawan yakat sakripais busnin pāni balna kidika yakat uiwas dai, kaunah plawar pupuhnin dini dis busna kidika kakaswa dai witingna sumalyang uk kaltalyang yamni balna kidika karak.

¹⁰Josías bik dutni kulna dai Ben-hinom asangni sar yakat di busnin pāni sakdai kidika, kaput karak witing walanibis al kidik awaskat walanibis yal kidika muih as bik dawan dauh Moloc yakat sakripais buswi kalanin awas yulni.

¹¹Judá kingni balna witingna aras ahalmuk wayani yamwi ma yakat minitna yuyulwa dai kidika yakmukna dai, kidika balna laih Dawan ūni kiwi kawa yakat bangdai, muih balna ais yuyulwakat yamwa muihni Natán-melec payahwa dai kidika pāni yaihnit yakat, dawak kar as ma wayani yamwi kidika yakat minitna yuyulwa dai kidika bik buspamna dai.

¹²Baisa kidika minit yakat Judá kingni balna yaklau sakripais busnin pāni Acaz ūni ahni panuhni kidika tuna yakat yayamna dai kidika tuk'lakmukna dai, dawak sakripais busnin pāni balna Manasés yamna dai kidika laih Dawan ūni watakni balna yakat; dakyakwi dawak sutni balna watna kidika laih Cedrón wasni yakat ruhm'āmukna dai.

¹³King bik dutni talna dai Jerusalén kaupak ma kilwa niningkauh dawan dauh balna yakat minit yuyulwa pāni bangdai kidika, Olib Asangni[31] kaupak wadah niningkauh yakat, kidika balna laih Israel kingni Salomón yamna dai, sidonio muihni balna daninawan dauh Astarté, moabita muihni balna daninawan dauh wayani Quemós, dawak amonita muihni balna daninawan dauh wayani Milcom dini.

¹⁴Kipala balna dawak pan sarani balna dawan dauh dini yayakna dai kidika bik sahwi bikisni yammukna dai, dawak muih wakalni manah bahngna dai bang atna dai kidika pāni yakat.

¹⁵Betel yakat sakripais busnin pāni dawak dawan dauh balna yakat minitna yuyulwa pāni Nabat walanibis Jeroboam yamna kidika, Israel muihni balna yakat diama kat dutni yayamna kidika, Josías yaklau dakwi kuh pakna dai; dawak Asera wayani dauh kidika bik kuh paknadai.

¹⁶Josías witing nawatwi kiwi talwakat asang yakat sau ū bangkat, dipakwakat kidika yakat wakal balna bangdai kidika yayakwakat sakripais busnin pāni minit yakat dutni diyulwīnah busmukna dai. Kaput laih prapit yaklau Dawan yulni adika yulna dai kidika yakat kalahna dai.

¹⁷Usnit kat yulwi dakana: —¿Kutkau kipala kau wayani yamna kat talayang kidika ais wayani yah? Tawan nuhni ahalni balna kidika yaklau nangnitlalana: —Kidika laih prapit as Judá kaupak kaina kidika sauni ū dawak king man Betel yakat sakripais busnin pāni yakat ais yamnaman kidika yulni balna yulna dai.

¹⁸Bahang Josías yaklau yamnin yulna dai: —Kaput datanauh. Wakalni balna kidika muih as bik laihnin awaski. Kaput laih wakalni balna kidika dawak prapit Samaria kaupak kaina kidika wakalni balna bik rispik yayamna dai.

¹⁹Samaria yakat dawan dauh balna yakat minitna yuyulwa ūni malaluihni Israel kingni balna yaklau Dawan kulnin daukalwīnah yayamna kat bangdai kidika laih, Josías yaklau daukalmukna dai sihm Betel yakat yamna dai kaput.

²⁰Usnit kat sakripais busnin pāni balna kidika minit yakat dawan dauh balna yakat minitna yuyulwa pāni sumalyang balna bangdai kidika īna dai, dawak kidika balna minitna yakat muih wakalni balna kidika busna dai. Usnit kat Jerusalén yakat nawatwi kiuna dai.

²¹King yaklau tawan muihni balna bitik yakat yamnin diyulna dai insal kaiwi bayakna mani kasnin alasnina kidika witingna Papangnina Dawan risnipik yakat, kalpakwi la yamna wauhnitaya yakat amput ulna kat kaput.

²²Israel yakat tunan muihni balna king kakana mani balna kaupak wat as bik insal kaiwi bayakna mani kasnin alasnina apat yayamwasdai, dawak Israel dawi Judá kingni balna mani yakat bik yayamwas dai.

²³Josías king kana kurih 18 laihwa yakat Jerusalén yakat kidika insal kaiwi bayakna mani kasnin alasnina kidika yamna dai Dawan risnipik yakat.

²⁴Josías laih Judá dawi Jerusalén yakat sukia balna, baisa di kaikalahwas kau yakwi yulyang balna, dawak wayani dauh balna yakat prinias yayamwa dai kidika bitik dismukna dai. Josías laih sumalyang Hilcías lā wauhnitaya as Dawan ūni yakat yakna kat yul balna yulwa dai kidika kaput yamna dai.

²⁵Witing tanitkauh dawak usnitkauh bik king as bik dis dai, witing Dawan yakat isning bitik, solni bitik dawak parasni balna bitik wiryaklana kapat, Moses lāni balna yakat.

²⁶Witingna kaput kidika yulni Dawan laih ban kulnin daukalna dai Judá niningyakat Manasés yaklau yamwakat kulnin daukalna dai kidika yulni.

²⁷Kidika yulni Dawan yaklau yulna dai Judá laih witing muhni kaupak yakwarang kidika, sihm Israel yakat yakna dai kapat, dawak Jerusalén tawanni nuhni witing walwi yakna dai kidika dawak makat yulnin ūni yakat witing ayangni yalahwarangki atna dai kidika bik ruhmwi dawarang kidika yulna dai.

²⁸Josías yulni umani balna dawak ais yamna balna bitik kidika laih, Judá kingni balna yaihnitna kau wauhtaya ulyang balna wauhninataya yakat ulna sakki.

²⁹Witing mani balna yakat, Egipto kingni Faraón Necao kidika laih Éufrates wasni kidika niningyakat kiuna dai Asiria kingni yakat ilp kalana atnin yulni. King Josías laih witing niningyakat kalahna dai; kaunah Meguido yakat Necao yaklau kaltalna mani kat, īpamna dai.

³⁰Witing kalabauyang muihni balna yaihnitkau duwa dai kidika laih dauna muihni kidika kar as atuswi Jerusalén yakat duwi uiwi witing sauni ū yakat nununa dai. Bahang tawan muihni balna kidika laih Josías walanibis al Joacaz kidika duwi Papang dini yakwi king ahana dai witing papangni pani yakat.

³¹Joacaz laih king kana kat kurih 23 duwa dai, dawak Jerusalén yakat waiku bas king kana dai. Nanangni ayangni laih Hamutal dai, Libna kaupak Jerimías walanibis yal.

³²Kaunah witing di yamna balna kidika laih dutni manah dai Dawan minikpa yakat, sihm witing muihnibararak balna yayamna dai kapat.

³³Faraón Necao yaklau Hamat sauni Ribla yakat silak kau duwa sakdai, Jerusalén yakat king kanin awas yulni, dawak sauni muihni balna yakat ditaihwi diyamna dai tunan minit launa atninna lalah paun 6,600 dawak gol laih paun 66.

³⁴Baisa kidika minit yakat Faraón Necao laih Josía walanibis Eliaquim kidika king ana dai, witing papangni pani yakat, dawak ayangni kidika wirlawi Joacim pakna dai, dawak Joacaz kidika laih Egipto yakat duwi kiuna dai, dauna pani yakat.

³⁵Joacim laih Necao yaklau lalah dawak gol yulwa dai kidika kalana dai, kidika yaknin yulni laih sauni muihni balna yakat dipakwakat ilpni lani kalalana dai. Dawak tunan minit kidika laih muihnina kat kat ampus launinna kidika lalauna dai lalah dawak gol kau, Faraón Necao yakat kalana atnin yulni.

³⁶Joacim laih king kana kat kurih 25 duwa dai, dawak Jerusalén yakat kurih 11 king kana dai. Nanangni ayangni laih Zebuda dai, Ruma kaupak Pedaías walanibis yal.

³⁷Kaunah witing di yamna balna kidika laih dutni manah dai Dawan minikpa yakat, sihm witing muihnibararak balna yayamna dai kapat.