Read Mayangna 1 Crónicas 16 Bible Online

1 Crónicas 16 - Mayangna bible

1 Crónicas 16

¹Papang lani baksni kidika duwi uiwi, Devid ū labanni as yamna sakdai kidika yakat ahana dai. Usnit kat, sakripais karauni kauna kidika bubusna dai dawak Papang karak yamni kalahnin sakripais kidika bik Papang muhni yakat bubusna dai,

²Adika Devid yamwi dana usnit kat, tawan muihni balna yakat blis diyamna dai Dawan ayangni kau,

³dawak Israel muihni balna bitik laih, muih ahal dawak yayal bik, plawar busna as, kuruhwi busna as dawak pasas busna as diana dai.

⁴Devid yaklauwi walwi yakna dai Libait balna paskaupak, Dawan lani baksni yaihnit yakat di yamnin kidika, alasna yamnin, tingkih kalanin dawak Israel Papangni Dawan yakat ayangni nuhni yamna atnin.

⁵Tatuna muihni palni kidika laih Asaf dai, kidika kaupak usnit kidika laih Zacarías; kidika kaupak Jeiel, kaupak, Semiramot, kaupak, Jehiel, kaupak Matatías, kaupak Eliab, kaupak Benaía, kaupak Obed-edom, dawak witingna balna kidika laih unbaunin dini balna duwa bangdai, pasnin dini balna. Asaf laih plit balna kidika lingwadai.

⁶Dawak, sumalyang balna, Benaía dawak Jahaziel balna kidika laih puhnin dini kidika pupuhwa dai, Papang lani baksni muhnityak.

⁷Sihm kidika mani yakat Devid yaklauwi pakna dai Safat yakat dawak ūk balna yakat bik, Dawan yakat tingki lani as kalyulna atnin, kidika pas tatuna yamna dai:

⁸“¡Dawan yakat tingki kalyultanauh! ¡Witing ayangni kidika yultanauh! Tawan balna yakat yultanauhwiting di yamna balna kidika.

⁹Witing risnipik kau unbautanauh. ¡Di nunuhni balna yamna kidika yultanauh!

¹⁰“Witing ayangni holi kidika yulnimanna manah kapat kaldakanauh. ¡Ismangna alasna kaldakanauh, Dawan yakat waltamana muihni balna mana kidika!

¹¹Dawan yakat yawanauh, dawak parasni nuhni duwa bahang; ma bitik yakat Dawan yakat yawanauh.

¹²Ismangna aitanauh, witing warkni nunuhni balna yamna kidikaq dawak di taldas balna dini bik yamna kidika, dawak lani balna āna yaka bik.

¹³Manna, witing dini yamyang, Israel sulani balna, manna Jacob sulani balna, witing yaklauwi mana yakwi duna kidika.

¹⁴“Witing laih Dawan, mayang Mapapangki; ¡sau adika bitik witing tingni yakat duwi!

¹⁵Sulani balna tausin kaiwi bayakwarang bik, witing pranimis kidika dinitkahwas[50] karang ki.

¹⁶Pramis yamwadai kidika Abraham kau, dawak witing ayangni kau bik yakwi kalyulwa dai kidika Isaac kau bik.

¹⁷Dawak kidika lā as kapat kalawa dai kidika Jacob yakat, dawak pramis as ban kaput atnin kalawa dai kidika Israel yakat.

¹⁸Aput yulwadai: ‘Canaán sauni kidika makiki dini tingmak as kapat man yakat bukwa kidika.’

¹⁹“Witingna kidika bulah dai bik, pa dis muihni balna buas sau yakat uina dai.

²⁰Uiwa dai muih panina munah, saunina munah.

²¹Papang yaklauwi diswas dai muih as bik yaklauwi dutni diyamna atnin; dawak king balna yakat bik isningna pakna dai.

²²‘Yang waltik yaktik dunayang muihni balna kidika uhuswinih, dawak, dutni diyayamwinih, prakipit balna kidika bik.’

²³“Dawan yakat unbautanauh, sau muihni balna manna bitik, ma bitik yakat yulta awanauh laihwi yakna kidika.

²⁴Ayangni nuhni kidika yulni bautanauh, dawak di taldas dini yamwa kidika bik, tawan muihni balna bitik muhnina yakat.

²⁵Kat Dawan laih nuhni bahang, witing ayangni nuhni yamnin kidika laih witing dini palni ki, dawak kau yamadangni ki dawan dauh balna karak dawakat.

²⁶Muih ūk balna daninawan kidika laih dauh ki, kaunah Dawan laih makau kisang balna kidika yamna.

²⁷¡Witing sakkidika yaringni nuhni bik duwi! ¡Witing pāni kidika, alasna dawak parasni nuhni bik duwi!

²⁸“Dawan yakat kalatanauh, tawan muihni balna kidika, Dawan yakat kalatanauh, alasna dawak ayangni nuhni kidika.

²⁹Dawan ayangni yamni palni kidika kalatanauh, kat witing dini bahang; minitdis kalanin dini kidika duta witing muhni yakat yawanauh; Dawan yakat ayangni tanit nuhni yamtanauh witing pāni nuhni holi yaksihni yakat. witing pāni yaksihni nuhni yamni kidika yakat.[51],

³⁰¡Muih bitik witing muhni yakat diyukwang! Witing yaklauwi sau adika yamna bahang kalitikwas ki.

³¹¡Makau kisang dawak, sau karak alasna kawang! Muih balna yakat diyulwang: ‘¡Dawan laih king!’

³²¡Kuma kidika parasni yulwang, dawak paskau di bangkidika bitik! ¡Sau minit kau kidika alasna kalahwang, dawak di balna bang kidika bitik!

³³¡Asangpas kau pan balna bangkidika bitik sarahwi alasna kalalahwang, Dawan muhni yakat, witing sau akat kabamint kana kaiwi!

³⁴“Dawan yakat tingkih kalatanauh, kat witing laih yamni bahang kulnin, dawak dalani lani duwa kidika ban kaput bahang.

³⁵Kalyultanauh: ¡Papang yanalaihta yakta, yanalaihwi yakyang man kidika! ¡Yanadutah, dawak tawan balna paskaupak yanalaihta yaktah, bahang yangna man ayangma nuhni yamtanaki, alasna man ayangma nuhni yamtanaki!

³⁶¡Dawan laih ayangni nuhni yamna karang, Israel Papangni kidika, ban kaput karangki!” Dawak tawan bitik yaklauwi nangnitlalana: “¡Kaput karang!”, kaput laih Dawan ayangni nuhni yayamna dai.

³⁷Kaput laih Devid yaklauwi Dawan lani baksni yaihnit yakat dana dai Asaf dawak ūk balna kidika bik wark yamna atnin ma bani.

³⁸Obed-edom bik yakat dana dai, witing karak kalpakwi wark kalahnin balna muih 68, Obed-edom laih Jedutún walanibis dai, dawak Hosa laih dūr maintalyang dana dai.

³⁹Sadoc dawak, witing karak kalpakwi wark kalahnin muihni balna kidika dana dai Dawan ūni labanni muhnit yakat, Gabaón pāni maisihni dis pāni yakat.

⁴⁰Ban, muih dutni dis danin dini kidika buswa atnin Dawan muhni yakat, mapiris, maulahu buswa atnin busnin pāni yamna pakyakat, Dawan lā diana kaput yamni atnin, Israel balna kau diana dai kidika.

⁴¹Hemán dawak Jedutún bik dana dai, baisa minit yakat, unbaunin muihni balna walwi yakna dai kidika balna bik dana dai: “Dawan yakat tingkih kalatanauh, kat witing dalani lani duwa kidika ban kaput bahang.”

⁴²Adika muihni balna, puhnin dini pupuhwa dai, bras plitni lilinghwadai, dawak yakisdinin dini ūk balna bik yakikisda dai, bahang yaka kau, Papang ayangni nuhni yayamwa dai. Jedutún walanibis balna laih dūr kidika maintatalwa dai.

⁴³Usnit kat muih bitik ūnina kau uiyamna dai, Devid bik uni kau kiuna dai wanaihni balna kau yamni diyamna atnin.