Read Mayangna 1 Crónicas 23 Bible Online

1 Crónicas 23 - Mayangna bible

1 Crónicas 23

¹Devid witing uman muihbarak kalna mani kat, walanibis al Salomón kidika Israel kingni ana dai,

²dawak Israel tanituna balna bitik uduhna, dawak sumalyang balna dawi Libait muihni balna bik.

³Bahang Libait muihni balna kulwi tatalna kurih 30 duduwa balna kidika minit kauh, dawak kulwi tatalwak kalahna dai muih ahal manah 38,000.

⁴Kidika balna kaupak, 24,000 kidika yakna dai makat yulnin ūni warkni balna kidika tatuna duna atnin, 6,000 kidika laih kalbauyang muihni balna taninatuna dawak wihta balna atninna,

⁵4,000 kidika laih dūr maintalyang balna atnin dawak 4000 ūk kidika laih Dawan yakat ayangni nuhni yamna atnin Devid yaklau paswi yakisdinin dini balna sihna dai kidika kau.

⁶Devid yaklau sahyakna dai uduhna balna kau, Leví walanibis balna ampus duwadai kat kaput: Gersón, Coat dawi Merari.

⁷Gersón walanibis ahal balna: Laadán dawi Simei.

⁸Laadán walanibis ahal balna laih bas dai: barakni kidika laih Jehiel, Zetam dawi Joel.

⁹Simei[57] walanibis ahal balna bik sihm bas dai: Selomit, Haziel dawi Harán. Adika balna laih Laadán sulani kidika walaninabis balna taninatuna dai.

¹⁰Simei walanibis ahal balna laih arungka dai: Jahat, Ziza,[58] Jeús dawi Bería.

¹¹Barakni kidika laih Jahat dai, dawak usnit kidika laih Ziza, kaunah Jeús dawi Bería karak laih walabis ahal mahni dis dai kidika yulni aslah banawi kukulna dai.

¹²Coat walanibis ahal balna laih arungka dai: Amram, Izhar, Hebrón dawi Uziel.

¹³Amram walanibis ahal balna laih adika dai: Aarón dawi Moses. Aarón laih Papang yaklau walwi yakna dai minit dis kalanin dini balna maisihni dis kidika witing munah kalana atnin, Dawan muhni yakat walapni yamni kidika bisna atnin, dini yamwi dawak blis yamwa kidika ban yulna atnin, wark as Aarón dawi walanibis balna karak yamninna dini kidika ban kaput yamna atninna.

¹⁴Papang dini yamyang Moses, dawi sulani balna kidika bik Leví sulani balna pasyakat bahana dai.

¹⁵Moses walanibis ahal balna laih adika dai: Gersón dawi Eliezer.

¹⁶Gersón walanibis balna kaupak tatuna dai kidika laih Sebuel dai.

¹⁷Eliezer walanibis al tatuna dai kidika laih Rehabías dai, dawak baisa walabis ahal dis dai; kaunah Rehabías laih takat mahni palni duna dai.

¹⁸Izhar walanibis al tatuna dai kidika laih Selomit dai.

¹⁹Hebrón walanibis ahal balna laih adika dai: tatuna kidika laih Jeraías; usnit kidika laih Amarías; bas kidika laih Jahaziel dawak arungka kidika laih Jecamán.

²⁰Uziel walanibis ahal balna laih adika dai: tatuna kidika laih Micaías, dawak usnit kidika laih Isaías.

²¹Merari walanibis ahal balna laih adika dai Mahli dawi Musi. Mahli walanibis ahal balna laih adika dai Eleazar dawi Cis.

²²Eleazar laih walabis ahal dis dauna dai: walabis yayal manah duwa dai, Papangni wirahni al Cis walanibis ahal balna karak kalduduna dai.

²³Musi walanibis ahal balna laih bas dai: Mahli, Edar dawi Jeremot.

²⁴Adika balna dai Leví sulani balna, walaninabis karuk ayangnina uhulna dai kidika ayang ānin yakat, walaninabis balna taninatuna kapat, kurih 20 kaupak minit kauh kidika laih makat yulnin ūni warkni balna yakat wark kalalahwa dai.

²⁵Devid yaklau yulna dai: “Dawan, Israel Papangni yaklau, witing tawanni yakat isninglak lani kidika kalana dawak witing Jerusalén yakat yalahwarang ban kaput atnin.

²⁶Kidika yulni Libait balna yaklau Dawan ūni labanni kidika dawak prias yakat dunin dini balna kidika uman duwi uiwas karangki.”

²⁷Kaput laih, witni yakat Devid yaklau kulnin lani balna ana dai kaput, Leví sulani balna ayangnina ahana dai kurih 20 duduwa balna minit kauh kidika,

²⁸dawak sumalyang balna, Aarón sulani balna tingnina dinit yakat wawatna dai, makat yulnin ūni warkni balna yamna atnin, watak balna dawak payahnin pāni balna kidika maintalna atnin dawak Papang dini yakna balna kidika maisihni dis yamna atnin, kaput bik makat yulnin ūni warkni ūk ūk balna kidika bik yamna atnin.

²⁹Plawar busna maisihni dis balna kidika, minit dis kalanin planiwar minik balna kidika, plawar pupuhnin dini dis baini laihwi kiswi minit yakat damni utuhna balna kidika, minit dis kalanin dini lahna balna kidika, dawak paun awi kulwi talnin dini balna bitik kidika witingna tingnina yakat ana dai.

³⁰Baisa kidika minit yakat ma bitik yakat makat yulnin ūni yakat bang atnin dai mapiris niningkauh yakat dawak ma ulah nining yakat bik Dawan yakat tingkih lani kalawi dawak ayangni nuhni yamna atnin yulni,

³¹dawak sakripais karauni kauna balna kidika bitik Dawan yakat buswi kalalawa mani kat yakurupdinin mani balna[59] yakat, waiku wisam alasnina balna yakat dawak alasna mani nuhni kulna balna yakat, ban Dawan dini yayamwa dai witingna ampus ayangnina ahana kat kaput.

³²Papang karak kalpaknin ūni labanni kidika dawak holi pāni kidika bik witingna tingnina yakat ana dai, makat yulnin ūni warkni yamwīnah witing wirahni balna Aarón sulani balna karak.