Read Mayangna 2 Crónicas 1 Bible Online

2 Crónicas 1 - Mayangna bible

2 Crónicas 1

¹Salomón, Devid walanbis al kidika, Dawan parasni munah witing kingni lani kidika baisa parasni yamna, witing parasni kidika baisa nuhni yamna.

²Bahang witing Israel muihni balna bitik yulwi uduhna: kalbauyang tanina tuna balna, kabamint warkni yamyang balna, dawak witingna ū duyang tunan muihni balna bitik, witingna Israel yakat parasnina duduwa balna dai kidika.

³Dawak muih balna kalududuhna kidika bitik karak kalpakwi Gabaón kau prias ūni as sakdai yakat uina, kat yakat sakdai bahang Papang karak kalpaknin ūni labanni dai kidika, dawak kidika laih Papang dini yamyang Moses yaklauwi yamna dai kauhmak wanilang pasyakat.

⁴Kaunah Devid yaklauwi Papang lāni baksni kidika duwi kiuna Quiriat-jearim kaupak, witing pāni ridi yamna dai yakat, kat Jerusalén yakat ū labanni as dulauna dai bahang.

⁵Hur mani, dawak Uri walanibis al Bezaleel, yaklauwi sakripais busnin pāni bras kau yamna dai kidika bik, Gabaón, Dawan ūni labanni dulauna muhni tani yakat sakdai. Salomón dawak muihni balna bitik kidika yakat uina dai yulwi dakana atnin.

⁶Salomón kilwi kiuna, sakripais busnin pāni bras kau yamna Dawan muhni yakat sakdai kidika yakat, kidika laih Papang karak kalpaknin ūni labanni muhni tani yakat sakdai, bahang kidika yakat sakripais tausin as busna dai.

⁷Kidika puknita, Papang lāih kalahna dai Salomón yakat, dawi kalyulna: “Ais dukih mawa kidika yayultah, kaput laih yang lawik maki.”

⁸Salomón biriwi Papang yakat nangnitlana: “Man kulnam yamni kidika papangni Devid yakat kalanaman dai, dawak witing pāni yakat yang king yahanaman.

⁹Kaput bahang, Papang dawak Dawan, waralaih yang papangki Devid kau kalyulnaman dai kidika yamtah, kat uman king yahanaman bahang tawan as muih mahni palni sihm sau yahamni kapat yakat.

¹⁰Kaput bahang, sins lani nuhni kidika yatah, adika tawanni adik tunan āwik duyawinik; kat ¿wais sipkarangyah man tawanma nuhni palni adika kabamintni kanin?”

¹¹Papang yaklauwi Salomón yakat nangnitlana: “Adika dini kidika man dukih mawa bahang, man yultasman dai ritsni balna kidika, di yayamni balna dawak risnipik nuhni kidika, dawak waihmala balna dauninna kidika, dawak man sangmaka naini atnin kidika bik yultasman dai, kaunah man yulnaman kidika laih sins lani nuhni kidika yang tawanki kidika tanituna kawi duwi kiuna atnin yulni, kidika yakat yang king mahanayang kidika,

¹²sins lani nuhni kidika dawak di amanglanin kidika bik matayang, kaunah baisa kidika minit yakat ritsni, di yayamni dawak risnipik bik, man tamat yakat king balna kidika kaput duduwasdai, dawak bik man usmatkauh aiwarang kidika balna bik duduwas karang.”

¹³Kidika usnit kat, Salomón witing Jerusalén yakat nawatwi kiuna, kidika holi pāni Gabaón kau pakdai yakaupak,[1] Papang karak kalpaknin ūni labanni balna kidika awaihwi talna usnit yakat, Israel yakat king kana dai.

¹⁴Salomón yaklauwi uduhna kār dawak aras kilyang balna bik. Witing duwadai kār 1,400 dawak 12,000 aras kilyang balna, kidika balna bitik laih sihna dai kalbauyang ūni parasni kau war kārni bangyakat, dawak Jerusalén kau king yaihnit yakat kalbauyang balna duwasak kidika balna yakat.

¹⁵King yamna, Jerusalén yakat lalah manas atnin dawak gol bik manas atnin sihm kipala mahni kapat; dawak bik suhun kidika manas atnin sihm langnikau asangpas anini manas kapat.

¹⁶Salomón aniras balna kidika laih duwi uiwadai Muzri[2] kaupak, dawak Cilicia kaupak bik, kat king yaihnit kau di wauhwi bakanyang balna bangkidika yaklauwi kidika pāni balna kaupak bakakanwi duwi uiwadai.

¹⁷Egipto kaupak kār as bakanwi duwi uiwa kidika minit laih lalah 600 dai, dawak aras as kidika laih 150. Kaput laih hitita dawi Siria kingni balna kidika, Salomón muihni balna munah bakanwi duduwadai.