Read Mayangna 2 Reyes 3 Bible Online

2 Reyes 3 - Mayangna bible

2 Reyes 3

¹Judá yakat, Josafat king kana, kurih 18 yakat, Israel minit yakat Acab walanibis Joram king kana dai Samaria yakat kurih 12.

²Yamna balna kidika laih Dawan minikpa yakat dutni manah dai, kaunah papangni balna yayamna kaput palni laih awas dai, kat Baal ayangni kau Joram papangni kipala as yamna sak dai kidika yakpamna dai.

³Kaput dai kaunah, Nabat walanibis Jeroboam dutni balna yamna balna dai kidika bitik yamna dai, bahang kidika yamna kaupak Israel balna bik dutni yayamna dai.

⁴Moab kingni, Mesa, witing laih sīp sahyang dai, bahang Israel yakat kalana atnin dai, sīp andat tausin dawakat sīp ahalmuk bik andat tausin, butunina bik.

⁵Kaunah Acab dauna kat, Moab kingni kidika Israel kingni nining yakat yaklauna dai.

⁶Bahang king Joram kidika samaria kaupak kalahna dai dawak Israel muihni kalbauyang balna kidika uduhbangwi talna dai.

⁷Usnit kat, Judá kingni yakat yul sihna: “Moab kingni nikingkauh yaklauna. ¿Sipmahn tingkisut laihtang nining yakat kalbaunin?” Judá kingni yaklauwi nangnitlana: “Tingmasut laihki, yang dawi kalbauyang muih balna dutayang kidika dawak aras kau kilwi kalbauyang balna kidika bik, man karak dawak muihma balna karak bik yangna.

⁸Kaunah, ¿angdika tani munah mawi kalbaudarang yah?” Joram yaklauwi nangnitlana: “Edom kauhnimak wanilang tani munah.”

⁹Kaput laih Israel, Judá dawakat Edom kingni balna, witingna mahka lapakwi uina, kaunah witingna ma tiaskaubu awaihninna dai bahang wasnina witna, kalbauyang muihni balna dawakat tinglau balna bik.

¹⁰Bahang Israel kingni yaklau yulna: —¡Dawan yaklauwi, king bās mayang adika maiduaina kapatki, moabita balna tingnina yakat maiāna atnin!

¹¹Dawakat, Josafat yulwi dakana: —¿Dawan pranipit as disyah akat, witing munah kalyulwi dakana atnin Dawan yakat? Israel kingni kalbauyang balna duwa kidika taninatuna as yaklauwi yulna: —Akat Safat walanibis Eliseo sakki, Elías usnit uiwa dai kidika.

¹²—Kaput kat di as maiyulwarang ki Dawan kaupak —Josafat nangnitlana. Kidika minitni yakat, Israel kingni, Josafat dawak Edom kingni, Eliseo yakat talna uina.

¹³Eliseo yaklauwi Israel kingni yakat kalyulna: —¿Yang man karak ais as talnin dutayang? Yawa papangma balna praninapit yakat yulta dakah. Israel kingni wat, wat yulna: —Dikah, kat Dawan yaklauwi king bās yangna adika yana duaina, moabita balna tingnina yakat bukna atnikna.

¹⁴Eliseo yaklauwi yulna: —Dawan parasni bitik duwa kidika ayangni kau yaktik yultayang, witing mayak yatalwasak kidika, Judá kingni Josafat yakat rispik kalatayang awas kalaih, yultaman kidika dakas awaki, dawak wirlawik bik matalas awaki.

¹⁵¡Paswi yakisdinin pasyang muihni as duaitanauh! Yaihnit yakat duwi uiwak paswi yakisdak, Dawan dai kidika Eliseo yakat kalwak.

¹⁶Eliseo yulna: —Dawan yulna: ‘Was manas nanit daktanauh adika langni akat.

¹⁷Wing diskarang ki, dawak bik manna waslauwak talas awanamaki, adika langni akat was bang'ilwarang ki, bahang manna bitik yakaupak ditanama, dawak tumanaruh balna, amanaras balna bik yakaupak didiwarang.’

¹⁸Adika laih di dibin yamwi namangnakana as ki, kidika minit yakat Dawan yaklauwi manna tingmana yakat āna karangki moabita balna kidika.

¹⁹Dawakat manna lawa daukaltanama tawan nunuhni daklana duwa balna kidika, dawak tawan nunuhni tanit nuhni kakalna balna kidika bik, pan minikyang balna bik daktanama; was burhwa balna bik kalatanang buhlakwarang, dawak di dadahna pāni balna bik kipala manah uhta bangtanama.

²⁰Rahm kidika payahlawak, Edom kaupak minit dis kalanin dini duwa kidika awarni kai'kawakat, was kaina, dawak sau kidika bitik banghilna.

²¹Moab balna uman dakakana dai, king balna uiwa kidika witingna niningna yakat kalbaunin, bahang wawahma, muihbararak balna bitik kalbaunin sip kidika yulwi uduhwi, saunina kiu'watwa yakat uiwi panina duduna.

²²Payahwak mapiris, yaklalauwak, ma yaringni kidika was yaka laihwa, moabita balna tatalna pauni ā kapat.

²³Bahang witingna yuyulna: “Kidika laih ā. Di kalahna kidika laih, king balna biri, biri kalbauwi kalihina. ¡Moabita balna mawanang waralaih di balna dadana kidika dudanang!”

²⁴Kaunah moabita balna kidika, Israelita balna bang dai yakat uiwi kakawak, Israel balna yaklauwi kalbabauwak kikirana. Dawak uiwi, uiwi laihwi ihina.

²⁵Usnit kat, tawan nunuhni balna dai kidika daukakalna, di dadahna pāni balna dai kidika kipala uhwi babangna, wastuna balna bik, pan minikyang balna bitik pipihna. Kir-hareset, tawanni nuhni manah daukalwas dadana. Kaunah kiwah ruhmyang muihni balna awaihdakwi dakyayakna dai.

²⁶Moab kingni talwak, niningkauh kalbabauwa kidika witing karak dawak tanit parasni dai, dawak kalbauyang balna andat tiaskaubu duwi Edom kingni sak kidika nining yakat kalbauwi kalahwi kirinin kulwi yamna kaunah sip yamwas dana witing kulna kaput.

²⁷Kaput dawak walanibis al barakni, witing pāni yakat king kanin dai kidika sakripais karauni kauna busna tawan nuhni daklana makau yakat ilwi. Adika dini laih Israel balna niningna yakat kulnin daukalna nuhni palni kalahna dai,[6] kat ūnina labanni dulauwi mahka nawatwi saunina kau uina dai kidika yulni.