Read Mayangna 1 Crónicas 20 Bible Online

1 Crónicas 20 - Mayangna bible

1 Crónicas 20

¹Ma askat, kurih ilwakat, king balna kidika witingna kalahwi awawaihwadai, bahang Joab witing ridi kalwi kalahwi awaihna, bahang amonita balna saunina kidika bitik daukalpamna dai. Ban kiwi, Rabá kidika awaihwi yaklawi, niningna kau kalbauwi bitik daukalpamna dai. Devid laih Jerusalén yakat sakdai.

²Usnit kat Devid yaklauwi kidika kingni tunan paknin gol manah duwa dai kidika duna, bahang kipala dahlwa duwa dai kidika tikini paun 66 duwa dai, bahang kidika paknin Devid yakat papakna dai. Dawak Devid bik kidika tawanni nuhni kaupak di minit nuhni duwa balna kidika mahni palni yakna dai,

³dawak tawan nuhni yakat muih balna bangdai kidika bik yakna dai dawak sa, di minik unitak yaknin dini ayan kau yamna balna dawak ki balna bik diawakat wark kalalahna dai. Devid witing amonita tawanni nunuhni balna kidika bik sihm kaput yamna dai, dawak usnit kat kalbauyang muihni balna duwa kidika bitik kalpakwi Jerusalén yakat nawatwi uina dai.

⁴Usnit kat Gezer yakat kalbaunin as sakdai filisteo muihni balna karak. Kidika mani, Husa kaupak Sibecai kidika yaklau Sipai yakat ina, dawak sau kat lakna dai, muih nunuhni balna sulanina dai kidika.

⁵Dawak filisteo balna niningna yakat kalbaunin ūk sakdai kidika, Jair walanibis al Elhanán yaklau, Gat kaupak Goliat wirahni al Lahmi kidika yakat īna dai, langnisa panan kidika laih nuhni palni dai sihm asna yamnin dini kapat.

⁶Gat yakat bik kalbaunin ūk sakdai. Kidika yakat muih al as naini kat sakdai, kidika laih tingni dawak kalni bikis balna kidika bitik kat 24 duwadai: tingni nakas kidika tiaskauas duwadai dawak kalni nakas kidika bik sihm tiaskauas duwadai. Witing bik sihm muih nunuhni balna sulanina dai,

⁷kaunah Israel muihni balna niningkauh yaklauwa kat Simei walanibis dawak Devid wirahni Jonatán yaklau īna dai.

⁸Adika muih nunuhni balna adika laih Refa sulani balna dai, Gat kaupak kidika, kaunah Devid dawak yaihnit kau kalbauyang muihni balna duwa kidika tingnina yakat bubukna dai.