Read Mayangna 2 Reyes 24 Bible Online

2 Reyes 24 - Mayangna bible

2 Reyes 24

¹Joacim king kana mani balna yakat, kidika sauni kidika Babilon kingni, Nebokatnesar, kawi dakyakna dai, dawak Joacim laih witing tingni dinit yakat kurih bas sakdai. Usnit kat kulnin wirlawi witing niningyakat yaklauna dai.

²Kaunah Dawan yaklau Joacim niningyakat di malyang muihni balna sihna dai caldeos, sirios, moabitas dawak amonitas muihni balna kaupak. Judá niningyakat sihna dai didaukalmukna atninna yulni, Dawan yaklau witing dini yamyang prapit balna munah yulna dai kaput.

³Adika laih Judá yakat kalkalahna dai kat Dawan yaklau kaput yamnin yulna dai kidika yulni, witing muhni kaupak yakna atnin Manasés yaklau di dudutni balna mahni yamna dai kidika yulni,

⁴dawak bik muih dutni yayamwas balna anina utuhwi Jerusalén yakat bangna dai kidika yulni. Kaput bahang Dawan yaklau dutni kidika baisa dawak disnin yulwas dai.

⁵Joacim yulni umani balna dawak ais yamna balna bitik kidika laih Judá kingni balna yaihnitna kau wauhtaya ulyang muihni balna wauhninataya yakat ulna sak ki.

⁶Dauna mani kat witing pani yakat walanibis al Joaquín kidika king kana dai.

⁷Kidika mani kaupak, Egipto kingni kidika watwi witing sauni kaupak kalahwas dai, kat Babilon kingni kidika yaklau witing pani balna bitik dakyakna dai kidika yulni, Egipto wasni kaupak Éufrates wasni kat.

⁸Joaquín laih king kana kat kurih 18 duwa dai, dawak Jerusalén yakat waiku bas king kana dai. Nanagni ayangni laih Nehusta dai, Jerusalén kaupak Elnatán walanibis yal.

⁹Kaunah di yamna balna kidika laih Dawan minikpa yakat dutni manah dai, sihm papangni yamna dai kapat.

¹⁰Kidika mani yakat, Babilon kingni Nebokatnesar kalbauyang muihni balna duwa dai kidika Jerusalén niningyakat uiwi awaihdadakna dai dikalbauna atnin yulni.

¹¹Tawan nuhni yakat kalbauwabang kat, Nebokatnesar laih kiwi kana dai.

¹²Bahang Judá kingni Joaquín, nanangni, yaihnitkau kalbauyang muihni balna duwa dai kidika, tunan muihni balna, yamni dikulwa ahalni balna kauna witingna Babilon kingni yakat kalnidinit bubukwakat silak muihni diduna dai. Adika dini laih Nebokatnesar king kana kaupak kurih tiaskaubās laihwa yakat kalahna dai.

¹³Usnit kat Nebokatnesar yaklau Dawan ūni dawak king ūni lalahni balna bitik kidika pani kaupak yakna dai, dawak Dawan yaklau yulna dai kaput, gol dini balna Israel kingni Salomón yaklau Dawan ūni dini yamna dai kidika bitik bahyamna dai.

¹⁴Usnit kat Jerusalén muihni balna, tunan muihni balna, kalbauyang muihni yayamni balna, di yamyang balna dawak ayan dini yamyang muihni balna bitik laihwi pa uk kau duwi kiuna dai, silak muihni manah 10,000 yakwi kat. Kidika sauni yakat muih as bik watwas dai, muih miniknakunni balna kidika laih pasyakat awi kulwas dai.

¹⁵Nebokatnesar laih Joaquín, nanangni, yalni balna, yaihnit kau kalbauyang muihni balna duwa kidika, dawak kidika sauni yakat nunuhni dikulna muihni balna kidika kauna laihwi pa uk kau duwi kiuna dai. Jerusalén kaupak laihwi Babilon yakat duwi kiuna dai.

¹⁶Kalbauyang muihni tanit nunuhni silak yakat bubukna kat Babilon kingni duwi kiuna dai kidika laih muih 7000 dai; di yamyang balna laih muih 1000 dai dawak ayan dini yamyang balna bik sihm muih 1000 dai, baisa kidika minit yakat muih ahal balna pararasni kidika dawak kalbaunin sip balna kidika bik duwi kiuna dai.

¹⁷Usnit kat Babilon kingni yaklau Matanías kidika king ana dai, witing aniwalas Joaquín pani yakat, dawak ayangni wirlawi Sadequías pakna dai.

¹⁸Sedequías laih kurih 21 duwa dai king kana kat, dawak Jerusalén yakat kurih 11 king kana dai. Nanangni ayangni laih Hamutal dai, Libna kaupak Jeremías walanibis yal.

¹⁹Kaunah di yamna balna kidika laih dutnin manah dai Dawan minikpa yakat, sihm Joacim yamna dai kapat.

²⁰Kidika yulni Dawan yaklau Jerusalén dawak Judá yakat kulnin daukalwi witing muhni kaupak yakmukna dai.