Read Mayangna 1 Crónicas 10 Bible Online

1 Crónicas 10 - Mayangna bible

1 Crónicas 10

¹Filisteo muihni balna yaklau Israel muihni balna yakat dikalbabauna, dawak Israel muihni balna laih filisteo balna niningna kaupak kikirana dai, bang Gilboa asangni yakat mahni palni dadauna dai.

²Dawak filisteo balna laih Saúl dawi walanibis balna karak diuiwi uina dai, dawak Jonatán, Abinadab dawi Malquisúa kidika balna yakat ihina dai.

³Usnit kat Saúl niningyakat kalbaunin kidika bitik ridi yayamna dai, dawak las ruhmyang balna kidika sininabang kau ruhmwi kuihwi pawi dadakna dai muihni yakat.

⁴Kaput bahang, tingnisut laihyang kalbaunin dini balna duwalik yakat kalyulna: “Ismaparah yakta kidika kau yapalatah, adika muihni Papang yakat kukulwas balna kidika aiwi yang akat yaininna awas yulni.” Kaunah tingnisut laihyang kidika yamnin yulwas dana dai, kat uba palni yamaduna dai kidika yulni. Bahang Saúl witing alas isniparah minit yakat bukwi dauna.

⁵Dawak tingnisut laihyang kidika talwak Saúl dauna kat, witing bik silp isniparah kidika minit yakat bukwi dauna dai.

⁶Kaput dadauna dai kidika mani yakat Saúl walanibis balna bāspak dawi sulani balna bitik.

⁷Dawak Israel muihni balna sau langni yakat yalalahwa dai kidika tatalwak kalbauyang muihni balna kidika kikirana kat dawak Saúl dawi walanibis balna karak bik dadauna kat, tawannina nunuhni kidika dawi witingna bik kikirana dai. Dawak filisteo balna laih kidika tawanni nunuhni yakat uiwi watwi yalalahna dai.

⁸Kidika payahwakat, filisteo muihni balna muih dadauna balna kidika ruhmmukna uiwakat, Saúl dawi walanibis balna karak Gilboa asangni yakat dauwi bukna bangkat yayakna dai.

⁹Bahang prakni balna kidika yakwi dawak tunani dawi kalbaunin dini balna kidika duwi uina dai, dawak yul duwi uiyang muihni balna sisihna dai filisteo sauni bitik yakat, tawan muihni balna yakat dawak dawan dauh balna yakat bik diyulna atninna yulni.

¹⁰Usnit kat kalbaunin dini balna Saúl duwa dai kidika daninawan dauh balna kidika ūnina yakat ahana dai dawi tunani kidika laih dawan dauh Dagón ūni yakat ilwi alalahna dai.

¹¹Galaad sauni Jabes muihni balna bitik dakakana mani kat filisteo muihni balna yaklau Saúl yakat ais kalyayamna dai kidika,

¹²muih ahal kulninna dadasni kidika bitik yaklauwi dawi Saúl dawi walanibis balna muihnina kidika duwi Jabes yakat duwi uina dai. Kidika pāni yakat muihni pis balna kidika nununa dai kirah panani as dinit yakat. Kidika usnit kat ma tiaskaubu yuh wawauhna dai.

¹³Kaput laih Saúl dauna dai witing dutni yulni, bahang dutni yamna dai Dawan yaklau yamnin yulwa yakat dakawas dai kidika yulni dawak bik baisa kaikalahwas kau yakwi yulyang yakat yulwi dakana dai kidika yulni

¹⁴witing yakat yulwi dakanin pāni yakat. Kidika yulni Dawan yaklau sangnika dakna dai, dawak king lani kidika Isaí walanibis Devid yakat kalana dai.