Read Mayangna 1 Crónicas 15 Bible Online

1 Crónicas 15 - Mayangna bible

1 Crónicas 15

¹Devid yaklauwi dipakna dai ūk balna pakwi diana atnin witing tawanni yakat, dawak pa bik as yakna dai, dawak ū labanni as dulauna dai Papang lani baksni kidika pāni.

²Kaput laih dipakna: “Muih as bik, Levita balna awaskat Papang kuringni kidika duwi kiunin awas ki, kat Dawan yaklauwi witingna kidika yakna Dawan lani baksni kidika duwi uina atnin, dawak kaput bik witingna manah maintalna atninna.”

³Usnit kat, Israel balna kidika bitik Jerusalén yakat uduhna dai, Dawan lani baksni kidika duwi kiuna atnin, witing pāni yamna yakat.

⁴Aarón sulani balna dawak, Levita balna bik uduhna dai.

⁵Coat sulani balna kidika kalududuhna dai 120: taninatuna laih, Uriel dai, dawak wanaihni balna bik.

⁶Merari sulani balna, 220: taninatuna laih Asaías, dawak wanaihni balna bik.

⁷Gersón sulani balna, 130: taninatuna laih: Joel, dawak wanaihni balna bik.

⁸Elizafán sulani balna, andat bu: taninatuna laih Semaías, dawak wanaihni balna bik.

⁹Hebrón sulani balna laih 80: taninatuna laih, Eliel, dawak wanaihni balna bik.

¹⁰Uziel sulani balna laih, 112: taninatuna laih, Aminadab dawak wanaihni balna bik.

¹¹Usnit kau Devid yaklauwi sumalyang balna kidika yulwi dukiuna dai, Sadoc dawak Abiatar karak Libait balna bik: Uriel, Asaías, Joel, Eliel, dawak Aminadab.

¹²Dawak diyulna dia: “Manna laih Libait balna taninatuna mana bahang muihmana dutni di alahwanauh, wanaihmana balna bitik, kaput laih manna Dawan, Israel Papangni lani baksni kidika duyawana atnamna, yang pa as yaknayang pāni yakat;

¹³tatuna kau manna yamtas mana dai bahang, Papangkina Dawan yaklauwi yangna kaupak buas sangnika dakna, kat amput yamnin kidika kalyultik dakas yangna dai bahang.”

¹⁴Kaput laih sumalyang balna kidika maisihni dis kalalahna dai dawak Libait balna bik, Dawan lani baksni kidika duwi kiuna atnin yulni.

¹⁵Pan kau uhrlawi salahnina kau trurukna dai, Moisés yamna dai kaput, Dawan yaklauwi pakwak.

¹⁶Dawak bik Devid yaklauwi dipakna dai, Libait balna yakat witingna paskaupak unbauyang balna kidika yakna atnin, puhnin dini, pasnin dini balna bik duwi kiuna atnin, dawak, witingna kidika alasna yakisdana atnin, witingna alasna duduwa tanka.

¹⁷Libait balna yaklauwi Joel walanibis, Hemán yakat tunan ahana dai, dawak Berequías walanibis Asaf yakat bik, witing kidika laih Hemán wanaihni dai; Merari sulani balna, tanit mani kau kalwanaih balna, dawak Cusaías walanibis Etán yakat bik.

¹⁸Baisa minit yakat ūk tunan ahana dai, kauna witingna laih tingninasut laihyang, dai: Zacarías,[46] Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías, dawak dūr maintalyang balna laih, Obed-edom, dawak Jeiel.

¹⁹Unbauyang balna Hemán, Asaf dawak Etán, kidika balna laih bras plitni kidika lingnin bang dai.

²⁰Zacarías, Aziel, Semiramot, Jehiel, Uni, Eliab, Maasías dawak Benaía balna kidika laih pasnin dini kidika duduna dai, elamita balna papaswa kaput[47] pasna atnin.

²¹Matatías, Elifelehu, Micnías, Obed-edom, Jeiel dawak Azazías balna laih pasnin dini kidika duwa bangdai, siminita balna papaswa kaput[48] pasna atnin, unbaunin tunan bahwa kidika.

²²Libait balna taninatuna, Quenanías, witing kidika tatuna duwa likdai, duwi kiunin kidika,[49] kat witing laih tanka yamni amanglawa dai bahang.

²³La baksni dūrni maintalyang balna dai kidika laih, Berequías dawak Elcana.

²⁴Dawak sumalyang balna Sebanías, Josafat, Natanael, Amasai, Zacarías, Benaías dawak Eliezer kidika laih puhnin dini kidika laih Papang lani baksni muhnityak puhwi uina dai. Ebed-edom dawak Jehías witingna bik la baksni dūrni maintalyang balna dai.

²⁵Kaput laih Devid dawak, Israel muihnina bararak balna kalbauyang taninatuna balna karak alasna kalpakwi Dawan lani baksni kidika, Obed-edom ūni kaupak duwi uina dai.

²⁶Papang yaklauwi Libait balna, witing kuringni duwi uiwa bahang, tingninasut laihna, dawak kidika yulni, turuh wawahma tiaskaubu dawak kuts tiaskaubu iwi bubusna dai.

²⁷Devid laih asnina yamni kat kana likdai, kaput bik Papang kuringni trukyang balna bik kaninna yamni kat kakana dai, dawak unbauyang balna bik; Quenanías witing tunan duwalikdai kidika bik yamni kana likdai; baisa minit yakat Devid laih, kanin asnina nuhni kidika minit yakat kana likdai.

²⁸Israel balna bitik kaput Dawan lani baksni kidika duwi uina, alasna, sarahwi, kuts tamni puhwi, pasnin dini paswi, bras plitni lingwi, ban kaput duwi uina dai.

²⁹Dawan lani baksni kidika, Devid tawanni nuhni yakat kiwi kawakat, Saúl walanibis Mical kidika windar yakat kalahwi talna Devid ubuwa witkat alasna duwi, bahang witing Devid niningyakat dutni kalkulna dai.