Read Mayangna 1 Crónicas 5 Bible Online

1 Crónicas 5 - Mayangna bible

1 Crónicas 5

¹Israel walanibis barakni Rubén walanibis balna laih adika dai Hanoc, Falú, Hezrón dawi Carmi. Rahm laih Rubén kidika walanibis barakni dai, kaunah walanibis barakni rahmni balna kidika disna dai Papang yulni yakat la minit bayakna kidika yulni, dawak kidika rahmni balna kidika Israel walanibis ūk José walanibis balna yakat wiryaklana dai. Kaput bik, usnit kat José laih parasni nuhni duna dai wirahni ūk balna kidika karak dawakat, dawak witing kaupak tatuna as kalahna dai; kaunah walanibis barakni rahmni balna kidika laih José rahmni balna dai.

⁴Joel sulani balna palni laih adika balna dai Semaías, Gog, Simei, Micaía, Reaía, Baal dawi Beera, rubenita balna taninatuna, Asiria kingni Tiglat-pileser yaklau laihwi pa ūk kau duwi kiuna dai kidika.

⁷Beera wirahni balna laih adika dai amput sulani balna ayangnina ahana kat kaput, tatuna kidika laih Jeiel, Zacarías,

⁸dawi Joel walanibis Sema mani Asaz walanibis Bela kauna. Bela laih Aroer sauni yakat yalahna dai dawak witing sauni kidika laih Nebo dawi Baal-meón kat dai.

⁹Ma kilwa niningkauh kidika laih kauhmak wanilang kung kat kiuna dai Éufrates wasni kaupak, bahang tuniruh balna kidika mahni palni sahwi mahna dai Galaad sauni yakat.

¹⁰Saúl king kana mani balna yakat, rubenita balna laih war kalbabauwa dai agareno balna karak, kaunah minitnatang bayakwi Galaad sauni kaupak ma kilwa niningkauh yakat pa duduna dai.

¹¹Gad sulani balna rubenita balna muhnitna yakat yalalahna dai kidika, Basán sauni kaupak Salca tawanni nuhni kat kidika balna laih adika balna dai

¹²tatuna kidika laih Joel, dawi witing kaupak laih Safán, usnit yakat Jaanai, dawi usnit yakat Safat.

¹³Wanaihnina balna walaninabis karuk kidika laih adika balna dai Micael, Mesulam, Seba, Jorai, Jacán, Zía dawi Heber, bitik kat tiaskaubu.

¹⁴Adika balna laih Huri walanibis al Abihail walanibis balna dai, Huri laih Jaroa walanibis dai, Jaroa laih Galaad walanibis dai, Galaad laih Micael walanibis dai, Micael laih Jesisai walanibis dai, Jesisai laih Jahdo walanibis dai, Jahdo laih Buz walanibis dai.

¹⁵Abiel walanibis dawak bik Guni mani Ahí, witing laih wanaihni balna taninatuna dai.

¹⁶Witingna bitik laih Galaad, Basán, tawan binina yakat, Sarón sauni di dadahwa pāni balna yakat, dawak kidika sauni kiwi watwa kat yalalahna dai.

¹⁷Witingna bitik laih wauhtaya yakat ayangnina ahana dai Judá kingni Jotam dawak Israel kingni Jeroboam mani balna yakat.

¹⁸Rubén dawi Gad sulani balna dawi Manasés sulani balna papuswayah, witingna laih kalbauyang muihni kulninna dadasni, nanitnadaknin dini, isparah, las duduwadai dawak bik lan kalbabauwa dai. Witingna bitik kat 44,760 muih ahal dai kalbaunin sip muihni manah.

¹⁹Dawak agareno, Jetur, Nafis dawi Nodab kidika balna niningna yakat kalbabauna dai;

²⁰kaunah Papang yaklau ilp diana dai, dawak agareno dawi aslah kalalahna balna kidika, tingnina yakat bubukna dai, kat kalbaunin pasyakat Papang yakat ilp yuyulna dai kidika yulni. Papang yaklau ilp diana dai kat witing kidika witingna kulninna yak awi duduna dai kidika yulni.

²¹Usnit kat witingna niningna kauh yaklalauwa muihni balna tingninalau balna kidika duwi uina dai, kiamil yakat 50,000, sip balna yakat 250,000 dawi biriku ahalmuk balna yakat 2,000. Baisa kidika minit yakat muih 100,000 kidika silak muihni diyayamna dai.

²²Niningnakauh yaklalauwa muihni balna kidika manas palni dadauna dai, kat kalbaunin kidika Papang kaupak kaina dai kidika yulni. Dawak kidika pāni balna yakat watwi yalalahna dai dilaihwi pa ūk kau diduwi uina mani kat.

²³Manasés sulani balna papuswayah kidika Basán sauni kaupak Baal- hermón, Senir, dawak Hermón asangni kat yalalahna dai, bang mahni palni dai.

²⁴Wanaihnina balna taninatuna balna laih adika dai Efer, Isi, Eliel, Azriel, Jeremías, Hodavías dawi Jahdiel, witingna bitik kidika kalbauyang muihni kulninna dadasni, ayangnina nuhni dawak wanaihnina balna taninatuna dai.

²⁵Kaunah muihnina bararak balna Papangnina niningyakat yaklalauna dai dawak bik witing nining yakat barangni awas dai, Papang yaklau witingna muhnina yakat tawan balna daninawan dauh balna daukalmukna dai yakat minitna yuyulna dai.

²⁶Kidika yulni, Israel Papangni yaklau Pul yakat yakna dai, Asiria kingni, yuldarangkat, Tiglat-pileser yakat, witing yaklau rubenita balna, gadita balna dawak Manasés sulani balna papuswayah laihwi pa ūk kau duwi kiuna dai kidika; adika pāni balna yakat diduwi kiuna dai Halah, Habor, Hara dawi Gozán wasni kidika yakat bik, warmani kat bik ban bangkidika.