Read Mayangna 2 Crónicas 15 Bible Online

2 Crónicas 15 - Mayangna bible

2 Crónicas 15

¹Oded walanbis al Azarías kidika Papang spiritni duna dai,

²bahang Asa niningyakat kalahwi kiuna kalyulna atnin: “¡Asa, man yadakah, Judá muihni balna dawak Benjamín sulani balna bitik! Dawan laih manna karak ki, manna witing karak awanama kat. Manna witing yakat kalwaltanama kat yaktanama; kaunah witing kidika ruhmta datanama kat, witing bik manaruhmwi dana karang.

³Israel balna kidika ma mahni Papangni rahm kidika duduwas dai, sumalyang balna bik disdai witingna yakat disumalna atnin kidika.

⁴Kaunah witingna dutni pasyakat laih, tawan kidika Dawan yakat kiwi, Israel Papangni yakat, walwi, kaput laih dawak kalyayakwi.

⁵Kidika mani balna yakat, kulnin aslah lani kidika muih as bik disdai, nawatkauh laih yamadunin kidika laih nuhni palni dai, sau balna satni bitik yakat.

⁶Nisan balna dawak tawan nunuhni kidika balna bik biri kaldaukakalna, kat Dawan yaklauwi muih balna yakat muihsak dihiwa bahang, yuh lakwa satni kau diawak bilninalauwa bahang dutni manas karak.

⁷Kaunah manna laih kulnamna dadasni awanauh, datanangkat kulnamna kidika sau yakat buknin awaski, kat manna warkmana kidika minit dutamana bahang.”

⁸Asa, prapit yulni balna yulna kidika dakawi kulnin parasni duna, dawak dawan dauh balna wayanina Judá duwak Benjamín sauni yakat bangdai kidika bitik yakmukna, Efraín asangnipas kau tawan nunuhni balna dai kidika kalbauwi dakyakna balna dai kidika bitik, dawak Dawan ūni kiwi kawa kau panuhni pakkidika yakat Dawan kau sakripais busnin pāni pakkidika bik watwi laihwi dulauwi yamna dai.

⁹Kidika usnitkat, Judá dawak Benjamín muihni balna kidika bitik uduhna, dawak kidika minityakat tringsar balna Efraín, Manasés dawak Simeón sauni kaupak balna dai kidika bitik uduhna dai, kat Israel muihni manas bik Asa yakauh wiryaklalana dai, kat witingna tatalwak Papangnina Dawan kidika witing karakdai bahang.

¹⁰Asa king kana kurih 15, waiku laih bās laihwa yakat, witingna bitik kalududuhna dai Jerusalén yakat,

¹¹dawak Dawan kau sakripais yayamna kidika mani, turuh 700, dawak sīp kidika tausin tiaskaubu, bahang kidika dini balna kuduh waihla balna kaupak dakyayakna dai kidika.

¹²Kidika usnit kat witingna pramis kalalahna Dawan yakat kulninna bitik palni walna atnin, muihnina bararak balna Papangnina kidika.

¹³Dawak bik pramis yayamna, angdika muihni Dawan kidika walnin kulwas karang kat, Israel Papangni kidika, muihbarak karangpa, muihbin karangpa, al kidika awaskat yal karangpa kaunah daunin yakat wirlana karang ki.

¹⁴Pramis yayamna kidika Dawan yakat witingna parasni sarahwi yuyulna, dawak bik alasna sarahwi yuyulna, trumpit puhwinah, turuh tamni bik puhwinah.

¹⁵Judá muihni balna bitik alasna kalalahna witingna pramis kalalahna kidika yulni, kat witingna kulninna bitik palni laih pramis yayamna dai bahang, dawak bik witingna silp kulninna Dawan yakat wawalna dai bahang, dawak witing bik dawak kalwalwi yayakna dai, dawak kulnin aslah lani kidika diana dai witingna yaihnit kau muih balna kidika bitik karak.

¹⁶Kidika minit yakat king Asa yaklauwi, witing titingni Maaca, king yal nanangni kalkulna kidika kaupak yakpamna dai, kat sihwak Asera wayani as yayamna dai bahang. Asa yaklauwi kidika wayani bahwi dis yamna dawak Cedrón wasni kungyakat buswa dai.

¹⁷Israel yakat dawan dauh ūni balna kidika yayakwas dai kaunah, Asa laih witing ban barangni dai,

¹⁸dawi Papang ūni yakat, witing dawi Papangni bik, gol dawi lalah Dawan kau kalalana dai kidika uiwi āna dai.

¹⁹Duwak kaput laih wār disdai Asa king kana kurih 35 kat.