Read Mayangna 2 Crónicas 13 Bible Online

2 Crónicas 13 - Mayangna bible

2 Crónicas 13

¹Abiam kidika Judá yakat king kana, Jeroboam king kana kurih 18 yakat.

²Jerusalén yakat kurih bās king kana. Witing nanangni ayangni laih Micaías bahang witing laih Uriel Gabaa kau kidika walanibis yal dai. War kalbabauna Abiam dawi Jeroboam karak.

³Abiam tatuna war kalbauna, kalbauyang muihni balna walwi yakna kidika tausin 400 balna karak kalpakwi. Dawak Jeroboam laih witing mahka kalbaunin kalahwi pāni duna, kalbauyang balna tausin 800 walwi yakna balna karak.

⁴Bahang Abiam witing kiwi yaklauna Zemaraim asangni yakat, bahang kidika asangni laih Efraín asangnipas yakat sakki, aput parasni sarahwi yulna: “¡Jeroboam, Israel muihni balna manna bitik kau, yadakanauh!

⁵¿Manna amanglatas manah Dawan, Israel Papang yaklauwi Devid king kawa kidika witing sulani balna yakat diana kidika, pramis as bahnin sip-awas kidika munah?

⁶Kaput kaunah Jeroboam, Nabat walanbis al kidika, Devid walanbis al Salomón dini yamyang dai kidika, daniwan niningkauh yaklauna.

⁷Dawak muih ahal wark kalahwas dawak muih dudutni balna kidika karak aslah kalalahna dawi Salomón walanibis Roboam yakat minit bayayakna, kat wahma dawak kulnin bik yudutni dai bahang. Kaput bahang witing parasni disdai niningnakauh yaklaunin.

⁸Kaput bahang waradika manna Dawan kabamintni niningyakat lawamanah, Devid sulani balna munah tunan duduwa niningyakat, manna laih muih mahni mana bahang, dawak bik turuh almuk wayani gol kau yamna kidika dutamana bahang, Jeroboam yamwi manana kidika damanawan dunamna yulni.

⁹¿Dawak manna kangta yaknamana awasyah Dawan sumalniyang Aarón sulani balna dawak libait balna bik, dawak manna silp sumalmanayang balna āna mana awasyah, nisan ūk balna Papang yakat tatalwas muihni balna yayamwa kapat? ¡Wais karang bik witing muihni kidika Papang dini kalnin kulwi turuh almuk as duwi dawi sīp ahalmuk tiaskaubu duaiwarangkat, witing laih sipki dawan dauh sumalniyang atnin, dawak bik rahm laih dawan dauh awaski!

¹⁰Yangna nikingnakauh laih, maPapangki kidika laih Dawan, dawak yangna ruhmtik datasyangna. Sumalyang balna Dawan dini yamnin bangkidika laih Aarón sulani balna, dawak witing dini yamyang balna kidika laih libait balna.

¹¹Witingna Dawan yakat kalalawi, mapiris, masan bik, sakripais karauni kauna buswa kidika dawak walapni busnin bik, dawak tibil yakat duwi uiwi plawar busna maisihnidis Papang dini yakna kidika, dawak maulahu bitik yakat awas kidika dahlna ki, awas dahlwi ilnin pāni gol kau yamna yakat. Kat yangna laih Dawan ais yulwa kidika yakat yamtayangna, kauna manna laih witing kidika ruhmta danamana.

¹²Manna kulnamna yakat dutanauh, yangna takitna yakat Papang dutayangna dawak sumalniyang balna bik, bahang witingna laih ridi ki trumpit puhnin manah, manna namangna yakat war kalbaunikna kidika. Kaput bahang Israel muihni balna, manna Dawan niningyakat war kalbabauwinih, manna muihmana bararak balna Papangnina kidika, kat manna minit bayaktas awanama bahang.”

¹³Jeroboam yaklauwi kalbauyang balna usnit kau aiwabangdai yakat dipakna, dangnit munah awaih dakwi kalbaunin, kaput laih Jeroboam kalbauyang balna duwa mahni kidika laih Judá muhnit yakat wawatwa. Kaput laih dangnitkau aiwabangdai kidika yaklauwi as balna kidika dangnitna munah kalahwi kalbabauna.

¹⁴Judá muihni balna kidika tatalwak dangnitna kaupak muhnitna kaupak dikalbabauna. Kaput dawak Dawan kau yuyulna dawak sumalyang balna kidika trumpit pupuhna.

¹⁵Dawak Judá muihni balna kidika war kalbauwi sararahwak, Papang yaklauwi Jeroboam yakat minit bayakna, dawak Israel muihni balna bitik laih Abiam dawak Judá muhnit yakat manahdai.

¹⁶Israel muihni balna kidika, Judá balna niningna kaupak kikirana, kat Papang yaklauwi kidika balna tingnina yakat āna dai bahang.

¹⁷Abiam dawi witing muihni balna karak muih mahni palni ihina, kidika yakat bubukna kidika laih kalbauyang muihni balna Israel paskaupak walwi yakna balna kidika tausin 500 dai.

¹⁸Kaput laih kidika mani Israel balna kidika dinit yakat bubukna dai, dawak Judá muihni balna laih pararasni dai, kat witingna laih muihninabararak balna Papangnina Dawan yakat ilp wawalna dai bahang.

¹⁹Abiam yaklauwi Jeroboam yakat uiwi kiuna dawi laihwi dakyakna, Bet-el, Jesana dawi Efraín[19] yaihnit kau tawan binina balna bitik.

²⁰Jeroboam watwi parasni duwas dai Abiam sangka dai mani balna yakat. Witni kat Dawan yaklauwi dakna dawakat Jeroboam dauna.

²¹Abiam laih parasni baisa duna dai. Witing yalni 14 duwa dai, walanbis ahal 22, dawak yayal laih 16.

²²Abiam yulni umani balna dawak, sangka mani yakat di yamna balna kidika bitik laih prapit Iddo wauhnitaya yakat ulna ki.