Read Mayangna 2 Reyes 9 Bible Online

2 Reyes 9 - Mayangna bible

2 Reyes 9

¹Prapit Eliseo yaklauwi prapit balna bang kidika kaupak as yulwak kaiwak kalyulna: —Mahka ridi alahwa, alahwanam. Dia banital adika duta, Galaad kau Ramot yakat yawah.

²Yakat yawama kat, Josafat walanibis Jehú kidika walma, Nimsi mani. Witing sak yakat āwayawa, kaltalyang balna karak aslah bang kidika kaupak yakta, payahnin pāni ūk kau duyawama.

³Kaput dawak, dia batal kidika duta tunani yakat utuhta aput yulma: ‘Dawan aput yulwi: Yang man yakat mayaktayang Israel kingni atnin.’ Usnit kat dūr apahta laihwattas irama.

⁴Prapit wahma dai kidika Galaad kau Ramot yakat kiuna.

⁵Yakat kiwi kawi talna, kalbauyang balna taninatuna kidika kaluduhna bangdai. Bahang yulna: —Kalbauyang balna taninatuna yakat di as kalyulnik ki. Jehú yaklauwi nangnitlana: —¿Bangyangna paskaupak angdika? Prapit yaklauwi kalyulna: —Man.

⁶Usnit kat Jehú yaklauwi, payahnin pāni ūk yakat kawi kiuna. Kaput laih prapit yaklauwi dia kidika tunan yakat utuhwi aput kalyulna: —Dawan, Israel Papangni yulwi: ‘Yang lakwik Israel kingni mahatayang, yang tawanki.

⁷Kaput laih damawan Acab sulani balna kidika bitik dahn yamma, kaput laih yang diki yamyang balna, prakipit balna ānina utuhna Jezabel yaklauwi, bahang biri kalyamna as karang.

⁸Acab wanaihni balna bitik laih dadauna karang; Israel kau ahal kidika bitik dahn yamkiki, as bik sangnika karuk datas awakiki.

⁹Jeroboam Nabat walanibis sulani balna kau yamna yang kaput, Acab sulani balna kau bik yamkiki, dawak Ahías walanibis Baasa yakau yamnayang kaput bik yamkiki.

¹⁰Dawak Jezabel niningkau laih witing muihni kidika sul balna kakasna karang Jezreel pāni yakat, muih as bik diskarang laihwi nuna atnin.’ Adika yulni yulwi usnit kat, prapit dai kidika dūr apahwi kalahwi kirana.

¹¹Dawak Jehú witing daniwan yaihnitkau kalbauyang balna bang dai kidika yakat kiwakat, kidika balna yaklau kalyulwi dakakana: —¿Ais kalahwih? ¿Ais yulni kidika muihni tunani dutni kidika matalna kainayah? —Jehú yaklau yulna: —Bahang manna laih amanglatamana, dawak witing amput yulbauwa kidika bik amanglatamana.

¹²Witingna yaklauwi kalyuyulna: —Alas yanayulwinih. ¡Yanayultah bitik ki! Kaput laih, Jehú yaklauwi nangnitlalana: —Dawan aput yulwi: ‘Yang lakwik king mahatayang Israel yakat.’

¹³Kidika minitni yakat, suruhmninna duduwa kidika kalni yakat ririna. Usnit kar, turuh tamni puhwi, sararahna: “¡Jehú laih king!”

¹⁴Josafat walanibis Jehú, Nimsi mani, Joram nining yakat yaklauna. Joram witing Israel balna karak, Galaad kau Ramot yakat nanitdakwa sakdai, sirio kingni Hazael kai'kawi kalbauwak,

¹⁵kidika kaupak nawatwi Jezreel yakat kiuna dai, Hazael niningkauh kalbauwa kat, muihni yakat kalina balna dai kidika yamna atnin yulni. Bahang Jehú witing kaltalyang yamni balna duwadai yakat diyulna, manna rahm witing kidika kingmana atnin dukih manana dai kat, tawan nuhni paskaupak datanang muih as bik kalahwi kiwi Jezreel yak yul yulnin awasdai.

¹⁶Usnit kat kalbaunin kārni yakat kilwi, Jezreel yakat kiuna, bahang yakat Joram yaklauwas tusdai, payahwa pāni yakat. Judá kingni Ocozías bik, Joram yakat talna kiuna dai.

¹⁷Makau kilwi tawan maintalwa kidika muihni Jezreel pāni kau, Jehú kiwi uliswak talwi sarahna: —¡Muih aiwi! Bahang Joram yaklauwi pakna: —Muih as sihtanang aras kau kilwi kiwi yulwi dakawang, witing kulnin aslah walwi kaiwapa.

¹⁸Kaput laih aras kilyang dai kidika Jehú yakat kiwi kalyulwi dakana: —King yaklauwi yulwi dakawi, man kulnin aslah yulni kulta aiwaman pa. Jehú nangnitlana: —Kidika pasyak man āwanam diski. ¡Yang dangkit yakat lawah! Kaput dawak makau kiwi maintalyang dai kidika isningnapakna: —Muih yulwi duwi kiuna, uman kiwi kana, kaunah nawatwi kaiwak taldaski.

¹⁹Kidika minitni yakat king yaklauwi muih ūk yakwi sihna aras kau, bahang kiwi diyulna: —King yulwi dakawi, kulnin aslah lani kulta aiwamahn. Jehú nangnitlana: —Kidika pasyakat man āwanam diski. ¡Yang dangkit yakat lawah!

²⁰Makau kilwi maintalyang dai kidika watwi isningna pakna: —As dai kidika bik witingna yakat kiwi kana, kaunah nawatwi kaiwak taldaski. Kār paskau tunan kawi kaiwa kidika laih Nimsi mani Jehú kapatki, kat kār wauhwi kaiwa kidika, laih sinsni dis kapat pini wauhwi duaiwi.

²¹Kaput laih Joram, yaklauwi pakna: —¡Kalbaunik kārni kidika sitta yatanauh! Kārni ridi yamwi kalalana, dawak, Israel kingni Joram, Judá kingni Ocozías karak kārnina silp silp kilwi kalahwi uina, Jehú karak kalpakna atnin. Kaput laih, Jezreel kau Nabot pāni yakat, Jehú sakkat uiwi kalpapakna.

²²Joram, Jehú yakat talwi kalyulna: —¿Kulnin aslah yulni kulta aiwaman, Jehú? Jehú nangnitlana: —¿Amput kulnin aslah karang yah, man nanangma, Jezabel kidika, ahal mahni duwi payahwa[12] kidika, dawakat walasa karak bik di dutni bik lankalwa kidika?

²³Kidika minitni yakat nawatwi wiryaklawi kiri, Ocozías yakat aput sarahwi kalyulna: —¡Alas yulni kau mai-iwi, Ocozías!

²⁴Kaunah Jehú lasni yakat sibang awi ruhmna kidika Joram dangni yakat pawi putni minik yakat pawi ahllana, bahang Joram laih kārni minityakat dauwi bukna.

²⁵Jehú yaklauwi, tingnisut laihyang Bidcar yakat pakna: —Yakaupak yakta, Jezreel kau Nabot pāni yakat ruhm'apamtah, ismangpukyah, mayang albu kalbaunin kārni, tunan mahawi wauhda dai kidika, Acab kārni balna, kidika mani balna yakat Dawan yaklauwi witing nining yakat kaput lani yamna dai kidika:

²⁶‘Damai mani, Nabot āni talnayang kaput, dawakat walanibis balna ānina bik talyang kaput, adika pāni akat mamat maki. Yang, Dawan yang kat yultayang.’ Kaput bahang laihta, Nabot pāni yakat ruhm'apamtah, Dawan yulna kaput.

²⁷Judá kingni Ocozías talna di kalahwa kidika, bahang kirana dai, Bet-hagán nining yakat. Kaunah Jehú uiwi kiwi kuihwi, pakna: —¡Witing bik, itanauh! Kārni pas yakat papana, Gur kau lau kil'kiwa yakat, Ibleam karak libitni, kaunah Meguido kat kiri kiuna, bahang yakat dauna.

²⁸Usnitkat, mahna muihni balna Jerusalén yakat duwi uiwi nununa, David tawanni nuhni yakat.

²⁹Ocozías, Judá yakat king kana dai, Acab walanibis Joram king kana kurih 11 duwa kat.

³⁰Jehú, Jezreel yakat kiuna. Jezabel kidika dakawi, muhni di kahwi, minikpa kung yakat kahwi basni bik yamni kuswi di yaksihni pakwi windar yakat kalahwi talna.

³¹Jehú tawan nuhni yakat kiwi kawa kat, yal kidika yaklauwi kalyulna: —¿Zimri[13] ampat manh, damawan iyang?

³²Jehú windar yakat talwi aput yulna: —¿Wais yang karak yah? King ūni kau tunan muihni balna bu, bās dungh kalahwi tatalwak.

³³Jehú yaklauwi diyulna: —¡Laihta sau akat ruhmlaktanauh! Witingna yaklauwi laihwi ruhm'lalakna bahang āni kidika ū yakat raswi kahna, dawak aras balna kalnina kau atatakna Jezabel yakat.

³⁴Usnitkat Jehú kiwi dikasna, dawak bik dina. Kidika kaupak Jehú yaklauwi pakna: —Yalni dutni kidika laihta nutanauh; kat witing laih king walanibis yal dai bahang.

³⁵Nuna uina kat, tatalna, tunan wakalni, dawak tingni balna, kalni balna manah yayakna dai.

³⁶Kaput laih Jehú yakat kiwi kalyuyulna yulna: —Dawan uman yulna dai dini yamyang Tisbe kau sak kidika, Elías munah, Jezabel muihni laih sul kakasna karang Jezreel pāni yakat.

³⁷Dawak muihni kidika ruhna karang diba kapat Jezreel sauni yakat, kaput laih muihni kidika, muih as bik amanglalawas karang.