Read Mayangna 1 Crónicas 19 Bible Online

1 Crónicas 19 - Mayangna bible

1 Crónicas 19

¹Usnitkat ma as, as bayakwa kat amonita kingni Nahas kidika dauna dai, dawak walanibis king kana dai pāni yakat.

²Devid kulna, Nahas walanibis Hanún yakat yamni kalyamnin, kat papangni kidika Devid yakat yamni kalyamna dai bahang, dawak king witing ayangni kau muih yakwi sihna dai Hanún yakat papangni dauna kidika walaniānin as kapat yulni. Devid ahal balna kidika amonita balna saunina yakat uiwi kakawa kat.

³Amón muihni tanituna balna kidika Hanún yakat kalyulna: “¿King man kultaman, Devid yaklauwi muih sihna kidika man papangma dauna kidika yakat kulwi sihna kultaman, man papangma ayangni nuhni yamnin manah yulni sihna kultaman? ¡Di rahm kidika laih, witingna aina kapatki ma sauki adika yamni lakwi talnin,[53] awaihwi talnin!”

⁴Kaput dawak, Hanún yaklauwi pakna, Devid ahalni balna kidika laihna atnin, dawak basnina karhwi, praknina iswi biswi saranina kat dawi sihmukwakat uina.

⁵Devid yakat uiwi kalyuyulna, muih sihna balna yakat ais diyayamna dai kidika, dawak muih sihna dai kidika balna yakat uiwi kalpakna atnin, kat witingna balna kidika uba asalni dai bahang, dawak dipakna witingna Jericó yakat watwi bang atnin angkat witingna basnina, kungninabas nanaiwarang kat uina atnin.

⁶Amonita balna amanglalana Devid kulnin dutni dikulna kidika, kat Hanún dawak amonita balna karak yaklauwi sisihna dai Mesopotamia yakat, lalah bik 60 sihna dai, kalbauyang balna minitna launa atnin, Mesopotamia yakat manah bik awaski kaunah Siria Maaca dawak Soba yakat bik,

⁷dawak duduna dai kalbaunin kārni 2000, king Maaca kalbauyang muihni balna duwa kidika kauna bik duduna dai. Adika balna laih Medeba muhnityak uiwi watwi panina duduna dai. Baisa kidika minityakat amonita muihni balna laih tawannina nunuhni balna kaupak kalahwi kalududuhna dai kalbaunin pasyakat yakat kana atnin yulni.

⁸Devid, dakana dawak, Joab yaka yakwi sihna kalbauyang balna bitik karak.

⁹Amonita balna mahka kalahwi uina kalbauna atnin, tawannina yaihnit yakat. King balna aina dai kidika ahni yakat wawatna.

¹⁰Joab witing talna dangnit yakau, dawak muhnit yakaupak bik kalahwi kalbauninna yayamwak, Israel muihni balna kalbauyang tanit yayamni kidika yakwi duna, dawi mahka ridi kalna dai kalbaunin sirio balna niningna yakat.

¹¹Usnit kat amonita balna niningna yakat yaklaunin kidika, witing wirahni Abisai kidika tunan āna dai.

¹²Dawak aput kalyulna: “Sirio balna kidika mikit bayayakwarang kat aiwa tingkisut laihma, dawak amonita balna kidika mamat bayayakwarang kat, yang aiwik tingmasut laihki.

¹³Muih al awah, masauki yulni kalbaudang, dawak Papang tawanni nuhni yulni bik. ¡Dawak Dawan yaklauwi yamwarang, witing aput yamni talwa yakat!”

¹⁴Joab, witing mahka kalahwi kiuna sirio balna niningna yakat kalbauna atnin, kauna adika muihni balna kikirana dai.

¹⁵Amonita balna witingna tatalwak, sirio balna kidika kikirak, witingna bik kikirana dai Abisai yamaniduwi, Joab wirahni, witingna kiri tawan nuhni pasyakat kawi uina dai, kaput dawak, Joab mahka dawi Jerusalén yakat nawatwi kiuna dai.

¹⁶Sirio balna kidika amanglalana kat, Israel balna yaklauwi minitna bayayakna kidika, witingna Éufrates nakaskau Sirio balna bangkidika yulwi duahaina dai. Sofac kidika taninatuna likdai, Hadad-ezer ahalni kalbauyang balna.

¹⁷Kauna adika yulni Devid yakat kalyuyulna dai, usnit kat Israel balna bitik yakwi duwi kiuna dai, Jordán kidika dakyaklawi witingna niningna yakat panina duna dai, Jordán kidika dakyaklawi witingna niningna yakat panina duna dai. Devid witing mahka ridi kalna sirio balna karak kalbauna atnin, kaput laih witingna karak kalbabauna.

¹⁸Kauna witni kat Israel balna yamaninaduwi kikirana dai, Devid yaklauwi ina kidika tausin muihas luih bu ina dai, kalkau lapakwi uiwi kalbabauwa balna kidika, dawak kar kau kilwi uiwi kalbabauwa balna kidika laih tausin tiaskaubu ina dai; baisa kidika minit yakat Devid yaklauwi Sofac yakat ina dai, kalbauyang balna taninatuna dai kidika, sirio balna.

¹⁹Hadad-ezer karak aslah kalalahna balna dai kidika tatalwak Israel balna yaklauwi minitna bayakna kat, dawi Devid karak kulnin asla lani yayamna dai, kaput laih Devid kalni dinit yakat bubukna dai. Kidika kaupak, sirio balna watwi amonita balna yakat tingninasut laihwas dadana.