Read Mayangna 2 Crónicas 14 Bible Online

2 Crónicas 14 - Mayangna bible

2 Crónicas 14

¹Abiam dauwak, Devid tawanni nuhni yakat nununa. Usnit kat, witing pāni yakat walanbis al Asa kidika king kana dai. Witing kingni mani balna yakat, kulnin aslah kidika sakdai, kidik sauni bitik yakat kurih salap praisni.

²Asa di yamna balna kidika yamni barangni manah dai Papangni Dawan minikpa yakat.

³Muih pa ūk kaupak balna daninawan dauh kau sakripais busnin pāni balna dai kidika yakmukna dai, kaput bik laih Papang kukulwas muihni balna minitnayulnin ūni duduwa dai kidika bitik yakmukna; dawak kipala daninawan dauh kidika dini kukulwa dai kidika bitik sahwi dis yamna, dawak Asera wayani dai kidika bik.

⁴Kidika minit yak Judá yakat pakna Dawan yakat walna atnin, witingna muihninabararak balna Papangnina kidika, dawak lāni balna kidika yakat yamna atnin.

⁵Judá tawanni nunuhni balna bitik kidika kaupak yakmukna dai, dawan dauh kau makat yulnin ūni dawak sakripais busnin pāni balna bik. Dawak kulnin aslah lani kidika sakdai witing king kana mani balna yakat.

⁶Kidika kurihni balna laih kulnin aslah lani kidika sakdai bahang, witingna war kau uinin awasdai, kat Dawan yaklauwi isninglak atnin kidika kalana dai bahang, Asa witing Judá yakat tawan nunuhni pararasni balna kidika yamna dai.

⁷Judá muihni balna yakat diyulna: “Tawanni nunuhni balna adika baisa parasni yamdang, dawak yaihnit awaih kidika dakladang, dawak makau kilwi talnin pāni yamnin kaput bik dūrni balna yamnin dawak ayan nanaini dūr dulauwi apahnin dini kidika yamnin, adika sauni adik baisa mayang matingki yakat sakkidika mani balna akat. Kat mayang laih maPapangki Dawan yakat walnamayang bahang, witing yaklauwi kulnin aslah kidika mayana mayaihkit kauh muih balna bitik kidika karak.” Kaput laih witingna yamnin kukulna kidika bitik laih yamni yayamna dai.

⁸Asa witing kalbauyang muihni balna kidika duwadai ahal tausin 300, Judá muihni balna kaupak, bahang witingna kalbaunin dini duduwa dai, nanitna daknin dini kidika dawak langsa karak, dawak Benjamín sulani balna kidika tausin 280 dai, kidika balna laih duduwa dai nanitna daknin dawi sibang karak. Witingna bitik laih kalbauyang balna kulninna dadasni dai.

⁹Kidika balna niningna yakat kiuna, Etiopía kaupak al as ayangni Zera kidika, kalbaunin muihni balna duwi kiuna ahal milian as, dawak kalbaunin kārni balna 300, bahang kaput laih Maresa kat kiuna.

¹⁰Kaput laih Asa bik nining kauh kalpaknin kalahwi kiuna, witing kalbaunin ahalni balna duwa kidika balna karak, Maresa yaihnit kau Sefata sauni langni yakat.

¹¹Asa witing Papangni Dawan yakat yulna dai aput yulwi: “Dawan, man namangkauh laih sihm kapapatki parasni duwa muihni yakat ilp kalanam, parasni dis kidika karak dawakat. Kaput bahang ¡Dawan ilp yanatah, yangna Papangkina, yang yangna laih man yakat kulnikna atik dutayangna bahang, dawak man ayangma kau akat kalbauna aiwanayangna, adika kalbauyang balna niningna yakat! Dawan man laih yangna Papangkina man, ¡lāih man parasma kidika niningnakatah man namangyakat muih as bik yaklaunin sip-awas kidika!”

¹²Kaput laih Dawan yaklauwi Asa dawak Judá yakat bik kalana minit bayaknin kidika, Etiopía muihni balna niningna yakat, kaput laih kidika muihni balna kikirana dai.

¹³Kaunah Asa dawi witing muihni balna karak uiwi uina dai Gerar kat, dawakat Etiopía muihni balna kidika bubukna dai, bahang as bik sangka yaklawas dai, kat Dawan muhni yakat bitik laih iyamna dai, dawak witing muihni kalbauyang duwa kidika muhnina yakat bik, kidika yakat waihninala balna kaupak di mahni duduna dai.

¹⁴Kidika usnit kat, Gerar yaihnit kau tawan nunuhni balna bangkidika minitna yakat bubukna, kat witingna bitik laih Dawan muhnit yakat yamaduwi bubukna. Judá muihni bala yaklauwi dinina balna kidika bitik duduna, kat kidika yakat laih ritsni kidika nuhni sakdai bahang.

¹⁵Kaput bik tinglau main tatalwa pāni balna dai kidika yakat bik niningna yakat kalbabauna, dawak tinglau balna mahni duwi uina sīp, kiamil, Jerusalén yakat.