Read Mayangna 1 Crónicas 22 Bible Online

1 Crónicas 22 - Mayangna bible

1 Crónicas 22

¹Kidika yulni Devid yaklau yulna: “Akat sakkarang Papang ūni kidika, dawak Israel sakripais karauni kauna busnin pāni kidika bik.”

²Usnit kat Devid yaklau muih sihna dai Israel sauni yakat sau ūk kaupak yalalahwa balna yakat diyuyulwak kalududuhna atnin, dawak kipala sahyang balna yakna dai kipala sasahwakat Papang ūni kidika yamna atnin yulni.

³Baisa kidika minit yakat ayan mahni palni ridi yamna dai silak yamwi dūr balna kidika pana atnin dawak bras bik mahni palni uduhna dai,

⁴dawak suhun tatni balna bik mahni palni uduhna dai, kat Sidón dawi Tiro muihni balna yaklau suhun tatni mahni palni duaiwi kalalana dai kidika yulni.

⁵Devid laih kulwa dai: “Walakibis Salomón laih baisa wahma bin as kurihni dibindauh ki, dawak Dawan ūni yamnin kidika laih baisa nuhni palni atninki, ayangni nuhni dawak yaksihni atninki sau bitik yakat; kaput bahang di bitik ridi yamtik datik kalakiki.” Kidika yulni Devid witing dauwas tanitkauh di nunuhni yamwi danadai.

⁶Usnit kat walanibis dai, Salomón yakat kalyulwak kiuna, dawak tingni yakat awi dana Israel Papangni Dawan ūni kidika yamna atnin,

⁷aput kalyulna: “Yang walakibis al, yang Papangki Dawan ūni as yamtik kalanik kulnayang dai.

⁸Kaunah Dawan yaklau yayulna: ‘Yang talnayang man kidika uba palni a utuhnaman dawak kalbaunin bik mahni palni kalbaunaman; kidika yulni man lauwa laih yang ūki kidika yamta yatas awamaki.

⁹Kaunah walabis al as duma ki kidika laih takat muih al as kulnin lani aslah duwa karang ki; dawak baisa kidika minit yakat yang lawik yamting kat pa balna bitik kau witing niningkauh yaklalauwa balna kidika yaklau kulnin aslah lani kaldadawarang ki. Kidika yulni witing ayangni laih Salomón[56] karang ki. Witing mani balna yakat kalanayang karang kulnin aslah lani dawak isninglak lani bik Israel yakat.

¹⁰Witing yaklau makat yulnin ūni as yamwi yana karang. Witing kidika yang walakibis al as karang dawak yang adika witing Papangni as awaki, dawak witing king kawa lani kidika Israel yakat kalana awaki ban kaput atnin.’

¹¹Waralaih yang walakibis al, Dawan kidika man karak karang kaput karak man Papangma Dawan ūni kidika yamta saran laihna atnam, man lauwa yamna atnam yulni pramis kalahna kidika kaput.

¹²Dawan yaklau sins lani mawarang, witing yaklau Israel kingni mahawarang mani kat, man Papangma Dawan lāni kat yamna atnam yulni.

¹³Bitik palni yamni makalahwarang, Dawan yaklau lā balna Israel yamna atnin Moses yakat kalyulna kaput yamma kat. ¡Kulnam dadasni dutah dawak barangni awah; kulnam buknin awaski dawak bik yamaduwinih!

¹⁴Talah, yang parasni palni wark alahwik di balna ridi yamnayang Dawan ūni yamna atnin yulni gol manah bik 66,000, lalah yakat bik 660,000 dawak bras dawi ayan karak laih mahni palni, paun ānin bik sip awas kidika. Tat dawi kipala balna bik ridi yamnayang, sipki man lauwa baisa minit lakna atnam.

¹⁵Baisa kidika minit yakat yaihmat yakat dutaman wark muihni balna mahni, kipala sahyang balna, simint kau ū yamyang balna dawak tat kau ū yamyang balna bik, dawak di bitik yakat warkni yamwi lan balna gol kau, lalah kau, bras kau dawak ayan kau bik. Kaput bahang, ¡mahka wark alahwanauh, dawak Dawan yaklau ilp manawarang!”

¹⁷Usnit kat Devid yaklau Israel muihni bararak balna bitik yakat yamnin dipakna walanibis al Salomón yakat ilp kalana atninna, aput diyulna dai:

¹⁸“Manna Papangmana Dawan kidika manna karak dai dawak pa balna bitik yakat kulnin aslah lani kidika diana, bahang witing yaklau yang tingki dinit yakat awi dana adika sauni muihni balna bitik kau, dawak adika sauni adik Dawan kalni dinit yakat dawak witing tawanni dinit yakat bik awi dana.

¹⁹Kaput bahang, barangni kulta waltanauh Papangmana Dawan yakat. Kaput laih lauwa laihta yamtanauh Papang pāni holi kidika, Dawan pranimis lani baksni lani baksni kidika dawak di dunin dini balna Papang dini yakna balna kidika duwi kiuna atnin Dawan ūni yamwarang yakat.”