Read Mayangna 2 Crónicas 16 Bible Online

2 Crónicas 16 - Mayangna bible

2 Crónicas 16

¹Asa king kana kaupak kurih 36 laihna yakat, Israel kingni Baasa kidika Judá yakat kiwi niningkauh kalbauna, Ramá kidika baisa parasni yamna, kaput laih Judá kingni yakat yul kiwa kidika bitik laih dakna atnin yulni.

²Kaput laih Asa yaklauwi Dawan ūni dawi king ūni kau gol dawi lalah kidika bitik yakwi sihna Siria kingni Ben-adad yakat, bahang witing ūni duwa kidika laih Damasco yakat dai. Dawak adika yulni bik sihna dai:

³“Man dawi yang karak aslah malahwangh, mayang mapapangki balna yayamna dai kapat. Akat masihtayang gol dawak lalah bik. Israel kingni Baasa karak pramis dutaman kidika datah, kaput laih witing yang akat kulnik aslah yadawarang.”

⁴Ben-adad yamni talna dai, king Asa kalyulna kidika, dawak kalbauyang muihni balna duwa kidika yakwi sihna dai Israel tawanni balna niningna yakat kalbaunin. Kaput laih Ijón, Dan, Abel-maim dawi Neftalí kau tawan nunuhni balna bitik, di punin pāni duwadai kidika kawi duna dai.

⁵Baasa, dakana kat, Ramá kidika parasni yamwa dai kidika dana dai, warkni balna bitik laihwatna dai.

⁶Kaput laih king Asa yaklauwi Judá muihni balna bitik karak kalpakwi Ramá kaupak kipala duwak pan balna kidika yakwi duwi kiuna, kidika dini balna kau Baasa witing yus yamna dai Ramá kidika pasni yamnin, bahang kaput laih kidika dini balna kau Geba dawak Mizpa kidika parasni yamna dai.

⁷Kidika mani balna yak, prapit Hanani witing king Asa yakat kaltalna kiuna dai, Judá kingni yakat, dawak bik kalyulna atnin: “Siria kingni kalbauyang balna duwa kidika man tingma kaupak kiri yaklalana, kat Siria kingni yakat ilp walnaman bahang, man Papangma Dawan kalwaltas data.

⁸¿Etiopía dawak Libia muihni balna karak kalpakwi kalbauyang muihni balna pararasni awasdaih, aras kau kilwi kalbauyang balna kidika mahni palni, dawak kalbaunin kārni balna bik? Kaput kaunah Dawan yaklauwi man tingma yakat āna kat witing yakat ilp walnaman bahang.

⁹Kat Dawan laih sau bitik pasyakat di kalahwa kidika yamni palni talwasakki, angdika muihni witing yakat kalkulwa kidika parasni kalana atnin. ¡Kidika yakat laih man mutu kapat yamnaman! Kat waradika kaupak tamat yakat war baisa duna awama.”

¹⁰Kaput laih Asa witing kulnin daukalna prapit niningyakat, dawak pakwak silak ahana. Kaput bik laih kidika mani balna yakat, tawan as balna yakat dutni palni diyamna dai.

¹¹Asa yulni umani balna kidika tatuna kaupak witni kat, kidika ulna ki Judá kingni dawak Israel kingni balna wauhninataya uhulna yakat.

¹²Witing king kana kaupak kurih 39 yakat, Asa siknis kalahna dutni palni, kalni balna yakat; kaunah witing sikninis yulni Dawan yakat walwasdai, kaunah daktar balna yakat walna dai.

¹³Witing dauna, king kana kaupak, kurih 41 laihna yakat,

¹⁴dawakat Devid tawanni nuhni yakat, witing yaklauwi pakwak muih ānin pāni yayamna dai yakat nununa. Kalangnin pāni as kau di walapni mahni āwi dawi uiwi laktutusna, kaput bik laih wasni walalapni yamni yayamna kidika karak bik. Kidika usnit kat, witing ayangni kau kuh nuhni as biwi dadahlna dai.