Read Mayangna 1 Crónicas 18 Bible Online

1 Crónicas 18 - Mayangna bible

1 Crónicas 18

¹Adika usnit kat, Devid yaklauwi Filisteo balna yakat minitna bayakna, tingnina kaupak, tawannina nuhni Gat kidika dakyakna dai, dawak tawannina binina bik.

²Moabita balna yakat bik minitna bayakna dai, kaput laih witingna kidika Devid kalni dinit yakat bubukna dai, bahang lalah lauwi kalalawa dai.

³Devid yaklauwi, Soba kingni Adad-ezer yakat bik minit bayakna dai, Hamat sauni nining yakat pakkidika, adika muihni laih, Éufrates sauni kidika bik dunin yamna dai.

⁴Witingna kaupak, Devid yaklauwi, kār tausin didakyakna dai, dawak ahal kalbauyang balna tausin tiaskaubu laihna dai, kidika laih aras kau kilwi kalbauyang muihni balna kidika, dawak kalkau lapakwi uiwi kalbabauwa kidika laih tausin muihas luih laihna dai, baisa minit yakat war aniras balna kidika bitik kalnina tuswi bahna dai, kauna andat kar murnin aniras balna kamanah dana dai.

⁵Usnit kat, sirio muihni balna uina dai, Hadad-ezer yakat tingnisut laihna atnin, witing laih Soba kingni dai, kauna Devid yaklauwi sirio balna minitna bayakna dai, muih ina dai 22,000.

⁶Usnit kat Devid yaklauwi, Siria sauni kau Damasco tawanni yakat, kalbauyang balna uiwi dana dai maintalna atnin, kaput laih Sirio balna kidika Devid kalni dinit yakat bubukna dai dawa kat witing yakat lalah lauwi kalalawadai. Kaput laih Dawan yaklau Devid yakat minit bayaknin kidika kalawa dai angkat kiuna balna yakat.

⁷Usnit kat, kalbauyang balna nanitna daknin gol kau yamna bangdai kidika duna dai, bahang kidika laih Hadad-ezer ahalni balna duduwa dai, dawak Jerusalén yakat duwi kiuna dai.

⁸Kaput bik Tibhat kaupak, bras mahni duna dai, dawak Cun kaupak bik, kidika laih Hadad-ezer tawanni nunuhni balna dai. Adika brasni kau Salomón yamna dai was laihnin dini nuhni as, dawak makatyulnin uni paskau di dunin dini balna kidika bik yamna dai.

⁹Hamat kingni Toi, witing dakana Devid yaklauwi minit bayakna, Hadad-ezer ahalni balna yakat dawak, Soba kingni yakat bik.

¹⁰Kaput laih, witing walanibis Adoram kidika yakwi sihna dai gol dini, lalah kau di yamna dini balna, dawak bras kau di yamna dini balna bik duwi kiuna dai Devid yakat parasna atnin yulni, Hadad-ezer yakat minit bayakna kidika, dawak Toi yakat minit bayakna kidika yulni, bahang witingna laih kalbabauwa dai.

¹¹Devid yaklauwi, adika dini balna bitik Dawan warkni yakat āna dai, dawak kidika manah bik awas ki kauna, gol, dawak lalah dakyakna dai kidika Edom, Moab, amonita, filisteo dawak amalecita balna tingnina kaupak.

¹²Baisa kidika minit yakat, Sarvia walanibis Abisai, Edom, muihni balna 18,000 minitna bayakna dai, kuma langni yakat.

¹³Usnitkat, Devid yaklauwi Edom pāni yakat kalbauyang balna awi danadai, dawak Edom muihni balna laih witing kalni dinit yakat bubukna dai, Devid angkat, angkat kiuna kidika Dawan yaklauwi minit bayaknin kidika kalana dai.

¹⁴Devid Israel pas yakat, lā kat, barangni yamna dai tawan yakat.

¹⁵Kalbauyang balna taninatuna kidika laih Joab dai, Sarvia walanibis; dawak Josafat laih Ahilud walanbis dai, witing laih king yaihnit yakat wauhtaya ulyang dai.

¹⁶Sadoc, walanibis Ahitob, dawak Ahimelec walanibis Abiatar kidika balna laih sumalyang balna dai; Savsa laih di kalahwa balna kidika yulyang dai.

¹⁷Joiada walanibis, Benaía laih cereteo balna taninatuna dai, peleteo balna bik. Devid walanibis balna kidika tingnisut laihyang tanituna balna palni dai.