Read Mayangna 1 Crónicas 28 Bible Online

1 Crónicas 28 - Mayangna bible

1 Crónicas 28

¹Devid yaklau Jerusalén yakat Israel tanituna balna bitik uduhna dai: sulani balna kidika tanituna balna, kalbauyang muihni balna sahyakna kat king dini yayamwa kidika taninatuna balna, sau balna bitik, king dawi walanibis balna tuninaruh minit talyang muihni balna, nuhni dikulna muihni balna[67] dawak kalbauyang muihni balna bitik.

²Bahang Devid kalni kau yaklau dawi yulna: “Yadakanauh, yang wirahki balna dawak yang tawanki: yang kulnayang dai Papang pramis yamna lani baksni kidika pāni as yamwi laktusna atnin kidika yakat ban atnin, dawak kidika pāni yakat Papang tronni kidika lakna atnin, dawak di balna ridi yamnayang dai yamna atnik.

³Kaunah Papang yaklau yayulna: ‘Man lauwa laih makat yulni ūni as yamta yatas awama ki, kat man laih kalbauyang muihni as man dawak bik a utuhnaman bahang.’

⁴Kaput kaunah, Dawan, Israel Papangni yaklau yang walakibis balna bitik pasyakaupak yawalwi yakna Israel kingni ban kaput atnik. Bahang witing yaklau Judá sulani kidika walwi yakna kabamint kana atnin; Judá sulani kaupak yang walakibis balna kidika walwi yakna; dawak yang wirahki ahal balna kidika paskaupak yang adika yawalwi yakna Israel bitik minit yakat king atnik.

⁵Dawak waralaih, walakibis ahal balna bitik pasyakat, bang mahni palni ki Dawan yaklau yana kidika, Dawan yaklau walakibis al Salomón kidika walwi yakna Dawan king kawa tronni yakat yalahna atnin Israel minit yakat.

⁶Dawan yaklauwi bik yayulna: ‘Walamabis al Salomón kidika kuduh yang ūki dawak watakki balna yamwi yawarang kidika, kat yang walakibis kapat waltik yaknayang bahang, dawak yang laih witing Papangni awaki,

⁷dawak king kawa lani kidika ban kaput atnin kalaki, witing wark parasni kalahwi yang laki balna kidika tanit yakat yamwi kiwarang kat warmani kat yamwa kaput.’

⁸“Bahang waralaih, Israel balna bitik muhnina yakat, adika kaluduhna Dawan dini kidik, dawak maPapangki maidakawa kidika, manna Papangmana Dawan lani balna kidika bitik daka yamtanauh, adika sauni nuhni yaksihni adika manna dimana atnin yulni, dawak usnit kat walamabis balna yakat duainamna ban kaput atnin.

⁹Dawak Salomón man laih, yang walakibis, man Papangma papangni kidika amangnilatah dawak ismang bitik dawak kulnam yamni karak dini yamtah, kat Dawan yaklau kulnin lani balna bitik kidika laihwi talwi dawak satuk bik yamwi. Kaput bahang, man lauwa walmakat, witing yaklau yamwakat yakma; kaunah witing kaupak naikau alahwamakat, maruhmwi dawarang ban kaput atnin.

¹⁰Waralaih kulnam yakat dutah Dawan yaklau mawalwi yakna witing ūni holi pāni kidika yamta kalana atnam yulni. Kaput bahang, ¡kulnam dulautah dawak wark alahwah!”

¹¹Bahang Devid witing walanibis Salomón tingni yakat ana dai makat yulnin ūni, ū malaluihni balna kidika, di punin ūni balna, maluihni kau ahni panunuhni balna kidika, paskau daklana balna kidika dawak holi pāni kidika, amput yamnin kulna wauhnitaya kidika.

¹²Baisa kidika minit yakat sinsni yakat wark balna yamnin duwa dai kidika bitik kalana makat yulnin ūni watakni balna yakat dawak yaihnit kau daklana atnin balna, lalah balna kidika dawak minit dis kalanin dini Papang dini yakna balna punin pāni balna kidika bik,

¹³dawak sumalyang balna dawi Libait balna awarnina kawak kaninna pāni daklana balna kidika dawak makat yulnin ūni warkni balna bitik, dawak makat yulnin ūni kau prias yakat dunin dini balna kidika bik sihm.

¹⁴Gol dawak lalah bik mahni palni kalana dai gol dawi lalah kau di yamna atnin prias yakat dunin dini balna;

¹⁵awas ilnin pāni balna dawak awasni balna kauna, gol kau ampus yamnin kat sihm lalah kau bik kaput, kidika dini balna as ampus tikini dunin kat kaput praisni kalana dai;

¹⁶dawak tibil balna kidika bik sihm kaput yamna dai, gol kau ampus kat lalah kau bik sihm kaput, plawar busna Papang dini yakna kidika, lakwi parnin pāni balna kidika.

¹⁷Baisa kidika minit yakat gol kalana dai park balna, sutak nunuhni balna, dawak sau suba balna yamna atnin, gol dawi lalah bik minit bayak kalana dai sutak balna kidika yamna atnin, kidika dini as ampus tikini dunin kat kaput.

¹⁸Gol busna manah minit bayak kalana dai walapni busnin pāni kidika yamna atnin, dawak gol manah sihm kaput kalana dai kar yamna atnin yulni, yuldarang kat, muih lawanina duduwakat lawanina kau tanit dadakwa kidika Dawan kalpakwi la yamna lani baksni yakat.

¹⁹Adika bitik kidika ulwi dana pakdai Dawan yaklau Devid yakat niningkana kidika, kidika yakat yulwa dai kidika amput wark balna bitik yamnin dai kidika wark yamnin wauhnitaya kidika karak.

²⁰Bahang Devid yaklau Salomón yakat kalyulna: “¡Kulnam dadasni dutah dawak bik barangni awah, dawak wark balna yakat tingma atah! ¡Datang kulnam kulnam bukwas kawang dawak bik yamaduwinih, kat yang Dawan Papangki kidika man karak karang bahang! Witing laih madawas karangki angkat mani makat yulnin ūni warkni balna kidika dahn kalwarang kat.

²¹Akat bangki sumalyang balna dawak Libait balna awarnina makat yulnin ūni warkni balna yakat yamna atnin; wark balna bitik yakat muih satni bitik ilpnina kidika duma, wark satni bitik yakat lan; dawak tunan muihni balna dawak tawan muihni balna bitik kau man lauwa di yamnin yultaman kidika yayamwarang.”