Read Mayangna 1 Crónicas 17 Bible Online

1 Crónicas 17 - Mayangna bible

1 Crónicas 17

¹Devid, witing uni yakat kiwi kawi pāni duna mani kat, prapit Natán yakat kalyulna: —Talah, yang laih suhun uni kat āwayang, kauna Dawan lani baksni kidika laih, minit yakat asna kau ririna kat tuski.

²Natán yaklauwi nangnitlana: —Bahang yamta, ais yamnin kulnaman kidika, kat Papang tingnisut laihwarang kidika kulta.

³Kauna kidika puknita, Natán yakat kiwi aput kalyulna:

⁴“Yawa, yang diki yamyang Devid yakat yulbautah, dawak kalyultah yang Dawan yang adika lawik aput yulnayang: ‘Man awaski, yang ūki yamtang awinik kidika.

⁵Israel yakna yang mani kaupak, warmani kat, yang makat yulnin uni kau awasyang, kauna ū labanni kau awayang, pa ūk ūk kau.

⁶Ma bitik pasyakat witingna karak yang dai kidika, tunan muihni balna ānayang balna dai yakat di yultas yang dai, makat yulnin uni as yamwi yanin suhun panani kau.’

⁷Kaput bahang, yang diki yamyang Devid yakat kalyultah, yang Dawan paraski nuhni dutayang adika lawik kalyulta yang: ‘Daklana paskaupak mayakna yang, yang tawanki tanituna āwanam.

⁸Angkat, angkat yawanaman kidika yakat, man karak yang dai, man waihmala balna man namang yakat yaklalauna kidika bitik dahnyamna yang dai, dawak ayangma nuhni yamna yang, adika sauni akat ahal ayangnina nuhni kapat.

⁹Baisa minit yakat, yang tawanki Israel yakat pāni as yaktik kalanayang, muih as bik di usnin awas, bahang kidika pāni yakat yalalahna, muhnilau kau muih dudutni balna ditataihwa dai kapat awas karang ki.

¹⁰Tatuna yaktik, tawanki Israel yakat anayang dai kaput tatuna duna atnin. Yang lawik yamtingkat kat waihmala balna kidika bitik sau yakat bubukna karang. Dawak bik ismang paktayang sulama balna bik duma.

¹¹Dawak muihbarak kalta dauma kat, man sulama kaupak as yaktik āki, king.

¹²Witing yaklauwi makatyulnin uni as yamwi yawarang, dawak witing king kawa kidika ban kaput yamtik kalaki.

¹³Yang, witing papangni as awaki, dawak witing kidika yang walakibis karang. Dalani lani duyang kidika witing kaupak yaktas awaki, muhnilau yamna yang dai kaput, muihni bararak balna kau yamtas awaki.

¹⁴Nawatkauh laih ban kaput kalduki ūki yakat dawak sauki yakat bik. Dawak witing kingkawa lani balna kidika ban kaput karang sarandis.’ ”

¹⁵Natán yaklauwi adika dini bitik Devid yakat kalyulna dai, witing talna kaput ki, dawak bik dakana kaput.

¹⁶Kaput dawak king Devid kawi kiuna dai, Dawan muhni yakat yulbauna atnin, bahang aput kalyulna: “Dawan dawak Papang ¿yang adika waisyang, dawak wais balna yah sulaki balna kidika, man akat yayamtang aput kalnayang kidika?

¹⁷¡Di binibin kapat ki man namang yakat adika, Dawan dawak Papang, dawak bik man dima yamyang tanit kau kaiwarang kidika bitik yultada kidika, yang adika muih nuhni as kapat yatalnaman![52]

¹⁸¿Ais baisa mayulnik sipyah man dima yamyang kau yamni kalyamna man kidika yulni, dawak man yamni amangnilataman adika man dima yamyang kidika?

¹⁹Dawan di taldas dini yamnaman bitik kidika, man dima yamyang talnin yamnaman, amput yamta niningkanin dukih mana dai kidika kaput.

²⁰Dawan, man kapat ūk diski, dawak Papang ūk diski man kaupak usmat yakat, yangna dakanayangna bitik yakat.

²¹Man tawanma Israel kidika laih, ¡ūk diski witing kapat, sau minit akat witing manah ki! Papang, man laihta yaknaman, man tawanma atnin yulni, ayangma nuhni yamna man, di taldas balna kidika yamta. Man tawanma, Egipto kaupak yakna man dai kidika, muhni tani yakat sau ūk balna kidika ruhmta lakna man dai.

²²Kat man lawa Israel kidika dunaman tawanma as ban kaput, dawak Dawan man laih, witing Papangni awama.

²³“Kaput kat Dawan, man dima yamyang yakat pramamis kidika kalyamta, witing king kawa kidika ban atnin, dawak pramamis yulnaman kaput yamta.

²⁴¡Pramamis kidika kat yamtah, dawakat ayangma kidika nuhni yamna karang, dawak yuyulna karang, Dawan parasni bitik duwa kidika laih Israel Papangni, witing laih rahm palni Israel Papangni as ki! ¡Dima yamyang Devid king kawa kidika parasni karang, man lawa nanitdaktang kat!

²⁵Man, yang Papangki, nikingkana man yang king awayang kidika ban kaput atnin kidika, bahang yang, man dima yamyang yang kauna, man kalma dinit yakat buktik di as yulki.

²⁶Dawan man laih Papang man, bahang man dima yamyang yakat, dalani lani dutaman kidika, pramis kalyamna man.

²⁷Dawak waralaih, man dima yamyang king kawa kidika bliyamnaman, ban kaput atnin, man lawa nanit daktang kat. Dawan man lawa blis yamnaman, kidika bahang yamni manah karang, ban kaput.”