Read Mayangna 1 Crónicas 14 Bible Online

1 Crónicas 14 - Mayangna bible

1 Crónicas 14

¹Tiro kingni Hiram, witing ayangni kau muih yakwi sihna dai Devid yakat, baisa minit yakat, simint kau ūk pakyang balna, dawak tat kau ū pakyang balna bik yakwi sihna dai, bahang witing suhun tatni balna duwi uina dai Devid uni pakna atnin.

²Kaput laih, Devid amanglana dai, witing kidika Dawan yaklauwi Israel kingni āna kidika, kat witing king kana kidika kasak palni barakna dai bahang, witing tawanni Israel pasyakat.

³Devid, yayal manas duna dai Jerusalén yakat, walanibis ahal, dawak yayal bik manas duna dai.

⁴Witing walanibis balna Jerusalén yakat batanh dadana dai kidika laih: Samúa, Sobab, Natán, Salomón,

⁵Ibhar, Elisúa, Elpelet,

⁶Noga, Nefeg, Jafía,

⁷Elisama, Eliada dawak Elifelet.

⁸Devid witing Israel balna bitik kingnina Papang dini yakna kidika filisteo balna dakakana kat, witing nining yakat walwi uina dai; kauna Devid dakawi, niningna yakat kalahwi kiuna dai.

⁹Kaput laih filisteo balna kidika uiwi, Refaim pāni yakat awaihwi tatalna dai.

¹⁰Adika yulni Devid yaklauwi Dawan yakat kalyulwi dakana dai aput: —¿Filisteo balna yakat kalbauki yah? ¿Yatangkat minitna bayakki yah? Dawan yaklauwi nangnitlana: —Niningna yakat kalbauta, yang lawik minitna bayaknin kidika maki.

¹¹Devid, Baal-perazim yakat kilwi kiuna, bahang yakat minitna bayakna dai. Kidika bahang aput yulna: “Was parasni murwa kapat, Papang yaklauwi yāwak waihkila balna pasmunah bayaktik yawanayang.” Bahang kidika pāni ayangni papakna Baal-perazim.[45]

¹²Filisteo balna witingna daninawan kidika yakat ruhmwi dadana dai, bahang, Devid yaklauwi laihwi kuhkau busna dai.

¹³Kauna filisteo balna kidika watwi refaim pāni yakat aiwi awaihwi tatalna dai.

¹⁴Kaput bahang, Devid watwi Papang yakat kalyulwi dakana dai, dawakat Papang yaklauwi nangnitlana: —Witingna muhnitna munah kalahwi kalbauwinih, kauna dangnitna munah alahwa dikalbauta, bálsamo panan balna bangkidika yakat yawa awamakat.

¹⁵Man pan tuna yakat muih lapakwi kiwa kapat dakama kat, mahka kalbauma, bahang kidika tanka laih yang tamat yakat yawayang, filisteo balna yakat ina atnik.

¹⁶Devid, Papang kalyulna kaput yamna dai, dawak Filisteo balna yakat minitna bayakna dai, Gabaón pāni kaupak, Gezer pāni kat.

¹⁷Kidika yamna kidik yulni, witing ayangni pa bitik kau dakakana dai, dawak Dawan yaklauwi yamwak sau ūk muihni balna bitik yamani duduna dai.