Read Mayangna 1 Crónicas 11 Bible Online

1 Crónicas 11 - Mayangna bible

1 Crónicas 11

¹Israel muihni balna bitik kaluduhwi Hebrón yakat uiwi Devid karak yul babauna dai. Kidika yakat kalyuyulna dai: “Yangna bik sihm man ama kidika dutayangna,

²dawak rahm kidika laih, Saúl laih king dai kaunah, man lauwa Israel yakat tanituna āwaman dai kalahwi awaihnin balna yakat. Baisa kidika minit yakat, man Papangma Dawan yaklau pramis mayamna man lauwa tanituna awa dawak kabamint awana atnam witing tawanni Israel yakat.”

³Aput laih, Israel muihnibararak balna bitik uiwi king Devid karak yulbabauna dai Hebrón yakat, dawak witingna karak kalpakwi la yayamna dai Dawan kidika witnis āwinih. Bahang witingna yaklau Devid kidika Papang dini yayakna dai Israel kingni atnin, Papang yaklau pramis yamna dai kaput Samuel munah.

⁴Devid dawi Israel muihni balna bitik karak Jerusalén nining yakat uina dai, kidika laih Jebús yakat. Jebuseo balna laih kidika sauni yakat yalalahwa dai,

⁵dawak Devid yakat kalyuyulna: “Man laih akat awana atnam sip awaski.” Kaput kaunah, Sayan kalbaunin ūni parasni kidika dakyakna dai, waralaih Devid tawanni nuhni pakna kidika.

⁶Dawak Devid yulna dai: “Jebuseo balna yakat tatuna laihki kidika tunan muihni tatuna āki ki.” Dawak Sarvia walanibis Joab kidika tatuna laihna dai, dawak tunan muihni ana dai.

⁷Usnit kat Devid laih kalbaunin ūni parasni yakat kana dai; kidika yulni Devid Tawanni Nuhni papakna dai.

⁸Dawak Devid yaklau tawan nuhni yaihnit kau balna kidika yamna dai, sau uhwi bang-ilna kaupak yaihnit balna kidika kat. Tawan nuhni yaihnit ūk balna kidika laih Joab yamna dai.

⁹Dawak Devid parasni kidika laih minit yakat baisa mahwi kiwa dai, dawak Dawan parasni bitik duwa kidika laih witing karak dai.

¹⁰Adika balna ki Devid kalbauyang muihni balna yayamni duwa kidika, king kawa lani yakat ilp kalalana dai kidika dawak Israel muihni balna bitik karak kalpakwi king kalyayamna dai, Dawan yaklau Israel yakat kalyulna dai kaput.

¹¹Devid witing kalbauyang muihni balna yayamni duwa kidika ayangnina laih adika ki: Hacmoni walanibis Jasobeam, kulninna dadasni balna bās[33] kidika taninatuna, ma as kat muih ahal 300 ina dai langnisa kau.

¹²Witing kaupak usnit kidika laih Eleazar dai, Ahoa kaupak Dodo walanibis, kulninna dadasni balna bas kidika kaupak as dai.

¹³Pas-damim yakat Devid karak sakdai, kidika mani yakat filisteo balna kalbauna atnin kalududuhna mani kat. Kidika yakat yamak as pakdai cebada dadahna kat, dawak Israel muihni kalbauyang balna filisteo balna niningna kaupak kikirana mani kat,

¹⁴witing watna dai di dahnin pāni kidika papus yakat, dawi tanit dakna dai,[34] filisteo balna yakat minitnatang bayakwinah. Kaput laih Dawan yaklau minittang bayaknin nuhni as diana dai.

¹⁵Ma as kat, kulninna dadasni balna 30 kidika kaupak bas kidika kipala nunuhni walsah yakat uina dai Devid karak kalpakna atnin Adulam pāni sulihni yakat. Filisteo muihni kalbauyang balna kidika laih Refaim sauni langni yakat ūnina labanni duduwa dai.

¹⁶Devid laih kalbaunin ūni parasni yakat sakdai, filisteo muihni kalbauyang balna uduhna as kidika Belén yakat bangdai mani.

¹⁷Dawak Devid laih dukih kalawa kidika yulna dai: “¡Muih as yaklau Belén dūrni kiwi kawa kau was butnin pāni kudungni sak kidika kaupak was yāwakat diki laih aiskarang!”

¹⁸Bahang kulninna dadasni bas kidika filisteo balna ūnina labanni yakat kawi was yayakna dai Belén dūrni kiwi kawa kau was butnin pāni kudungni sak kidika kaupak, dawi Devid yakat uiwi kalalana dai. Kaunah Devid laih diwas dawi utuhna dai, sihm Dawan yakat minit dis kalanin dini kapat,

¹⁹aput yulwinah: “¡Papang yaklau yalaihwi yakwang dinik awas yulni! ¡Diki laih sihm adika ahalni balna āninna ditayang kapat karang ki, kat sangninaka kidika yamadangni yakat āwinih uiwi duahaina bahang!” Dawak diwas dana dai. Adika kalbauwi minit bayakna tanit yamni as adika, kulninna dadasni balna bas kidika yayamna dai.

²⁰Joab wirahni Abisai laih, kulninna dadasni balna 30 kidika taninatuna dai. Ma as kat langnisa kau muih ahal 300 dikalbauwi imukna dai. Kaput laih ayangni nuhni yamnin kidika duna dai, muih ahal 30[35] balna kidika pasyakat,

²¹dawak rispik lani kidika baisa duna dai ūk balna kidika karak dawakat, bahang witni kat witingna taninatuna kalna dai. Kaunah tatuna balna bās kidika karak laih sip kapapatwas dai.

²²Cabseel tawanni kaupak Joiada walanibis Benaía, muih al as kulnin dadasni kalbauwi minit bayaknin tanit yayamni manas palni yamna dai. Witing kuduh Moab kaupak Ariel walanibis balna bu[36] imukna dai kidika. Ma as kat mukus sanni uhwa sakkat, pasulihni as kau yaklakwi dawi kidika yakat layan as ina dai.

²³Egipto muihni al naini bik as ina dai, naini niningkauh kidika metro bu minit kau papusbahnin manah duwa dai dawak bik langsa as duwalik dai kidika laih sihm asna yamnin dini sutni kapat dai. Benaía yaklau pan as karak duwi kalbauwi langnisa kidika tingni kaupak dakyakwi dawi witing silp langnisa yakauna duwi ipamna dai.

²⁴Joiada walanibis Benaía diyamna adika, kulninna dadasni balna 30[37] kidika pasyakat ayangni nuhni yamnin kidika duduna dai,

²⁵dawak rispik lani balna baisa duna dai witingna karak dawakat, kaunah tatuna balna bas kidika kapat awas dai. Dawak Devid yaklau witing yaihnit kau kalbauyang balna duwa kidika taninatuna āna dai.

²⁶Kulninna dadasni balna kidika laih adika balna dai: Joab wirahni Asael; Belén kaupak Dodo walanibis Elhanán;

²⁷Harod[38] kaupak Samot; paltita[39] muihni Heles;

²⁸Tecoa kaupak Iques walanibis Ira; Anatot kaupak Abiezer;

²⁹Husa kaupak Sibecai; Ahoa kaupak Ilai;

³⁰Netofa kaupak Maharai; sihm Netofa kaupak Baana walanibis Heled;

³¹Gabaa kaupak Ribai Benjamín sauni yakat sak kidika walanibis Itai; Piratón kaupak Benaía;

³²Gaas wasni kaupak Hidai;[40] Bet-arabá kaupak Abiel;

³³Bahurim kaupak Azmavet; Saalbim kaupak Eliaba;

³⁴gizonita kaupak Jasén walanibis balna; Arar kaupak Sage walanibis Jonatán;

³⁵sihm Arar kaupak Sacar walanibis Ahíam; Ur walanibis Elifal;

³⁶mequeratita kaupak Hefer; pelonita kaupak Ahías;

³⁷Carmel kaupak Hezrai; Esbai walanibis Naarai;

³⁸Natán wirahni Joel; Hagrai walanibis Mibhar;

³⁹Amón kaupak Selec; Berot kaupak Naharai; Sarvia walanibis Joab tingnisut laihyang;

⁴⁰Jatir kaupak Ira; sihm Jatir kaupak Gareb;

⁴¹hitita kaupak Urías; Ahlai walanibis Zabad;

⁴²Adina, Siza walanibis rubenita balna taninatuna muih ahal 30 duwa dai kidika;

⁴³Maaca walanibis Hanán; mitnita kaupak Josafat;

⁴⁴Astarot kaupak Uzías; Aroer kaupak Hotam walanibis balna Sama dawi Jehiel;

⁴⁵Simri walanibis Jediael, dawi wirahni tizita kaupak Joha;

⁴⁶Mahanaim kaupak[41] Eliel; Elnaam walanibis balna Jerebai dawi Josavía; Moab kaupak Itma;

⁴⁷Soba kaupak Eliel, Obed dawi Jaasiel.