Read Mayangna 2 Reyes 7 Bible Online

2 Reyes 7 - Mayangna bible

2 Reyes 7

¹Eliseo nangnitlana: —Dawan yulni kidika dakah. Dawan yulwi: ‘Yahan mani adika awarni kat, Samaria kiwi kawa yakat bakannin sip awama plawar litro tiaskaubu, lalah dadasni as kaupak, dawak lalah dadasni as kaupak cebada litro 15 bakannin sip awanama.’

²King tingnisut laihyang yaklauwi prapit yakat nangnitlana: —Dawan makau kisang kau winnidar kidika apahwarang bik yultaman kaput laih kalawas karangki. Eliseo yaklauwi nangnitlana: —Bahang man laih mamakpa kau talma, kaunah kidika kaupak kastas awama.

³Tawan nuhni kaiwi kawa dūrni kau yakat, pilau muihni balna arungka raudai, bahang witingna aput yuyulna: —¿Akat ais yamdi, yalahdi tani tahadi, daunin kidika?

⁴Tawan nuhni pasyakat mahawang atdarang kat, daudarang ki, kat yuh manah sakki pasyakat, akat yalahdi bangmawarang bik daudarang ki. Sirio balna ūnina lababanni yakat bayakmawanang, maīwas dadawarang kat, sangka mawarang; mai- ihiwarang kat, mayang daunin kidika laih ban mayang.

⁵Kaput laih mapuk dawakat, sirio balna bangyakat uina; yaihnit yakat uiwi amanglalana muih as bik disdai.

⁶Dawan yaklauwi di parasni kalawak yulni as yulna kalbaunin kārni mahni aiwa kapat, wār aniras mahni kidika kapat, dawak bik kalbauyang muihni mahni uiwa kapat; sirio muihni balna kukulna, Israel kingni yaklauwi, hitita kingni dawak Egipto kingni balna yakat yulwak aiwi niningnakauh kalbabauwa kapat kukulna.

⁷Kaput dawak yaklauwi kikirana puklakna yakat ūnina labanni, aninaras, birininaku, dawak dini ampat bang dai kidika yakat dawi kikirana sangka kiri yaklanin yulni.

⁸Pilau muihni balna, sirio balna ūnina labanni yakat uiwi kawi di kaswi, diwi ahana; lalah, gol, dawak asna duwi uiwi malbabangna.

⁹Kaunah usnit kat biri, biri yulwi dakakana: —Yamni yamdaski. Warmani laih yul yamni kidika dukiunin mani, kauna mayang laih yuldas ap-dadi. Yahan kau tahadarang kat dutni yamna mayang mayatwarang. Kau yamni ki king ūni yakat mawi yuldarang kat.

¹⁰Kaput dawak, makau kilwi tawan maintalyang balna yakat uiwi diyulna: —Sirio balna ūnina lababanni yakat yawik talnayangna muih as bik diski; muih as bik yulbauwak dakadaski. Aras dawak biriku balna manah sisitna bangki, dawak ūnina lababanni papakna dai yakat ban bangki.

¹¹Tawan nuhni dūrni maintalyang balna yaklauwi king ūni kau yakat diyuyulna.

¹²Kaput dawak king yaklauwi pukta yakauna, kalbauyang balna taninatuna duyang balna yakat diyulna: —Yang lawik yamni manayulki, sirio balna ais maiyamnin kukulwa kidika. Witingna nuki yuh wauhda kidika bahang ūnina labanni kaupak dawi kalahwi yakmamaldana, witingna kukulwa kidika, tawan nuhni kaupak dadi malahwak sangka mailaihwi dawi tawan nuhni yakat kawarang.

¹³Kauna kalbauyang balna tanina tuna as yulna: —Ahal buas sihnin aras singka kidika kau, bahang taldarang ais kalahwarangpa. Sangka karang, kidika awaskat dadauwarang pa, tanit dutni, yamni bik awas karangki, Israel balna baisa watda adika akat.[9]

¹⁴Kaput laih kār bu aras sitna kauna duwi king yaklauwi sihna sirio balna bangdai panina yakat lakwi talna atnin.

¹⁵Sirio balna uina kalnina yakat talwi ūnina Jordán kat, bahang tatalna, tapas yakat asna manah dai, dawakat di ūk balna bik ruruhmna manas sirihni kiri yaklauwi kikirana yakat. Usnit kat king sihna balna dai kidika nawatwi aiwi kalyuyulna witingna tatalna kidika bitik.

¹⁶Usnit kat, muih balna kalahwi sirio balna dinina dai kidika bitik duduna. Dawan yulna dai kaput, plawar kidika litro tiaskaubu kat, lalah dadasni as minit bakakanna, dawakat cebada laih litro 15 kat lalah dadasni as minit bakakanna.

¹⁷King witing tingnisut laihwa muihni yakat pakwa tawan kiwi kawa kidika maintalna atnin, kaunah muih balna yaklauwi atakwi ihina prapit yulni dai kaput, king kiwi kaltalwak.

¹⁸Prapit, king yakat kalyulna dai kaput kalahna, Samaria kiwi kawa yakat bakakanna karang, plawar litro tiaskaubu, kidika awaskat cebada litro 15 kat lalah dadasni as minit.

¹⁹Kalbauyang balna taninatuna prapit yakat nangnitlana, Dawan yaklau makau kisang winnidar kidika apahwarang bik, kaput laih sip kalahwas karang. Eliseo yaklauwi nangnitlana: “Man alas mamakpa kau talma, kaunah kidika dini balna kastas awama.”

²⁰Rahm kaput kalama, tawan nuhni kiwi kawa yakat muih yaklauwi atakwi ihina.