Read Mayangna 2 Reyes 8 Bible Online

2 Reyes 8 - Mayangna bible

2 Reyes 8

¹Eliseo yulbauna yal as walanibis dauwak watwi sangnika kalana dai kidika yalni karak, kalyulna dai, witing dawak walanibis balna bitik pa ūk yakat uiwi yalahna atnin, kat yuh parasni lakwarang kidika Dawan uman yulna dai bahang kidika sauni yakat kurih tiaskaubu praisni.

²Yal dai kidika prapit yul kalyulna dai yakat yamna: yakaupak dawi kiuna filisteo balna saunina yakat yalahna kurih tiaskaubu.

³Kidika mani balna bayak kiwa kat, yal kidika watwi filisteo balna saunina kaupak nawatwi kaina, dawakat king yakat kiwi kaltalna, ūni dawak sauni bik watwi kalana atnin yulni.

⁴King kidika Giezi karak yulbauwa raudai, prapit Eliseo dini yamyang karak, king yaklauwi kalyulna dai, Eliseo di taldas dini yamna balna kidika yulwak dakana atnin.

⁵Kidika minitni yakat Giezi yaklauwi king yakat kalyulwa sakdai, Eliseo amput yal as walanibis dauwak, watwi dulauna dai kidika bahang yal dai kidika kiwi kawi king yakat kalyulna, ūni dawak sauni kidika watwi kalana atnin. Kaput dawak Giezi yaklauwi king yakat kalyulna: —King, adika yalni, dawak adika kuduh walanibis al, dauwakat Eliseo watwi sangnika kalana dai kidika.

⁶King yaklauwi yal yakat yulwi dakana, dawakat yulni umani balna dai kidika bitik kalyulna. Usnit kat king yaklauwi, kalbauyang balna taninatuna as[10] kau pakna yal yakat dini balna dai kidika kalana atnin, kalahwi kiuna kaupak adika mani kat witing sauni kaupak ampus diminik yakna kidika bitik kalana atnin.

⁷Usnitkat Eliseo Damasco yakat kiuna. Kidika mani balna yakat, Siria kingni Ben-adad siknis tusdai, dawak kalyuyulna prapit kiwi kana kidika.

⁸Kaput laih yaklauwi Hazael yakat kalyulna: —Minit dis dini as duta prapit yakat yawa talah. Kalyultang kat Dawan yakat yulwi dakawang sikninis akaupak kalyamwarang pa.

⁹Hazael prapit yakat talna kiuna, dawak Damasco kau diminik tanit yayamni yakwa kidika dukiwi kalana prapit yakat, kiamil muihasluih bu trukwi duwi uiwi kalana. Witing muhni yakat kiwi kalyulna: —Siria kingni, Ben-adad, papangni kapat matalwa kidika, yasihna mayultik dakanik sikninis kaupak kalyamwarangpa.

¹⁰Eliseo yaklauwi nangnitlana: —Yawa kalyultah, sikninis kaupak kalyamwarang ki, kaunah Dawan yayulna witing kidika banki daunin.

¹¹Sirihni palni Eliseo yaklau Hazael yakat kaltalna, wāk kaldakanin yulni kaput kalyamna dai. Usnit kat prapit kidika kaidana dai,

¹²dawak Hazael kalyulwi dakana: —¿Ais yamta aidaman dakiwan? Eliseo yaklauwi nangnitlana: —Amanglatayang Israel yakat dutni kalyammaki, kalbaunin pāni kidika kuh kau busmaki, wawahnima balna kidika isparah kau imaki, dawak dibinina yaka bik imaki, dawak yayal muih duduwa kidika.

¹³Hazael yaklauwi nangnitlana: —¡Kaunah, yang laih sul almuk minikunni karak tanit bik awasyang! ¿Bahang amput yang kaput yamki yah? Eliseo yaklauwi nangnitlana: —Dawan yaklauwi nikingkana, man kidik Siria kingni awamaki.

¹⁴Hazael laih Eliseo yakat kalparaswi mahka kiuna dawi kingni muhni yakat yaklauna dai dawak king yaklau aput kalyulwi dakana: —¿Eliseo yaklau ais mayulnayah? Hazael yaklau nangnitlana: —Man sikmanis kidika kaupak yamni mayamwarang ki yatna.

¹⁵Payahwakat Hazael kiwi asna as duwi was suihwi dawi, king muhni yakat lakwak dauna. Usnit kat pāni yakat Hazael king kana.

¹⁶Acab walanibis Joram, Israel yakat king kana kurih singka laihwa kat, Josafat walanibis Joram king kana Judá yakat,

¹⁷king kana yakat kurih 32 duwa dai, dawak Jerusalén yakat kurih tiaskaubās king kana.

¹⁸Kaunah Israel kingni balna yayamna kaput usnitna uina dawak Acab sulani balna yayamwa kaput bik, kaput Dawan minikpa yakat dutni manah yamna.

¹⁹Kaunah Dawan Judá kidika daukalnin kulwas dai, dini yamyang David yakat kulwa kidika yulni, witing yakat kalyulna dai muhni yakat[11] bang duwarang awas dahlna as.

²⁰Joram king kana yakat, Edom, Judá nining yakat yaklauna dai, dawi witing silp kingni āna dai.

²¹Kaput dawak Joram kiuna Zair yakat, kalbaunin kārni balna bitik duwi, dawak pukta niningkau yaklalauna, dawak kalbaunin kārni balna tunan duyang balna dai kidika, edomita balna awaihdakna bangdai niningna yakat kalbabauwak kikirana.

²²Kaunah, Edom kidika silp alas kalahna Judá karak warmani kat. Sihm kidika mani balna yakat Libna tawanni nuhni kidika silp alas kalahna.

²³Joram yulni umani balna kidika Judá kingni balna wauhninataya Israel kingni balna yulnina uhulna yakat ulna ki.

²⁴Joram dauwakat papangni balna karak nununa David tawanni nuhni yakat. Usnit kat walanibis Ocozías king kana pāni yakat.

²⁵Acab walanibis Joram Israel yakat king kana kurih 12 kat Joram walanibis Ocozías Judá yakat king kana.

²⁶Kurih 22 duwakat king kana dai, Jerusalén yakat kurih as king kana dai. Nanangni ayangni laih Atalia, Israel kingni Omri sulani dai.

²⁷Ocozías laih Acab usnit uina dai, dawak sulani balna karak aslah kalpapakna dai kidika yulni Acab ūni paskau balna yakarak, witing di yamna balna kidika Dawan minikpa yakat dutni manah dai.

²⁸Ocozías laih, Acab walanibis Joram karak aslah kalalahna dai, Siria kingni Hazael nining yakat kalbaunin, Ramot kau Galaad pāni yakat. Kaunah sirio balna Joram yakat tutusna dai.

²⁹Dawakat witing Jezreel yakat nawatwi kiuna kat Ramot pāni yakat, Siria kingni Hazael nining yakat, kalbauwak muihni yakat kalina dai kidika yamna atnin. Joram kidika siknis tusbang Ocozías talna kiuna dai Jezreel pāni yakat.