Read Mayangna 2 Crónicas 10 Bible Online

2 Crónicas 10 - Mayangna bible

2 Crónicas 10

¹Roboam kiuna dai Siquem yakat, dawak Israel muihni balna bitik yakat uina, witing kidika king āna atnin.

²Kaunah Nabat walanbis al Jeroboam kidika dakana, kauna witing laih Egipto yakat sakdai, kat king Salomón yamaniduwi kirana dai bahang, dawak kaupak watwi nawatwi kaina.

³Witing kiwang atwi kalyuyulwak kiuna, dawak Israel muihni balna bitik kalpakwi Roboam yakat yulbauna uiwi, aput kalyuyulna:

⁴—Man papangma laih uba parasni dai yangna nikingna yakat; bahang waralaih man lawa wark parasni balna kidika ingni yamtah, truknin tikini yangna akat ilna dai kidika, dawak kaput laih yangna man dima yamtanaki.

⁵Roboam biriwi nangnitnalana: —Ma bās bayakwak aiwa yatalnauh. Dawak muih balna mahka nawatwi uina,

⁶dawak kaput laih Roboam witing diyulwi dakana muihbararak balna witing papangni Salomón dini yamyang balna dai yakat, witing sangka dai mani yakat. Diyulwi dakana: —¿Manna ais yatimanah, adika muihni balna yakat biritik diyulnik kidika?

⁷Witingna yaklauwi kalyuyulna: —Man adika muihni balna yakat yamni diyamma kat, ais dukih yakat diama kat, dawak bik yul yamni karak nangnitnalama kat, witingna ban dima yayamwarang.

⁸Kaunah Roboam muih barak balna yul kalyuyulna kidika dakawas dai, dawak witing karak bararakna muihni balna yaihnit kau duwa sakdai balna yakat diyulwi dakana dai,

⁹aput yulwi dakana: —¿Manna ais yatimanah, adika muihni balna yakat biritik diyulnik kidika, witingna yāyuyulna papangki yaklauwi truknin tikini diana dai kidika yang lawik ingni yamtik dianik yuyulwa kidika?

¹⁰Kidika wawahnima balna witing karak bararakna balna kidika yaklauwi nangnitlalana: —Kidika muihni balna man yakat mayuyulna kidika witingna trukninna papangma yaklauwi diana kidika ingni yamna atnin, aput nangnitnalanam ki: ‘Yang papangki dadasni dai kat, yang laih baisa dadasniyang;[16]

¹¹witing yaklauwi manna yakat truknin tikini manana kat, yang lawik baisa tikini yamna awaki; dawak witing laih wah kau manawiswadai kat, yang laih wahni sutni kidika ayan duwa kidika kau manawiski.’

¹²Ma bās laihwak Jeroboam Israel muihni balna karak kalpakwi Roboam muhni yakat uina dai, king yaklauwi diyulna kaput.

¹³Kaunah king Roboam yaklauwi yulni parasni diyulna, muih bararak balna yul kalyuyulna kidika dakawas dawi,

¹⁴wawahma balna kalyuyulna yulni kidika diyulna: witing papangni yaklauwi truknin tikini dina dai kat, witing laih baisa tikini kat diana karang, dawak witing papangni kidika wah kau diwisna kat, witing laih wah naini sutni balna yakat ayan duwa kidika kau diwisna karang.

¹⁵Kaput laih king kidika tawan ais yulwa kidika dakawas dai, kat Dawan yaklauwi kaput kalahnin yamna dai bahang, Dawan yaklau Nabat walanbis al Jeroboam kau kalyulna yakat kalahna atnin yulni, Silo kau al as ayangni Ahías munah pramis kalyamna dai kaput.

¹⁶Israel tawanni muihni balna bitik witingna tatalwak king kidika witingna yulnina dakawas kat, aput biriwi kalyuyulna dai: “¡Devid karak mayang di as bik dismayang talna atnin! ¡Isaí walanbis al kidika karak dipahni as bik sahyakwi dunin dini dismayang! ¡Israel walanbis balna, ūmana yakat mahka yawanauh! ¡Dawak Devid laih witing ūni maintalwang!” Kidika minitni yakat Israel muihni balna kidika bitik ūnina kau uina dai.

¹⁷Israel muihni balna Judá kau yalalahwadai kidika balna laih, Roboam kidika ban witing minitna yakat king kana.

¹⁸Dawak Roboam witing Adoram kidika sihna, kat witing laih taihwi pakwak wark yamnin kidika tanituna dai bahang, dawak Israel balna bitik yaklauwi kipala kau barhwi ihina. Bahang kaput laih Roboam kidika sirihni palni kārni kau kilwi kiri kiuna Jerusalén yakat.

¹⁹Kaput laih Israel witing Devid sulani king kawi kaiwa balna niningna yakat yaklalauna warmani kat.