Read Mayangna 2 Reyes 25 Bible Online

2 Reyes 25 - Mayangna bible

2 Reyes 25

¹Usnit kat Sedequías laih Babilon kingni niningyakat yaklauna dai. Sedequías king kana kaupak kurih tiaskauarungka kawak waiku salap laihwak ma salap yakat, king Nebokatnesar laih kalbauyang muihni balna duwa kidika bitik karak kalpakwi Jerusalén yakat kiwi daklawi awaihna dai. Jerusalén muhnit yakat watwi ūni labanni yamwi dawak yaihnit balna kidika laih makau kilwi talnin pani balna yamna dai kidika kaupak kalbauna atnin yulni.

²Tawan nuhni daklana kidika laih Sedequías king kana kurihni 11 kat sakdai.

³Kidika kurihni waiku arungka[32] laihwak ma tiaskauarungka yakat kidika tawanni nuhni kidika yakat yuh lakna dai, dawak muih balna kidika laih kasninna dini dis kalahna dai.

⁴Bahang tawan nuhni daklana balna kidika yakat sulihni as ahalna dai, dawak caldeos muihni balna kidika didaklalana bangdai karang bik, king[33] dawak kalbauyang muihni balna bitik kidika laih tawan nuhni kidika kaupak pukta kikirana dai. Daklana balna walsah kau dur sakdai kidika munah kalalahna dai, king dinipulu balna bangyakat ta kiwa kidika munah, dawak Jordán asangni sar yakat ta kiwa kidika yakat kalalahna dai.

⁵Kaunah caldeos muihni kalbauyang muihni balna kidika laih king Sedequías yakat uiwi lalaihna dai Jericó sauni langni yakat. Kalbauyang muihni duwalik dai kidika balna bitik laih witing yakat ruhmwi dawi ruhwi dislalana dai.

⁶Caldeos muihni balna witingna king Sedequías kidika laihwi Babilon kingni Hamat sauni, Ribla yakat sakdai kidika muhni yakat duwi uina dai. Kidika pani yakat Nebokatnesar yaklau Sedequías niningyakat la yamna dai,

⁷dawak Sedequías muhni yakat king Nebokatnesar yaklau dipakwakat Sedequías walanibis balna kidika dininamak dadakna dai. Sedequías niningkauh laih, dipakna dai minikpa kidika yakwi tingni yakat sin awi Babilon yakat duwi uina atnin.

⁸Babilon kingni, Nebokatnesar king kana kaupak kurih 19 laihwak waiku singka kawak ma tiaskaubu yakat, king yaihnit kau kalbauyang muihni dawak king ūni yakat kalbauyang muihni balna kidika taninatuna Nabuzaradán, witing Jerudalén yakat kiwi kana dai

⁹dawi makat yulnin ūni, king ūni, tawan nuhni ūni balna bitik dawak nunuhni dikulna muihni balna ūnina bitik busmukna dai,

¹⁰dawak kalbauyang muihni balna witing karak bangdai kidika laih Jerusalén tawanni daklawi awaihna dai kidika tuklakpapamna dai.

¹¹Usnit kat Nabuzaradán yaklau tawan nuhni muihni balna wawatna dai kidika dawak king yakat wiryaklalana balna dai kidika kauna dawak di yamyang muihni balna[34] wawatna dai kidika kauna laihwi Babilon yakat duwi kiuna dai.

¹²Muih miniknakunni balna kidika paskaupak muih buas manah dana dai, di dahnin pani balna yakat wain dahwi yakna atninna.

¹³Caldeos muihni balna laih makat yulnin ūni yakat bras kau di yamna balna bangdai kidika bitik bahwi bikisni yayamna dai: ū rahni balna, ū kalni balna, dawak was mahnin dini nuhni sakdai kidika kauna, dawak bras balna dai kidika bitik Babilon yakat duwi uina dai.

¹⁴Wan punin dini balna, subil, ispun nunuhni balna dawak bras dini balna prias yakat dunin dini balna bitik.

¹⁵Kalbauyang balna taninatuna kidika witing gol dawak lalah kau yamna dini balna kidika bitik duwi kiuna dai: kuh tuturni punin dini balna kidika dawak sutak nunuhni balna kidika kauna.

¹⁶ū rahni balna bu kidika, was laihnin dini nuhni kidika dawak ū kalni balna kauna Salomón yaklau yamnin yulwakat yamna dai kidika makat yulnin ūni dini, kidika paunni kidika laih kulwi yaknin sip awasdai.

¹⁷ū rahni as kidika maluihni metro tiaskaubās minit yakat duwa dai, dawak kidika tunan sutni maluihni kidika laih metro bu minit yakat[35] duwa dai bras kau yamna, kidika yaihnit kidika laih bras panani kau lakwi par dawi birna dai. ū rahni bu kidika sihm kapapat dai.

¹⁸Kalbauyang muihni balna taninatuna kidika sumalyang nuhni Seraías, kidika usnit sumalyang Sofonías dawak makat yulnin ūni dūrni kung maintalyang balna muih ahal bas dai kidika bik laihna dai.

¹⁹Tawan nuhni muihni balna kidika kaupak kalbauyang muihni balna taninatuna kidika, king dini yamyang ahalni balna singka, kalbauyang muihni balna laihyang tanituna kidika dawak tawan nuhni yakat yalalahwa muihni balna kidika kaupak 60 laihna dai.

²⁰Nabuzaradán laih adika muihni balna bitik kidika Babilon kingni Hamat sauni Ribla yakat sakdai kidika muhni yakat duwi kiuna dai. Kidika yakat Babilon kingni yaklau dipakna dai īmukna atninna. Kaput laih Judá sauni kidika kaupak Judá tawanni kidika laihwi pa uk kau duwi uina dai.

²²Babilon kingni Nebokatnesar laih Ahicam walanibis dawak Safán mani Gedalías kidika kabamint ana dai, Judá yakat muih balna dana dai kidika taninatuna kana atnin yulni.

²³Dawak Judá yakat kalbauyang muihni balna taninatuna balna kidika dawak kalbauyang muihni balna kauna dakakana kat, witingna Mizpa yakat uina dai Gedalías yakat yul kalbauna. Kidika balna laih Netanías walanibis Ismael, Carea walanibis Johanán, Netofa kaupak Tanhumet walanibis Seraías; dawak Maaca kaupak muih al as walanibis Jaazanías kidika balna dai. Witingna laih kalbauyang muihni balna duduwa kidika karak kalpakwi uina dai.

²⁴Gedalías laih witingna yakat dawak kalbauyang muihni balna yakat bik pramis diyamwi diyulna dai, witingna caldeo muihni kalbauyang balna yakat yamaduninna awas, witingna Babilon sauni yakat watwi Babilon kingni dini yamwi tanitna yakat yamni uiwarang kapat diyulna dai.

²⁵Kaunah waiku tiaskaubu yakat, Netanías walanibis dawak Elisama mani Ismael, witing laih Judá kingni sulani dai kidika, kalbauyang muihni balna salap karak kalpakwi ui kawi Gedalías, ju muihni balna dawak caldeos muihni balna kauna witing karak Mizpa yakat bangdai kidika bitik imumukna dai.

²⁶Bahang muih balna bitik kidika, muihbarak kaupak muihbin kat dawak kalbauyang balna taninatuna balna kidika bik witingna caldeos muihni balna yakat yamaninaduwi Egipto yakat uina dai.

²⁷Judá kingni Joaquín, witing laihwi duwi uina kaupak kurih 37 kawak waiku 12 laihwak ma 27 yakat, witing Babilon yakat king kana dai, king Evil-merodak laih Joaquín yakat dalani kaltalwi silak kaupak yakpamna dai,

²⁸Babilon yakat king uk balna karak bangdai kidia karak dawakat witing yakauh baisa yamni kalyamna dai.

²⁹Kaput laih Joaquín witing sip dai silak yakat prakni balna kawa dai kidika yakmukwi king karak di kasna atnin sangnika bitik yakat.

³⁰Baisa kidika minit yakat, Joaquín laih sangnika bitik yakat Babilon kingni yaklau ilp kalawa dai ma bitik yakat.