Read Mayangna 1 Crónicas 21 Bible Online

1 Crónicas 21 - Mayangna bible

1 Crónicas 21

¹Insal muih yulni yakyang kidika[54], Israel muihni balna niningna yakat yaklauna dawi Devid yakat pakna dai Israel muihni balna ayangnina ana atnin.

²Bahang Devid yaklau Joab yakat tawan tanituna balna yakat bik yamnin dipakna dai: —Yawa Israel muihni balna ayangnina atanauh Beerseba kaupak Dan kat, dawak wauhnitaya kidika duaita yatanang kat talkuh muih ampus pa.

³Kaunah Joab yaklau nangnitlana: —Dawan yaklau tawanma muihni balna kidika mahwi mawang waradika ampus kat kidika minit yakat wat 100; ¿kaunah ais witingna bitik kidika king man dima yamyang balna awaskat pah? ¿Ais yulni king man adika dukih mawih? ¿Ais yulni Israel kidika pāt yakat ānin yah?

⁴Kaput bik, king yamni yulna kidika Joab yamna dai, dawak Joab laih kalahwi kiwi Israel sauni bitik awaihlawi dawi Jerusalén yakat nawatwi kiuna dai.

⁵Joab yaklau Devid yakat kalana dai muih ampus ayangnina ana kat bitik, dawak Israel sauni bitik yakat kalahna kat muih ahal manah 1.100,000 bangdai war kalbaunin sip balna kidika, dawak Judá yakat laih 470,000 bangdai.

⁶Kaunah Leví dawi Benjamín karak sulanina balna kidika laih pasyakat awi kukulwas dai, kat Joab yamni talwas dai bahang king yaklau yamnin pakna kidika.

⁷Papang nining yakat adika dini balna bitik dutni manah talna dai, dawak Israel minit yakat wah as sihna dai.

⁸Kaunah Devid witing yulni balna kidika Papang yakat yakwi kalyulna dai: —Adika yamtik di dutni palni as yamnayang. Kaunah waralaih kalma dinit yakat buktayang man dima yamyang adika dutni datang kat diswang, kat tapdadas as kapat yamnayang.

⁹Bahang Dawan yaklau Devid dini yamyang di talyang Gad yakat kalyulna:

¹⁰“Devid yakat yawa talah, dawak yang lawik witing yakat di bas kalyultayang kaltih, dawak as wal'yakwang angdika yang lawik yamna atnik dukih kalawa kidika.”

¹¹Gad laih Devid yakat kaltalna kiuna dawi kalyulna: —Dawan yaklau adika yulwi: walyakta

¹²kurih bas yuh wauhnin kidika kaupak, minit bayakna manah waiku bas man namangkauh yaklalauwa balna isninaparah mauhuiwa kidika kaupak, kidik awaskat Israel sauni yakat siknis manah ma bas Dawan isniparah dinit yakat, Dawan innisal yaklau Israel sauni bitik yakat daukalwarang kidika kaupak. Waralaih barangni kulta latah ais nangnitlanam kidika yasihna muihni kidika yakat.

¹³Devid yaklau Gad yakat nangnitlana: —Kaidinin as nuhni kidika yakat sakyang. Waralaih yamni, yamni karangki yang Dawan tingni yakat bukki kat, dalani lani duwa kidika nuhni bahang, kaunah muih balna tingnina yakat laih awaski.

¹⁴Bahang Dawan yaklau Israel minit yakat siknis as sihna dai, dawak Israel muihni balna 70,000 dadauna dai.

¹⁵Dawak Papang yaklau insal as sihna dai Jerusalén kidika daukalpamna atnin. Kaunah daukalpamwa sak kat, Dawan talwi dalani dakana dai, dawi insal daukalwasak dai yakat yamnin pakna: “¡Kamanah datah, baisa daukalwinih!” Kidika minitni yakat, Dawan innisal kidika Jebuseo kaupak Ornán di minik sakwi yakwa pāni kidika yaihnit yakat sakdai.

¹⁶Devid wauhyaklauwi talwak, Dawan innisal kidika kisang dawi sau kidika karak walsah yakat sakdai, isparah as uni kaupak yakwi duna kat, Jerusalén nining yakat yuna sakdai. Bahang Devid dawi muihbararak balna karak, asna utuhni kawi abukwi sau yakat lalakna dai sapanina kau,

¹⁷dawak Devid yaklau Papang yakat kalyulna: —¡Yang lawik sihnayang dai muih balna ayangnina ānin kidika! ¡Yang kuduh dutni yamnayang kidika! ¿Kaunah adika balna di tatalwas adika ais as dutni yayamnayah?[55] Yang Papangki Dawan, yang kalma dinit yakat buktik mayultayang man wahma kidika yang dawi walakibis balna karak mikitna yakat bukwang, kaunah tawanma kidika laih dalani kalawinih.

¹⁸Bahang Dawan innisal yaklau Gad yakat yamnin pakna Devid yakat kalyulwak sakripais busnin pāni as Dawan yakat yamwi kalana atnin jebuseo muihni Ornán di minik sakwi yakwa kidika pāni yakat.

¹⁹Bahang Devid kiwi yamna dai Gad yaklau kalyulna dai kidika Dawan ayangni kau.

²⁰Ornán witing di minik sakwi yakwa sakdai kidika, wiryaklawi insal kidika talna dai, kaunah walanibis ahal balna witing karak bangdai kidika laih, uiwi yakmamaldana dai.

²¹Devid witing Ornán sakdai kidika yaihnit yakat kiuna mani kat, Ornán witing Devid talwi plawar minik sakwi yakwa pāni kidika kaupak kalahwi dawi Devid muhni yakat abukna dai.

²²Bahang Devid yaklau Ornán yakat kalyulna: —Plawar minik sakta yaktaman pāni kidika yatah, kidika pāni yakat sakripais busnin pāni as Dawan yakat yamtik kalana atnik. Ampus minit kat kaput yabakantah, siknis kidika tawan kaupak kalahna atnin yulni.

²³Dawak Ornán yaklauwi nangnitlana: —King dutah dawak man namang yakat amput yamni talaman kat kaput yamtah. Yang lawik turuh ahalmuk balna kidika maki sakripais karauni kauna busna atnin, di minik sakwi yaknin panani balna kidika laih kuh dawak plawar minik kidika laih minit dis kalanin dini. ¡King man yakat adika dini balna bitik matayang!

²⁴Kaunah king Devid yaklau nangnitlana: —Tingkih lani matayang, kaunah bitik kau minit ampus kat kaput bakannik karangki, kat man dima kidika sip madakyaktik Dawan yakat kalatas awakiki dawak sakripais karauni kaunah bik bustik kalatas awakiki di as yang walahki minit awas kidika.

²⁵Aput laih, Devid yaklau kidika pāni minit Ornán yakat lauwi kalana dai gol lalahni dadasni manah 600,

²⁶dawak kidika pāni yakat sakripais busnin pāni as Dawan yakat yamwi kalana dai dawak kidika yakat sakripais karauni kauna dawi Papang karak watwi yamni kalahna atnin sakripais busna dai. Usnit kat Dawan yakat kalyulna dai dawak witing yaklau nangnitlana dai makau kisang kaupak kuh sihwinah sakripais karauni kauna busnin pāni kidika minityakat.

²⁷Bahang Dawan yaklau Insal yakat kalyulna isniparah kidika watwi atusna atnin.

²⁸Kidika mani yakat, Devid witing talwak Dawan yaklau dakana kat jebuseo muihni Ornán plawar minik sakwadai kidika pāni yakat, kidika pāni yakat sakripais busna dai.

²⁹Kauhmak wanilang yakat Moses yaklau Dawan yakat ū labanni dawak sakripais karauni kauna busnin pāni yamwi kalana dai karang bik, kaunah kidika mani balna yakat kidika Gabaón pāni holi yakat bangdai,

³⁰Devid sip kiwas dana dai kidika pāni yakat Papang yakat yulwi dakana atnin, kat Dawan innisal isniparah kidika talwi uba palni yamaduna dai kidika yulni.