Read Mayangna 1 Crónicas 27 Bible Online

1 Crónicas 27 - Mayangna bible

1 Crónicas 27

¹Kidika tanit yakat Israel muihni balna ayangnina ahana kidika kaiwi walaninabis balna taninatuna balna, kalbauyang muihni uduhna nunuhni taninatuna balna, dawak king yaihnit kau kalbauyang muihni balna duwa dai kidika, dawak kalbauyang muihni sahyakna balna awarnina waiku kau wark yayamwa dai kidika kurih as pasyakat. Sahyakna as kidika muih ahal 24,000 bangdai.

²Waiku tatuna yakat kalbauyang muihni balna sahyakna kidika: taninatuna laih Jasobeam dai, Zabdiel walanibis al,

³Fares sulani dawak kalbauyang muihni taninatuna balna bitik waiku tatuna yakat wark yayamwa dai kidika taninatuna dai.

⁴Waiku bu yakat kalbauyang muihni balna sahyakna kidika: taninatuna laih Dodai dai Ahoa kaupak[65] kidika.

⁵Waiku bas yakat kalbauyang muihni balna sahyakna kidika: taninatuna laih Benaía dai sumalyang Joiada walanibis al,

⁶witing laih kulninna dadasni balna 30 kidika kaupak as dai dawak bik taninatuna dai. Kaunah walanibis al Aminadab yaklau adika sahyakna kidika tatuna kawa dai.

⁷Waiku arungka yakat kalbauyang muihni balna sahyakna kidika: taninatuna laih Asael dai, Joab wirahni al. Witing yakat laih walanibis al Zebadías yaklau kalyakwi pāni yakat kana dai.

⁸Waiku singka yakat kalbauyang muihni balna sahyakna kidika: taninatuna laih Samhut dai, Izraíta kaupak.

⁹Waiku tiaskauas yakat kalbauyang muihni balna sahyakna kidika: taninatuna laih Ira dai, Tecoa tawanni kaupak Iques walanibis al.

¹⁰Waiku tiaskauas yakat kalbauyang muihni balna sahyakna kidika: taninatuna laih Heles dai, paltita[66] muihni, Efraín sulani.

¹¹Waiku tiaskaubās yakat kalbauyang muihni balna sahyakna kidika: taninatuna laih Sibecai dai, Husa kaupak Zera sulani.

¹²Waiku tiaskauarungka yakat kalbauyang muihni balna sahyakna kidika: taninatuna laih Ebiezer dai, Benjamín sulani kaupak, Anatot pāni kau yalahwa dai kidika.

¹³Waiku salap yakat kalbauyang muihni balna sahyakna kidika: taninatuna laih Zera sulani dai bahang witing laih Netofa kaupak dai ayangni laih Maharai.

¹⁴Waiku 11 yakat kalbauyang muihni balna sahyakna kidika: taninatuna laih Efraín sulani dai Piratón pāni kaupak dai kidika, ayangni laih Benaía.

¹⁵Waiku 12 yakat kalbauyang muihni balna sahyakna kidika: taninatuna laih Otoniel sulani dai Netofa pāni kaupak dai kidika, ayangni laih Heldai.

¹⁶Israel sulani balna taninatuna balna dai kidika: Rubén sulani tanituna dai kidika laih Zicri walanibis al Eliezer dai; Simeón sulani tanituna kidika laih Maaca walanibis al Sefatías dai;

¹⁷Leví sulani balna taninatuna laih Kemuel walanibis al Hasabías dai; Aarón sulani balna taninatuna laih Sadoc dai;

¹⁸Judá sulani balna taninatuna laih Devid wirahni Eliú dai; Isacar sulani balna taninatuna laih Micael walanibis al Omri dai;

¹⁹Zabulón sulani balna taninatuna laih Abdías walanibis al Ismaías dai; Neftalí sulani balna taninatuna laih Azriel walanibis al Jerimot dai;

²⁰Efraín sulani balna taninatuna laih Azazías walanibis al Oseas dai; Manasés sulani balna papuswayah kidika taninatuna laih Pedaías walanibis al Joel dai;

²¹dawak sulani papuswayah ūk balna Galaad kau bangdai kidika taninatuna laih Zacarías walanibis al Iddo dai; Benjamín sulani balna taninatuna laih Abner walanibis al Jaasiel dai;

²²Dan sulani balna taninatuna laih Jeroham walanibis al Azareel dai. Adika balna dai kidika kuduh Israel sulani balna taninatuna balna dai kidika.

²³Devid witing muih kurih 20 lalaihwas balna kidika laih ayangnina awas dai, kat Dawan yaklau pramis yamna dai bahang Israel sulani balna kidika mahni yamna atnin sihm kisang kau yala balna kapat.

²⁴Joab mahka witing muih ayangnina ana, kaunah dahn yamwas dana, kat kidika yulni Israel yakat wah as bukna dai bahang. Kidika bahang Israel kingni balna yulnina uhulna wauhnitaya yakat kidika numniba kalahwas ki Devid ulna yakat.

²⁵King ūni yakat lalah laihyang tunan muihni kidika laih Adiel walanibis al Azmavet dai, dawak di uduhwi puna balna di dahna balna pasyakat, tawan nunuhni balna pasyakat, tawan balna pasyakat dawak saunina kiwi watwa kau yakat bik, tingni yakat ana dai kidika laih Uzías walanibis al Jonatán dai.

²⁶Wark muihni di dahwi yayakwa balna taninatuna kidika laih Quelub walanibis al Ezri dai.

²⁷Wain dahyang balna taninatuna kidika laih Ramat kaupak al as dai kidika laih Simei dai, dawak wain dakwi uiwi puwa kidika laih Sefam kaupak Zabdi dai.

²⁸Olib minik dakyang dawak asangpas kau ani damni minik dakyang balna kidika taninatuna laih Gedera kaupak Baal-hanán dai, dawak disala punin pāni balna kidika laih Joás tatuna dai.

²⁹Sarón sauni kau turuh balna bang kidika maintalwa muihni kidika laih Sarón pāni kaupak Sitrai kidika sakdai, dawak kidika sauni langni balna kau turuh balna bangkat maintalwa muihni kidika laih Adlai walanibis al Safat sakdai.

³⁰Kiamil balna maintalyang kidika laih Ismael kaupak Obil dai; biriku balna maintalyang kidika laih Meronot kaupak Jehedías dai;

³¹dawak sip balna maintalyang muihni kidika laih agareno muihni Jaziz kidika dai. Adika muihni balna bitik laih king Devid dini maintalyang balna dai.

³²Jonatán Devid kanni, witing laih al as sins nuhni duwa dai bahang witing laih yul sumalyang as dai, dawak Hacmoni walanibis al Jehiel laih king walanibis balna miniknadāwadai.

³³Ahitofel bik king yaihnityak yul sumalyang as dai, dawak arquita muihni Husai kidika laih king yaklau yamni kaltalna alni as dai.

³⁴Ahitofel warkni kidika laih Benaía walanibis al Joiada dawak Abiatar karak warkni kidika duduna dai. Kalbauyang muihni balna taninatuna nuhni kidika laih Joab dai.