Read Mayangna 2 Reyes 6 Bible Online

2 Reyes 6 - Mayangna bible

2 Reyes 6

¹Mani askat, prapit balna Eliseo yakat kalyuyulna: —Talah, pa aslah mayang bangmayang adika uba pāni dibin ki mayang.

²Yanadatang kat Jordán wasni yakat pan dutik ū paktik yalahtanakuh. Eliseo diyulna: —Yawanauh.

³As kalahwi kalyulna: —Miknadatah. —Yamni ki mamaknadaki —diatna witing.

⁴Eliseo, witingna karak kalpakwi kiuna, Jordán wasni kat, yakat mahka pan dadakna.

⁵Pan as pihwak, ki dai kidika tingni subitwi was pasyakat kawi kiuna. Dawakat sarahna: —¡Alakaih, sumalyang! ¡Kini kidika muih dinina kat wayaki diayana dai!

⁶—¿Angkat kakiuna yah? —prapit yaklauwi kalyulwi dakana. Uk yaklauwi pāni niningkana. Kaput laih Eliseo pan as dakwi was yakat ruhm'āwak, ki dai kidika uruhnwi kilkalahna.

⁷Eliseo yaklauwi pakna: —Laihta dulauta. As dai kidika tingni uhrwi dukiwi laihwi dulauna.

⁸Siria kingni kidika, Israel karak kalbabauwa dai, bahang kalbauyang duwa kidika taninatuna balna manah uduhwi yulwi daka, angdika pāni yakat kiwi watwi ū lababanni pakwarang kidika.

⁹Eliseo muih kau yul sihna, Israel kingni yakat kalyulna atnin, kidika pāni munah bayaknin awaski, kat sirio balna kidika pāni munah bayayakwarang ki.

¹⁰Kaput laih Israel kingni witing kalbaunin muihni balna duwa kidika, prapit kalyulna yakat sihwas dai, kaput laih wat-manas yaklana dai sirio balna kaupak.

¹¹Siria kingni witing amanglawas dai, kidika yulni kalbauyang balna taninatuna uduhwi diyulna: —¡Yayultanauh, mayang kaupak wais kidika Israel kingni yakauh wiryaklawih!

¹²As kalahwi nangnitlana: —Kingki, muih as diski. Kaunah Eliseo, prapit as Israel yakat sak kidika yaklauwi, Israel kingni yakat kalyulwi yulbautaman kidika bitik, dawak bik payahtaman pāni kau ais kidika bitik.

¹³Kaput laih Siria kingni yaklauwi pakna: —Walta talnauh angkat sakpa, kaput laih muih witing lalaihwarang. Dotán yakat sakki kalatwak,

¹⁴muih sihna aras kilyang muihni balna, war kalbaunin kārni dawak, kalbauyang kalkau uiwa muihni balna mahni sihna, kaput laih Dotán yakat pukta uiwi kakana, tawan nuhni kidik awaihdaklalana.

¹⁵Payahwak mapiris Eliseo dini yamyang kidika yaklauwi kalahwi talna dai kalbauyang muihni balna awaihdadakna kidika tawan nuhni kalbaunin kārni, aras kilyang muihni balna; kaput laih Eliseo yaklauwi kalyulna: —Waralaih sumalyang, ¿ais yamdarang yah?

¹⁶Eliseo yaklauwi nangnitlana: —Yamaduwinih, mayang karak bangyakauh mahni ki, witingna karak bangkidika karak dawak.

¹⁷Dawak Eliseo Dawan kau minityulwi aput kalyulna: “Papangki kalma dinit yakat buktik yultayang, mamakpa sahmuta talah.” Dawan yaklauwi, Eliseo dini yamyang aras kau manah kilna bangdai, dawak kār kuhpau manah Eliseo yaihnit yakat awaih dai.

¹⁸Sirio muihni balna mahka kalbauna mahamawang atwak, Eliseo Dawan kalni dinit yakat bukwi yulna: “Mayultayang adika muihni balna miniknapa puksani yamta.” Dawan yaklauwi miniknapa puksani yamni dai Eliseo yulna yakat.

¹⁹Kaput dawak, Eliseo yaklauwi diyulna: —Adika tani awaski, dawak bik, tawan nuhni waltamana kidika adik awaski. Usnit uitanauh, yang manaduyawaki, alni waltaman muihni yakat. Dawak Samaria yakat duwi kiuna dai.

²⁰Yakat kiwi kuihwi, Eliseo aput minit yulna: “Waralaih, Dawan, miniknapa uluhtang tatalwang.” Witingna tatalwak Samaria pasyakat bangdai.

²¹Israel kingni talwi kalyulwi dakana Eliseo yakat: —¿Imukki yah, papangki, imukki yah?

²²Eliseo yaklauwi yulna: —Dikah, iwinih. ¿Man, ismaparah dawakat lasma kau waihmala laihtaman kidika itaman kat pah? Di diatang kakaswang, didiwang, usnit kat, daniwan kau sihmukta.

²³Alasna nuhni yamwak kaswi, diwi dadana. Usnitkat sihmukna, dawakat witingna daninawan kau uina. Kaput dawak, sirio muihni balna, Israel sauni yakat awawaihwa dai kidika dadana.

²⁴Usnit kat, sirio kingni Ben-adad, kalbauyang muihni balna duwa kidika bitik uduhwi duwi kiwi Samaria yakat awaihwi dakna, kalbauna atnin.

²⁵Kidika mani balna yakat, Samaria yakat yuhlakna, biriku tunan as kidika, minit laih lalah dadasni 80, dawakat buhtuku bani[8] litro kaupak sahyakna arungka kidika, minit laih lalah dadasni singka.

²⁶Ma askat Israel tawan daklana minit munah bayakkiwa likkat, yal as sarahwi kalyulna. —¡King, tingkisut laihta!

²⁷King nangnitlana: —Dawan tingmasut laihwas kat, ¿amput yang yamwang yatimahn? ¿Wain dawak, diminik bik manik sipyang katpah?

²⁸¿Ais malaihwih? Yal yaklauwi nangnitlana: —Yal sak adika yayulna walakibis kidika kalating warmani kasnikna, dawakat yahan mani laih witing walanibis kidika kasnikna.

²⁹Kaput laih walakibis kasnayang. Payahwakat kalyulna yang, walanibis kidika kasnikna, kaunah malpamna.

³⁰King kidika dakawi, asnina iswi bisna, anwi. Daklana minit yakat sakbang, muih kaltatalna, asna tubakni kana sak kidika.

³¹King yaklauwi parasni yulna: “¡Papang wah dadasni palni yana karang, warmani, Safat walanibis Eliseo tunan daktas yang kat!”

³²Eliseo, ūni yakat yalahna sakdai, muih bararak balna karak. King yaklauwi ahal sak kidika as yakwi sihna. Kaunah king al as sihna kidika baisa kiwi kawas kat Eliseo muih muihbararak yakat diyulna: —Talnauh, muih iyang adika, muih sihna tunaki dakna atnin. Kaunah yamni amangta talnauh, muih sihna kidika kaiwi kawak dūr puttanama, nining yakat laihwatta dutanama, kat dangnit yakat daniwan kaiwa kidika laihki lapakwak.

³³Baisa witingna karak yulbauwa sak kat, muih sihna dai kidika Eliseo muhni yakat yaklauwi yulna: —Dutni kidika yangna minitna yakat Dawan yaklauwi sihna bahang, ¿witing kaupak ais baisa tahaki yah?