Read Mayangna 2 Crónicas 11 Bible Online

2 Crónicas 11 - Mayangna bible

2 Crónicas 11

¹Roboam witing Jerusalén yakat kiwi kalbauyang muihni balna uduhna dai tausin 180, kidika laih Judá sulani balna dawak Benjamín sulani balna kaupak walwi yakna dai, Israel niningyakat kalbauna atninna, dawak kingkawa kidika watwi laihwi yakwi duna atnin.

²Kaunah Dawan yaklauwi Semaías yakat yulkalbauna, Papang alni dai yakat, pakna dai:

³“Salomón walanbis al Roboam Judá kingni yakat kalyultah, dawak Israel balna bitik yakat, dawak Benjamín sulani balna yakat bik,

⁴yang lawik diyultayang, witingna wirahnina balna niningna yakat kalbaunin awaski. Witingna bitik nawatwi ūnina kau uiwang, kat yang kaput yamtayang bahang.” Witingna Dawan yulwa kidika dakawi mahka nawatwi uina, Jeroboam niningyakat kalbaunin awas yulni.

⁵Roboam laih Jerusalén yakat pāni duna dai, dawak Judá yakat tawan nunuhni pararasni balna kidika yamna dai.

⁶Baisa parasni yamna dai Belén, Etam, Tecoa,

⁷Bet-sur, Soco, Adulam,

⁸Gat, Maresa, Zif,

⁹Adoraim, Laquis, Azeca,

¹⁰Zora, Ajalón dawi Hebrón, kidika balna laih tawan nunuhni pararasni dai, Judá yakat dawak Benjamín yakat bik.

¹¹Ū pararasni balna dai kidika baisa parasni yamna dai, dawak kidika balna yakat kalbauyang tanituna tanit nuhni kidika āna dai, kasnin dini balna, disala dawak wain bik.

¹²Kidika minit yakat, tawan nunuhni bitik yakat, diana dai nanitna daknin dini langsa, bitik kau, dawak tawan nunuhni balna bitik yakat bik, kaput bik laih tanit yamni palni parasnina diana dai. Kaput laih Roboam kidika Judá dawak Benjamín kidika kawi duna dai.

¹³Sumalyang balna dawak libait balna kidika witingna Israel pāni bitik kaupak aina dai witing karak aslah kalahna atnin,

¹⁴libait balna laih witingna saunina kau sīp maintatalwa dai kidika danin dai, Jerusalén yakat kiunin yulni, dawak Judá pāni ūk balna yakat bik, kat Jeroboam dawak, usnit uiyang balna kidika yaklauwi didadawak Dawan warknina yayamwas dai bahang.

¹⁵Jeroboam laih witing silp sumalniyang balna āwi duna dai, dawan dauh balna kau makat yulnin ūni yakat, dawak spirit dutni prinias yamnin, kaput bik laih witingna turuh almuk wayani yayamna dai yakat bik.

¹⁶Kidika minit yakat, angdika muihni rahm palni Dawan usnit uinin kulwa kidika laih, sumalyang balna dawak libait balna yayamwa kidika yakat talwi witingna bik kaput usnitna uhuina, witingna Jerusalén yakat uina Papang yakat sakripais yamna atnin, witingna muihninabararak balna Papangnina Dawan yakat.

¹⁷Kaput yamwi Judá kingni kidika parasni yayamna dai, dawak Salomón walanibis Roboam yakat ilp kalalana, kurih bās, witing laih tanit yakat kurih bāslah usnit uiwi kiuna[17] Devid dawi Salomón kidika balna yayamna kidika kaput.

¹⁸Roboam laih Mahalat karak kalduduna, kidika laih Jerimot walanbis yal dai, Jerimot laih Devid walanbis al duwak Abihail bik, Eliab walanbis yal, duwak Isaí muni.

¹⁹Roboam dawak Mahalat walanbis balna kidika laih; Jehús, Semarías dawak Zaham.

²⁰Kidika usnit kat Absalón walanibis Maaca karak kalduduna, dawak walanibis balna duna kidika laih, Abiam,[18] Atai, Ziza dawak Selomit.

²¹Roboam laih yayal 18 duwa dai, yāwak ialni balna laih 70 dai, kaunah Maaca yakauh tanit dalani talwadai. Walanibis ahal 28 duna dawak yayal laih 60.

²²Roboam yaklauwi Maaca walanbis al Abiam yakat wirahni balna bitik tanina tuna āna dai, kat witing kidika king ānin kulna dai bahang.

²³Witing kulnin yamni as duna dai, walanibis balna bitik yakat, Judá sauni dawi Benjamín sauni kidika sahyakwi dianin, dawak kaput bik laih tawan nunuhni pararasni balna kidika bitik, dawak kasnin dini balna bik mahni dianin, kaput bik yalnina balna manas palni diana atnin.