Read Mayangna 2 Reyes 4 Bible Online

2 Reyes 4 - Mayangna bible

2 Reyes 4

¹Yal as dai, bahang witing laih prapit as yalni dai muhnilau kau, bahang Eliseo yakat kiwi kalyulna: —Alki dauna, man amanglataman, Dawan ayangni nuhni yamwa dai witing waralaih lalah wayaki diawa alni dai kaiwi walakibis ahal bu kidika laihtik duyakuhti, warau tingni yakat.

²Eliseo yaklauwi kalyulwi dakana: —¿Ais as yamki yah man namang yakat? Ya yultah ais dutaman uma yakat. Yal dai kidika nangnitlana: —Man dima yamyang adika, ūni yakat di as diski, kaunah disala manah bin apis dutayang, punin pāni yakat.

³Eliseo yaklauwi kalyulna: —Kaput kat waradika yawa, yaihmat kau muih balna yakat sulun wayaki yultang mamawang, ¡sulun pāni manah ampus yaknam sip kidika walta yaktah!

⁴Usnit kat uma yakat, walamabis karak awa, putnin yamni puttah, sulun balna kidika bitik puta bangta silp latanauh.

⁵Yal dai kidika Eliseo kaupak kalparaswi mahka kalahwi kiwi, walanibis karak kawi ūnipas yakat putna. Kaput laih mahka sulun balna pāni manah dai kidika puwi banghna.

⁶Sulun balna kidika bitik banghna kat, diyulna: —Sulun baisa duaitanauh. Kaunah walanibis al kidika nangnitlana: —Sulun diski. Kidika minitni yakat disala kira sa dai kidika laihwatna.

⁷Usnit kat yal dai kidika prapit yakat kiwi kalyulna, dawakat prapit dai kidika yaklauwi biri kalyulna: —Yawa disala kidika wauhta bakanta, lauta kalatah. Sutni bayakwarang kidika laih yakau sangka atnamna sipki man walamabis balna karak.

⁸Mani as kat Eliseo Sunem munah bayakwak, yal as nuhni kalkukulwadai, bahang kidika yalni wat, wat kalyulna kiwi dikasna atnin. Eliseo yakut bayakwa bitik kidika, yakat kawi dikaswa dai.

⁹Kaput laih yal kidika yaklauwi alni yakat kalyulna: —Talah, yang amanglatayang, kidika alni bayakwa bitik yakat kawi maitalwa kidika laih Papang pranipit holi as ki.

¹⁰U yakat payahnin pāni as yamdarang witing payahnin. Dawak pa as di ilwi kasnin pāni as, sini as, dawak awas ildarang. Kaput laih kaiwi maitalwak sipki yakat watwi payahna atnin wingnita puhna atnin.

¹¹Ma as kat kiwi kana kidika pāni yakat kamana atnin.

¹²Dini yamyang Giezi yakat kalyulna: —Sunamita yal yakat yultang kaiwang. Dini yamyang yaklauwi kalyulna, dawakat yal kidika Eliseo muhni yakat kiwi yaklauna, Eliseo yaklauwi dini yamyang yakat pakna:

¹³—Kalyulta, adika yalni yamni maiyamna kidika, sipyah mayang malawi di as yamna atnin witing yakat; ais dukih kalawih witing ilpni yulna atnin king yakat, kidika awaskat kalbauyang balna taninatuna yakat. Yal kidika yaklauwi nangnitlana: —Yang tawanki pas akat yamni yang.

¹⁴—Kaput kat ¿ais dini yamdarang yah witing yakat? Giezi yulna: —Amanglatasyang. Walabis diski, dawakat witing alni bik muihbarak ki.

¹⁵—Yultang ka'kaiwang —Eliseo yaklauwi yulna. Dini yamyang dai kidika yal yakat kiwi kalyulna kaina atnin, kaunah yal kidika dūr yakat kiwi kasakni yaklauna dai.

¹⁶Kaput laih, Eliseo yulna: —Kurih kaiwa kidika yakat, warmani apāt kat, walamabis al as duta awama tingma yakat. Yal dai kidika nangnitlana: —Dikah, dakiwan, Papang alni as man kidika, dima yamyang yakat alas kalyulwinih.

¹⁷Kaunah, Eliseo kalyulna dai kaput, yal kidika muihkaruk dana dai, dawak kurih lapamwak, walabis al as yakna dai.

¹⁸Dawakat muihbin laih barakna. Mani as kat papangni talkuhti kalahwi kiuna, diminik bahyang balna karak likdai papangni kidika.

¹⁹Albin dai kidika parasni sarahna: —¡Alakaih, tunaki! ¡Tunaki dalawi! Kaput dawak papangni kidika yaklau dini yamyang as kau kalyulna: —Nanangni kau duyawah.

²⁰Dinina yamyang dai kidika dulauwi duwi kiuna nanangni sak dai yakat, dawak kalasnimak yakat lakwak yalahna matunak kat. Kaput laih albin dai kidika dauna.

²¹Prapit payahwa pāni yakat du'kilkiwi laktuswi kalahna, dūr yamni putwi dawi.

²²Usnit kat alni yakat yulwak kaiwak kalyulna: —Madiki yamyang as yasihtang kaiwang, biriku as karak, yang prapit yakat talna yawakiki. Usnit kat aiwaki ki.

²³—¿Ais yamta waradika talna yawama yah? —alni yulwi dakana. —Waiku wisam bik awaski, dawakat bik yak-urupdinin mani[7] bik awaski. —Kulwi kalbauwinih —yal kidika yulna.

²⁴Dawakat pakna dai biriku yal kidika dangni ilwi kalana atnin, dawak dini yamyang yakat kalyulna: —Mawang, mahka. Yang mayulki kat, yalaihwatnam awaski.

²⁵Kaput laih yal dai kidika kiuna, Carmelo asangni kat, prapit sak dai yakat. Naikau kaiwak Eliseo talwi, dini yamyang Giezi yakat kalyulna: —Talah, sunamita yal kidika.

²⁶Ira yawa kalpakta, kalyulta dakah ampatpa, dawakat, alni ampat sakpa, dawakat walanibis bik. Dini yamyang dai kidika kiwi kalyulwi dakana, yal yaklauwi yulna yamni bangdai.

²⁷Usnit kat uina asang kau Eliseo sakdai yakat, yal dai kidika Eliseo kalni yakat wakaihna. Giezi yaklau laihtik dakyakkuhti yaihnityak kiwak, Eliseo yaklau kalyulna: —Datah, uba kulnin kaidana, warakat baisa Dawan di as yayulwas ki, di balna kalahwa kidika.

²⁸Yal dai kidika yulna: —Dawan, ¿manyak mayulnayang dai katpah walabis as dunin? ¿Mayulnayang dai awasyang alas yayulnam awas?

²⁹Eliseo, Giezi yakat kalyulna: —Ridi alahwa, tulkinah duta yawah yakat. Muih kalpakma kat, paraswinih; muih as maparaswak, nangnitlawih. Usnit kat tulkinah kidika muihbin muhni yakat lakma.

³⁰Kaunah muih albin nanangni dai kidika Eliseo yakat kalyulna: —Dawan ayangni kau yaktik yultayang man ayangma kau bik, man yawas man kat yawasyang. Kaput laih Eliseo yal yakarak uina dai.

³¹Giezi laih tatuna kiwi, tulnah kidika muih albin muhni yakat lakna dai, kaunah adika sangnika duwa sainni as bik disdai; kaput dawak, Giezi nawatwi kiwi Eliseo yakat kalpakwi kalyulna: —Muihbin kidika sangka kalwaski.

³²Eliseo ū yakat kiwi kawak muihbin kidika uman dauwakat payahnin pāni yakat lalakna tusdai.

³³ū pasyakat kawi dūr putwi dawi, Dawan kau minit yulna. Witing dawi muihbin kidika karak manah ūpas yakat rau dai.

³⁴Usnit kat pa mayakat kilwi, muihbin minit yakat kalangna, witing tinipas kidika muihbin tinipas yaka āna, dawak minikpa, tingni balna bik sihm minit yakat ilwi, witing muihni kidika muihnibin muihni karak libitwi tirisna. Muihbin muihni kidika mahka puihni kalana dai.

³⁵Eliseo yaklauwi kiwi, kaiwi, watwa likdai ū pasyakat, usnit kat watwi muihbin minit yakat kilwi witing muihni dawi muihbin muihni karak libitwi tirisna. Sirihni muihbin kidika wat tiaskaubu isahmna, dawak yakat sahmuhna.

³⁶Eliseo, Giezi yakat yulwak kaiwak, kalyulna: —Sunamita yal kidika yultang kaiwang. Giezi, yaklauwi yal yakat kalyulwak, Eliseo sakyakat kiuna, dawakat kalyulna: —Akat walamabis dutaman kalatna.

³⁷Yal dai kidika yaihnit yakat kiwi, Eliseo kalni yakat bukna; usnit kat walanibis duwi kalahwi kiuna payahwa pāni kaupak.

³⁸Adika usnit kat, Eliseo Gilgal yakat nawatwi kiuna. Kidika mani yuhlakna dai, kidika pāni yakat, watas kat prapit balna Eliseo yaihnit yakat yalahna bangkat, dini yamyang yakat kalyulna: “Suba nuhni kidika kuh yakat ilta di lahtah prapit balna dinina.”

³⁹Witingna kaupak as kalahwi kiuna asangpas yakat dibasta as, as walna atnin, dawak walwi kiwak pan bin as minik duwa sakkat buas dakwi duna, suruhmwa dini kidika buhng dana dai. Dukiwi palatwi suba lahwa sak pasyakat āna dai, ais dini balnapa amanglawa yakauna.

⁴⁰Usnit kat prapit balna yakat lakwi diana, dawakat mahka kaswi sararahna dai witingna: —¡Prapit, di lahna adika puisin duwi! Kawas dadana.

⁴¹Eliseo yaklauwi pakna: —¡Plawar buas duaiyatanauh! Plawar kidika suba pasyakat uhawi dawi pakna: —¡Waralaih kistang muih balna kakaswang! Muih balna kakasna, suba pasyakat uman dutni dis kalna dai.

⁴²Usnit kat, al as kiuna Baal-salisa kaupak Eliseo yakat uiwi kalana plawar wisam palni buswi yakna muihasluih, dawak diminik buas duwi kiuna di puwa dini pasyakat. Eliseo yaklauwi pakna, dini yamyang yakat: —Kistang muih balna kakaswang.

⁴³Kaunah dini yamyang yaklauwi yulna: —¿Amput dini adika muih andat as yakat diaki yah? Eliseo yaklauwi nangnitlana: —Muih yakat diatang kakaswang, kat Dawan yaklauwi yulna, kakaswak sutni bayakwarangki.

⁴⁴Kaput laih, dini yamyang yaklauwi diana, dawak kakasna, sutni bayakna dai, Dawan yulna dai kaput.