Read Mayangna 1 Crónicas 13 Bible Online

1 Crónicas 13 - Mayangna bible

1 Crónicas 13

¹Devid yaklauwi diyulwi dakana, kalbauyang tatuna nunuhni balna yakat, yuldarang kat tunan muihni balna bitik yakat,

²usnit kat Israel tawanni muihni balna bitik yakat diyulna: “Manna namangna yakat yamni kapat kat, dawak Dawan Mapapangki yaklau kaput maidawarang kat, isningna pakdang, mayang Israel sauni ūk balna kau mawanaihki balna bangyakat, yul sihdanang, dawak sumalyang balna bitik yakat, libait muihni balna sīp maintalnin pāni balna kau bangkidika yakat bik, diyulta dakah aiwak aslah kalpakdanang,

³Kaput laih Papang lani baksni kidika duaina atnin, mayang madikitkahwak dapamna mayang, Saúl mani balna dai kidika kaupak.”

⁴Tawan muihni balna bitik laih yamni kukulna, kidika yamna atnin, kidika yulwa kidik yamni kukulna.

⁵Devid yaklauwi Israel balna bitik uduhna dai, Egipto sauni kaiwi watwa kau, Sihor kaupak, Hamat pāni kaiwi kawa kat, bahang kidika laih Quiriat-jearim pāni kaupak, Papang lani baksni kidika duaina atnin.

⁶Usnit kat, Israel balna bitik kalpakwi, Quiriat-jearim pāni yakat uina dai, kidika pāni ayangni ūk laih Baala, bahang kidika laih Judá sauni yakat ki, bahang yakaupak, Papang lani baksni kidika duwi kiunin yulni, kidika minit yakat Dawan ayangni kidika yakwi yuyulwi, dawak querubin balna minitna yakat witing yalahnin kidika duwi.

⁷La baksni kidika, di awi murnin wisam as kat minit yakat ilwi duwi uina Abinadab uni kaupak. Uza dawak Ahío witingna bu kidika laih awi murnin dini kidika tunan kawi duwi uina.

⁸Kaput laih, Devid dawak Israel balna bitik laih Papang tanityak lapakwi unbauwi, ubuwi, pasnin dini balna satni bitik kau paswi yakisdi, dawak kilingwi yakisdinin dini bitik kau kilingwi alasna yayamna dai.

⁹Witingna Era de Quidón pāni yakat uiwi kakawakat, turuh murwa tulu kidika atatakwak kahrna dawak Uz tingni uhrwi laihna la baksni laihwatna atnin yulni, kat turuh ahalmuk balna kidika kalnina pakna dai kidika yulni.

¹⁰Kaunah Dawan kulnin daukalna dai Uza karak, witing tingni kau la baksni yakat laihwa kidika, dawak kidika minitni yakat witing sangnika dakyakna dai.

¹¹Devid kulnin daukalna dai, kat Dawan yaklauwi sangnika dakyakna dai[43] bahang Uza yakat, kidika bahang kidik pāni ayangni pakna dai. Pérez-uza[44] yakat, kidika ayangni warmani kat duwi.

¹²Kaunah kidika mani Devid uba yamaduna dai Papang nining yakat, bahang aput yulni parasni yulna: “¡Yang kultasyang Papang lani baksni adika duyawik yang dunik!”

¹³Dawak la baksni kidika Devid tawanni nuhni yakat duwi kiwasdai, bahang Devid yaklauwi pakna dai, al as Gad Pāni kaupak ayangni Obed-edom uni yakat uiwi āna atnin.

¹⁴Papang lani baksni kidika Obed-edom uni yakat waiku bās tusdai, kaput laih Dawan yaklauwi Obed-edom sulani balna yakat yamni diyamna dai, dawak ūnipas bitik yakat yamni diyamna dai.