Read Mayangna 2 Reyes 5 Bible Online

2 Reyes 5 - Mayangna bible

2 Reyes 5

¹Al as dai ayangni laih Naamán, Siria kingni kalbauyang ahalni duwa kidika taninatuna, kingni yaklauwi yamni dalani kaltalwa dai, kat Dawan yaklauwi Siria yakat kalawak minit bayakna dai kidika alni munah. Kaunah kidika alni laih pilau duwa dai.

²Sirio muihni balna kalahwi kiri awawaihwa dai, Israel balna niningna yakat, bahang muih yalbin as lalaihna dai, dawakat yalbin kidika Naamán yalni dini yamwa dai.

³Yalbin kidika, Naamán yalni yakat kalyulna: —Alma kidika, Samaria kau prapit as sakyakat kiwi talwada kalaih, pilauni kidika kalyamwitdai.

⁴Naamán witing kingni yakat kiwi kalyulna. Yalbin yulna dai kidika.

⁵Siria kingni yaklauwi nangnitlana: —Yamniki, yawa talah, yang Israel kingni yakat wauhtaya as sihki. Kaput laih Naamán kiuna. Lalah dadasni tausin 30 duna, lalah dadasni gol kau yamna kidika tausin tiaskauas, dawak asna kanin salap duwi kiuna.

⁶Dawakat, Israel kingni yakat wauhtaya dai uiwi kalana, aput ulna dai wauhnitaya yakat: “Adika wauhnitaya duma kat, amanglama, Naamán, kalbauyang dutayang kidika taninatuna as ki, bahang sihtayang, pilauni kaupak kalyamna atnin.”

⁷Israel kingni, wauhtaya dai yulwi talwi parakni iswi bisna kulnin bukwak, dawak yulna: —¿Yang, Papang yang kat pāt, sangnika kalawa kidika, dawak bik dakyakwa kidika, bahang adika al as yasihwi pilauni kaupak yamni kalyamnik? ¡Yamni talnauh, dawak talnama nikingkauh di as walwi!

⁸Prapit Eliseo dakana, king parakni iswi bisna kidika, wauhtaya kalsihna kidika yulwi talwi, bahang aput yul sihna: “¿Ais yamta prakma ista bisnamahn? Kidika alni yang akat kaiwi yatalwang, kaput laih amanglana karang Israel akat prapit as sak kidika.”

⁹Naamán, kārni dawi aniras balna duwi kiwi, Eliseo ūni dūrni kung kat kiwi watna.

¹⁰Kaunah Eliseo muih as sihwak kiuna kalyulna atnin: “Yawa kalsuhtah wat tiaskaubu Jordán wasni yakat, dawakat muih kidika pilau kaupak yamni alahwama.”

¹¹Naamán kulnin daukalwi, yulwinah kiuna: —Yang kulnayang laih kalahwi yatalwarang, dawak kasakni Papangni Dawan kau kalyulwarang, usnit kat tingni kau siknis laihna pāni yakat salapwarang dawakat kaput laih pilauki kaupak yamwarang kulnayang.

¹²¿Damasco wasni balna kau tanit yamni awasyah, Abana dawak Farfar kidika, Israel wasni balna bitik dawakat? ¿Sip awas dai kidika wasni balna yakat yawik suhtik klin alahwinik? Yakaupak kasak kulnin daukalwi kiuna.

¹³Kaunah dini yamyang balna yaihnit yakat uiwi kalyuyulna: —Dawan, prapit yaklauwi di yamnin dini sip-awas kidika mapakna kat, ¿man sip yamtas awama daih? Dauh manah mayulna, man yawa kalsuhta klin alahwama.

¹⁴Naamán kiwi, wat tiaskaubu umitwi kalahna Jordán wasni yakat, prapit kalyulna dai kaput, witing muihni kidika wahmabin kapat kalahna, klin kalna dai.

¹⁵Kaput dawak, witing dawak as balna yakabik kalpakwi Eliseo yakat talna uina. Uiwi kakawakat, Naamán yaklauwi kalyulna: —¡Waralaih rahm amanglatayang, sau bitik pasyakat Papang ūk diski, kaunah Israel yakat manah sakki! Kaput bahang, kalma dinit yakat buktik yultayang, dimayamyang, di mawa kidika dutah.

¹⁶Kaunah Eliseo yaklauwi nangnitlana: —Dawan ayangni kau yaktik yultayang, yatalwa sak kidika, sip dutas awaki. Naamán wat, wat yulna kaunah, Eliseo dunin yulwas dana.

¹⁷Kaput dawak Naamán yulna: —Datang kat Israel sauni adika, muyul dangni bu iltik duyawakuh; man dima yamyang adika watwi sakripais buswas karang dawan dauh bala yakat, kaunah Dawan yakat manh sakripais buswarang.

¹⁸Di aslah, Dawan kalni dinit yakat buktik yultayang, dutki kidika manah dawak diswarang: king kidika Rimón prinias ūni yakat minit yulna kiwarang kat, tingki yakat laih dawi kiwak, yang bik kidika prinias ūni yakat limbabahki kidika, Dawan yaklauwi kidika yamki kidika dawak diswarang.

¹⁹Eliseo yaklauwi nangnitlana: —Ismang lakyawah. Naamán yakaupak mahka kiuna. Umani apis lapakwi kiuna kat,

²⁰prapit Eliseo, dini yamyang Giezi kulna: “Dakiwan yaklauwi Naamán yaka dawak kiuna di duaina kidika as bik duwas. Dawan ayangni kau yaktik yultayang, sirihni palni uitik yawik talki, witing kaupak ais as yakki pa.”

²¹Giezi kalahwi Naamán yakat uiwi kiuna; dangnit kaupak kaiwak talwi, watwi kārni kaupak yaklakwi kalyulwi dakana: —¿Di dutni as kalahwih?

²²Giezi yaklauwi: —Di diski, kalatna. Kaunah dakiwan yaklauwi yasihwi mayulna atnik man yakat, prapit wawahma bu aina Efraín asangni kaupak, bahang kalma dinit yakat bukwi yulwi, lalah dadasni tausin bās, dawakat asna kana bu yatah mati.

²³Naamán nangnitlana: —Lalah dadasni tausin tiaskauas dutah. Naamán wat, wat kalyulna duna atnin, di punin dini bu duwi puwi kalana asna balna karak libitwi, adika dini, diniyamyang balna bu yakat kalana, Giezi yakat uiwi kalana atnin.

²⁴Asang tuna yakat uiwi kilwi kalalahwak, lalah duwi uiwa kidika Giezi duwi ūpas yakat apakwi, ahal balna dai kidika nawatwi sihmukwak uina.

²⁵Usnit kat Eliseo yakat kiwak, kalyulwi dakana: —¿Giezi, angkaupak aiwamahn? Giezi kalyulna: —Yang pa asbik alahwas yang.

²⁶Kaunah Eliseo watwi kalyulna: —Al as kārni kaupak yaklakna dai, man yakat, man karak yang dai kulnik kau. Kaunah waradika lalah dunin mani awaski, asna bik, wain yamak, sīp, turuh, warau bik bakannin mani awaski.

²⁷Kaput bahang Naamán pilauni kidika man, dawak sulama balna kau bik manalana karang ban kaput atnin. Giezi Eliseo yaihnit kaupak dawi kalahkiwak, uman pilau pihni manah dai, mukus bukwa kapat.